ಸಾಹಿತಿಗಳ ಎಡಬಿಡಂಗಿ ನಿಲುವಿಗೆ ಅಸಮಾಧಾನ

ಸಾಗರ: ಮನರಂಜನೆಯ ಮಾಧ್ಯಮಗಳಿಗೆ ಮಾರಾಟವಾಗಿ ಎಡಬಿಡಂಗಿ ನಿಲುವು ತೋರುವ ಬಗ್ಗೆ ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತ ಸಾಹಿತಿಗಳು ಸೇರಿದಂತೆ ಎಲ್ಲಾ ಸಾಹಿತಿಗಳು ಆತ್ಮವಿಮರ್ಶೆ ಮಾಡಿಕೊಳ್ಳಬೇಕಾದ ಅಗತ್ಯವಿದೆ ಎಂದು ರಂಗಕರ್ಮಿ ಪ್ರಸನ್ನ ಹೇಳಿದರು.

ಒಡನಾಟ ಸಾಂಸ್ಕೃತಿಕ ಸಂಘಟನೆ ಭಾನುವಾರ ಏರ್ಪಡಿಸಿದ್ದ ಸಮಾರಂಭದಲ್ಲಿ ಮಡಿಕೇರಿಯಲ್ಲಿ ನಡೆಯಲಿರುವ 80ನೇ ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷರಾಗಿ ಆಯ್ಕೆಯಾಗಿರುವ ಸಾಹಿತಿ ಡಾ.ನಾ.ಡಿಸೋಜ ಅವರನ್ನು ಅಭಿನಂದಿಸಿ ಅವರು ಮಾತನಾಡಿದರು.

ಭಾಷೆ ಗಂಭೀರ ಬಿಕ್ಕಟ್ಟನ್ನು ಎದುರಿಸುತ್ತಿದ್ದು ಇದರ ನೇತ್ಯಾತ್ಮಕ ಪರಿಣಾಮ ಸಾಹಿತ್ಯ, ಕಲೆ, ನಾಟಕದಂತಹ ಪ್ರಕಾರಗಳ ಮೇಲೂ ಆಗುತ್ತಿವೆ. ದೃಶ್ಯ ಮಾಧ್ಯಮದ ಮೂಲಕವೇ ಕ್ರಾಂತಿ ಉಂಟಾಗುತ್ತದೆ ಎಂಬ ಭ್ರಮೆ ಸೃಷ್ಟಿಸಲಾಗುತ್ತಿದೆ. ಪ್ರಸ್ತುತ ಸನ್ನಿವೇಶದಲ್ಲಿ ಸೃಜನಶೀಲತೆ ಕೂಡ ಮಾರಾಟದ ವಸ್ತುವಾಗಿದೆ. ಈ ಕಾರಣ ಸೃಜನಶೀಲತೆಯನ್ನೇ ಯಾಕೆ ತಿರಸ್ಕರಿಸಬಾರದು ಎನ್ನುವ ಪ್ರಶ್ನೆ ಮೂಡುತ್ತಿದೆ ಎಂದರು.

ಪ್ರಯೋಗಾತ್ಮಕತೆ, ಶೈಲಿಯ ಬಗ್ಗೆ ಅತಿಯಾದ ಒಲವು, ಭಾಷೆಯ ಮೇಲಿನ ಅನಗತ್ಯ ಕಸರತ್ತುಗಳಿಂದ ನವ್ಯ ಸಾಹಿತ್ಯ ಶ್ರೇಷ್ಠತೆಯ ವ್ಯಸನದಿಂದ ಬಳಲುತ್ತಿದ್ದ ಸಂದರ್ಭದಲ್ಲಿ ‘ಜನಪ್ರಿಯ’ ಸಾಹಿತಿ ಎಂಬ ಹಣೆಪಟ್ಟಿ ಕಟ್ಟಿಕೊಂಡ ನಾ.ಡಿಸೋಜ ಅವರು ವಿಮರ್ಶೆಯ ಮಾನದಂಡಗಳನ್ನು ಲೆಕ್ಕಿಸದೆ ಕನ್ನಡ ಸಾಹಿತ್ಯದಲ್ಲಿ ಹೊಸ ಮಾರ್ಗದ ಪ್ರವರ್ತಕರಂತೆ ಸಾಹಿತ್ಯ ಕೃಷಿ ಮಾಡಿದ್ದು ಗಮನಾರ್ಹ ಎಂದು ಹೇಳಿದರು.

ಮಲೆನಾಡಿನ ಪರಿಸರ ಹಾಗೂ ಇಲ್ಲಿನ ವಿವಿಧ ಜನಾಂಗಗಳ ಜೊತೆ ಸಂಬಂಧ ಸ್ಥಾಪಿಸಿಕೊಂಡು ನಗರಕ್ಕೆ ವಲಸೆ ಹೋಗದೆ ಸಾಗರದಂತಹ ಸಣ್ಣ ಊರಿನಲ್ಲೆ ಇದ್ದುಕೊಂಡು ಸಾಹಿತ್ಯ ಸೃಷ್ಟಿಸಿದ ಡಿಸೋಜರ ಬರವಣಿಗೆ ಹಾಗೂ ಬದುಕಿನ ನಡುವೆ ವ್ಯತ್ಯಾಸಗಳಿಲ್ಲ. ಇಂದು ಯುವಕರು ಹೆಚ್ಚಿನ ಸಂಖ್ಯೆಯಲ್ಲಿ ನಗರಕ್ಕೆ ವಲಸೆ ಹೋಗುತ್ತಿದ್ದು ಕನ್ನಡ ಭಾಷೆಯಿಂದ ದೂರಾಗುತ್ತಿರುವ ಈ ಸಂದರ್ಭದಲ್ಲಿ ಸಾಹಿತ್ಯವನ್ನು ಯಾರು ಬರೆಯುತ್ತಾರೆ, ಯಾವುದರ ಬಗ್ಗೆ ಬರೆಯುತ್ತಾರೆ ಎನ್ನುವ ಪ್ರಶ್ನೆಗಳು ಹುಟ್ಟಿದ್ದು ಡಿಸೋಜರ ರೂಪದಲ್ಲಿ ಈ ಬಿಕ್ಕಟ್ಟಿಗೆ ಉತ್ತರ ಕಂಡುಕೊಳ್ಳಬಹುದು ಎಂದರು.

ಇಂದಿರಾಗಾಂಧಿ ಸರ್ಕಾರಿ ಪ್ರಥಮ ದರ್ಜೆ ಮಹಿಳಾ ಕಾಲೇಜಿನ ಪ್ರಾಧ್ಯಾಪಕ ಡಾ.ಪ್ರಭಾಕರ್‌ರಾವ್‌ ಮಾತನಾಡಿ, ಡಿಸೋಜರ ಸಾಹಿತ್ಯದಲ್ಲಿ ಇರುವ ಪ್ರತಿಭಟನೆಯ ಧ್ವನಿ ತಣ್ಣನೆಯದ್ದಾದರೂ ಅವರ ಬದ್ಧತೆ ಪ್ರಶ್ನಾತೀತ. ಜನಪರ ಆಲೋಚನೆಯ ಜೊತೆಗೆ ಡಿಸೋಜರದ್ದು ಅಪ್ಪಟ ಜಾತ್ಯತೀತ ಮನಸ್ಸು ಎಂದರು.

ಲೇಖಕ ವಿಲಿಯಂ ಮಾತನಾಡಿ, ಪರಿಪೂರ್ಣ ವ್ಯಕ್ತಿತ್ವದ ಡಿಸೋಜ ಅವರು ಸಾಹಿತ್ಯ ಪಯಣದಲ್ಲಿ ಯಾರ ಆಸರೆಯನ್ನೂ ಪಡೆಯದ ಒಬ್ಬಂಟಿಗ. ಈ ಪ್ರದೇಶದಲ್ಲಿ ನಡೆದ ರೈಲ್ವೆ ಹೋರಾಟದ ಯಶಸ್ಸಿನಲ್ಲಿ ಅವರ ನಾಮಬಲ ಹೆಚ್ಚಿನ ಕೆಲಸ ಮಾಡಿದೆ ಎಂದು ಹೇಳಿದರು.

ತಾಲ್ಲೂಕು ಕನ್ನಡ ಸಾಹಿತ್ಯ ಪರಿಷತ್‌ ಅಧ್ಯಕ್ಷ ವಿ.ಟಿ.ಸ್ವಾಮಿ, ಡಾ.ಬಿ.ಜಿ.ಸಂಗಂ, ಕೆ.ಎನ್‌.ಶರ್ಮ, ಎಸ್‌.ವಿ.ಹಿತಕರ ಜೈನ್‌ ಮಾತನಾಡಿದರು.  ಅಭಿನಂದನೆ ಸ್ವೀಕರಿಸಿ ಮಾತನಾಡಿದ ಡಾ.ನಾ.ಡಿಸೋಜ ಮಲೆನಾಡಿನ ಮುಳುಗಡೆ ಸಮಸ್ಯೆಯ ಬಗ್ಗೆ ಬರೆದ ಕಾರಣ ಆ ಸಮಸ್ಯೆ ಬಗೆಹರಿಯದಿದ್ದರೂ ಮುಳುಗಡೆ ಸಂತ್ರಸ್ತರ ನೋವನ್ನು ಸರ್ಕಾರಕ್ಕೆ ಮುಟ್ಟಿಸಿದ ಸಮಾಧಾನ ನನಗಿದೆ ಎಂದರು.

ಡಿಸೋಜರ ಪತ್ನಿ ಫಿಲೋಮಿನಾ ಡಿಸೋಜ ಹಾಜರಿದ್ದರು. ಸಿ.ಜಿ.ಶ್ರೀಧರ್‌ ವಂದಿಸಿದರು.  ಎಂ.ಪಿ.ಲಕ್ಷ್ಮೀನಾರಾಯಣ್‌ ಕಾರ್ಯಕ್ರಮವನ್ನು ನಿರೂಪಿಸಿದರು.

ಡಿಸೋಜರ ಮೊದಲ ಬರಹ ವಾಚಕರ ವಾಣಿ ಪತ್ರ!
ಈ ಬಾರಿಯ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷರಾಗಿ ಆಯ್ಕೆಯಾಗಿರುವ ಸಾಹಿತಿ ಡಾ.ನಾ.ಡಿಸೋಜ ಅವರ ಮೊದಲ ಪ್ರಕಟಿತ ಬರಹ ಎಂದರೆ ‘ಪ್ರಜಾವಾಣಿ’ಯ ವಾಚಕರ ವಾಣಿ ವಿಭಾಗದಲ್ಲಿ ಪ್ರಕಟವಾದ ಪತ್ರವಂತೆ. ಈ ವಿಷಯವನ್ನು ಒಡನಾಟದ ಕಾರ್ಯಕ್ರಮದಲ್ಲಿ ಡಿಸೋಜ ಅವರೇ ಬಹಿರಂಗಪಡಿಸಿದರು.