ಎರಡನೇ ಸುತ್ತಿಗೆ ಸಾನಿಯಾ- ನೂರಿಯಾ
ಮಾಸ್ಕೊ (ಪಿಟಿಐ): ಸಾನಿಯಾ ಮಿರ್ಜಾ ಮತ್ತು ಸ್ಪೇನ್ನ ನೂರಿಯಾ ಲಗೊಸ್ತೆರಾ ಜೋಡಿ ಇಲ್ಲಿ ನಡೆಯುತ್ತಿರುವ ಕ್ರೆಮ್ಲಿನ್ ಕಪ್ ಟೆನಿಸ್ ಟೂರ್ನಿಯ ಡಬಲ್ಸ್ ವಿಭಾಗದ ಎರಡನೇ ಸುತ್ತು ಪ್ರವೇಶಿಸಿತು.
ಮಂಗಳವಾರ ನಡೆದ ಪಂದ್ಯದಲ್ಲಿ ಭಾರತ- ಸ್ಪೇನ್ ಜೋಡಿ 6-3, 5-7, 10-6 ರಲ್ಲಿ ಬೆಲಾರಸ್ನ ಡರ್ಯಾ ಕುತ್ಸೋವಾ ಮತ್ತು ಉಕ್ರೇನ್ನ ಓಲ್ಗಾ ಸಾವ್ಚುಕ್ ಎದುರು ಪ್ರಯಾಸದ ಜಯ ಸಾಧಿಸಿತು.
ಒಂದು ಗಂಟೆ 27 ನಿಮಿಷಗಳ ಹೋರಾಟದ ಬಳಿಕ ಸಾನಿಯಾ- ನೂರಿಯಾ ಗೆಲುವು ತಮ್ಮದಾಗಿಸಿಕೊಂಡರು. ಈ ಪಂದ್ಯದಲ್ಲಿ ಎರಡೂ ಎರಡೂ ತಂಡದವರು ಸಾಕಷ್ಟು ಅನಗತ್ಯ ತಪ್ಪುಗಳನ್ನೆಸಗಿದರು. ಸಾನಿಯಾ ಮತ್ತು ನೂರಿಯಾ ತಮಗೆ ಲಭಿಸಿದ 11 `ಬ್ರೇಕ್ ಪಾಯಿಂಟ್~ ಅವಕಾಶಗಳಲ್ಲಿ ಎಂಟನ್ನೂ ಸದುಪಯೋಗಪಡಿಸಿಕೊಳ್ಳುವಲ್ಲಿ ವಿಫಲರಾದರು.
ಟೆನಿಸ್: ಸನಮ್ಗೆ ಗೆಲುವು
ನಾನ್ಜಿಂಗ್, ಚೀನಾ (ಪಿಟಿಐ): ಭಾರತದ ಸನಮ್ ಸಿಂಗ್ ಏಷ್ಯಾ ಪೆಸಿಫಿಕ್ ಆಸ್ಟ್ರೇಲಿಯಾ ಓಪನ್ ವೈಲ್ಡ್ಕಾರ್ಡ್ ಪ್ಲೇ ಆಫ್ ಟೆನಿಸ್ ಟೂರ್ನಿಯ ಫೈನಲ್ ಸುತ್ತು ಪ್ರವೇಶಿಸಿದರು.
ಮೊದಲ ಎರಡು ಸುತ್ತುಗಳಲ್ಲಿ `ಬೈ~ ಪಡೆದಿದ್ದ ಸನಮ್ ಮಂಗಳವಾರ ನಡೆದ ಮೂರನೇ ಸುತ್ತಿನ ಪಂದ್ಯದಲ್ಲಿ 6-3, 6-1 ರಲ್ಲಿ ಚೀನಾದ ದೆ ಜು ವಿರುದ್ಧ ಗೆದ್ದರು. ಬುಧವಾರ ನಡೆಯುವ ಅಂತಿಮ ಪಂದ್ಯದಲ್ಲಿ ಅವರು ಚೀನಾದ ಜಿಜೆನ್ ಜಾಂಗ್ ಸವಾಲನ್ನು ಎದುರಿಸಲಿದ್ದಾರೆ.