ಸ್ಯಾಂಕಿ ರಸ್ತೆ ವಿಸ್ತರಣೆಗೆ ಬದ್ಧ: ಬಿಬಿಎಂಪಿ

ಬೆಂಗಳೂರು: ಸ್ಯಾಂಕಿ ರಸ್ತೆ ವಿಸ್ತರಣೆ ಬಗ್ಗೆ ಸ್ಥಳೀಯರು ಹಾಗೂ ವಿವಿಧ ಸಂಘಟನೆಗಳಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದ್ದರೂ ರಸ್ತೆ ವಿಸ್ತರಣೆ ಕಾರ್ಯ ಕೈಗೊಳ್ಳುವುದಾಗಿ ಬಿಬಿಎಂಪಿ ಪ್ರಕಟಿಸಿದೆ.

ಪಾಲಿಕೆ ಕೇಂದ್ರ ಕಚೇರಿಯಲ್ಲಿ ಗುರುವಾರ ಉಪಮೇಯರ್ ಎಸ್. ಹರೀಶ್ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿಯೂ ಸ್ಯಾಂಕಿ ರಸ್ತೆ ವಿಸ್ತರಣೆ ಕಾಮಗಾರಿಯ ಬಗ್ಗೆ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಯಿತು.

ಸಭೆಯಲ್ಲಿ ಪಾಲ್ಗೊಂಡಿದ್ದ ವಿವಿಧ ನಿವಾಸಿಗಳ ಕ್ಷೇಮಾಭಿವೃದ್ಧಿ ಸಂಘಗಳ ಪದಾಧಿಕಾರಿಗಳು ಹಾಗೂ ಪರಿಸರವಾದಿಗಳ ನಡುವೆ ಈ ರೀತಿ ಭಿನ್ನ ಅಭಿಪ್ರಾಯಗಳು ವ್ಯಕ್ತವಾದವು. ಕೊನೆಗೆ ರಸ್ತೆ ವಿಸ್ತರಣೆ ಅನಿವಾರ್ಯವಾಗಿರುವ ಹಿನ್ನೆಲೆಯಲ್ಲಿ ಕಾಮಗಾರಿ ಮುಂದುವರಿಯಲಿದೆ ಎಂದು ಉಪಮೇಯರ್ ಪ್ರಕಟಿಸಿದರು.

ವಿಸ್ತರಣೆಗೆ ವಿರೋಧ:  ಮೊದಲಿಗೆ ಮಾತ ನಾಡಿದ ಸಿಟಿಜನ್ ಆಕ್ಷನ್ ಫೋರಂ ಅಧ್ಯಕ್ಷ       ಎನ್.ಎಸ್. ಮುಕುಂದ್, `ವಿಸ್ತರಣೆ ಹಿನ್ನೆಲೆಯಲ್ಲಿ ಎಷ್ಟು ಮರಗಳನ್ನು ಕಡಿಯಲಾಗುತ್ತಿದೆ ಎಂಬ ಬಗ್ಗೆ ಅನುಮಾನಗಳಿವೆ. ವಿಸ್ತರಣೆ ಅಗತ್ಯತೆ ಕುರಿತು ಮಾಹಿತಿ ನೀಡಿ. ಯಾವ ಕಾರಣಕ್ಕೆ ವಿಸ್ತರಣೆ ಕಾರ್ಯ ಕೈಬಿಡಲು ಸಾಧ್ಯವಿಲ್ಲ ಎಂಬುದನ್ನು ತಿಳಿಸಿ~ ಎಂದರು.

`ವಿಸ್ತರಣೆ ಬಗ್ಗೆ ಜನರಿಗೆ ಸರಿಯಾದ ಮಾಹಿತಿ ನೀಡಿ. ಅವರ ಅಭಿಪ್ರಾಯ ಪಡೆದ ಬಳಿಕ ಮುಂದಿನ ಕ್ರಮ ಕೈಗೊಳ್ಳಬೇಕು. ಅಲ್ಲಿಯವರೆಗೆ ಕಾಮಗಾರಿ ಸ್ಥಗಿತಗೊಳಿಸಿ~ ಎಂದರು.

ಪರಿಸರವಾದಿ ಸುರೇಶ್ ಹೆಬ್ಳೀಕರ್, `ನಗರದ ರಸ್ತೆಗಳು ಕೇವಲ 7 ಲಕ್ಷ ವಾಹನಗಳ ಸಂಚಾರ ವನ್ನಷ್ಟೇ ತಡೆದುಕೊಳ್ಳಬಲ್ಲವು. ಆದರೆ ಸದ್ಯ 35 ಲಕ್ಷಕ್ಕೂ ಹೆಚ್ಚು ವಾಹನಗಳು ಸಂಚರಿಸುತ್ತಿವೆ. ಇದನ್ನೇ ನೆಪ ಮಾಡಿಕೊಂಡು ಎಲ್ಲ ರಸ್ತೆಗಳನ್ನು ವಿಸ್ತರಿಸುವುದು ಸೂಕ್ತವಲ್ಲ.  ಸಂಚಾರ ವ್ಯವಸ್ಥೆ ನಿಯಂತ್ರಣಕ್ಕೆ ಒತ್ತು ನೀಡಬೇಕು. ಅಲ್ಲದೇ ಈ ಭಾಗದಲ್ಲಿ ಅಪರೂಪ ಎನಿಸುವ ಅತ್ತಿ ಮರಗಳಿವೆ. ವಾಹನಗಳ ಸಂಖ್ಯೆ ಹೆಚ್ಚಾ ದಂತೆ ರಸ್ತೆ ವಿಸ್ತರಣೆ ಕೈಗೊಳ್ಳುವುದು ಸರಿಯಲ್ಲ. ಹಾಗಾಗಿ ಈ ವಿಸ್ತರಣೆ ಕಾರ್ಯವನ್ನು ಕೈಬಿಡಬೇಕು~ ಎಂದು ಒತ್ತಾಯಿಸಿದರು.

ಜನಸ್ನೇಹಿ ಅಲ್ಲ: ಹಸಿರು ಉಸಿರು ಸಂಘಟನೆಯ ವಿನಯ್ ಶ್ರೀನಿವಾಸ್, `ರಸ್ತೆ ವಿಸ್ತರಣೆ ಜನ ಸ್ನೇಹಿಯಲ್ಲ. ಸಾರ್ವಜನಿಕರ ಅಭಿಪ್ರಾಯ ಪಡೆಯದೇ ವಿಸ್ತರಣೆಗೆ ಮುಂದಾಗಿರುವುದು ಖಂಡನೀಯ. ಈ ಬಗ್ಗೆ ಪಾಲಿಕೆ ಪುನರ್ ಪರಿಶೀಲನೆ ನಡೆಸಬೇಕು~ ಎಂದರು.

`ಸ್ವಾಭಿಮಾನ~ ಮಲ್ಲೇಶ್ವರ ನಿವಾಸಿಗಳ ಕ್ಷೇಮಾ ಭಿವೃದ್ಧಿ ಸಂಘದ ಸದಸ್ಯೆ ಮೀನಾಕ್ಷಿ ಭರತ್, `ರಸ್ತೆ ವಿಸ್ತರಣೆಯಿಂದ ಅಪಘಾತಗಳು ಹೆಚ್ಚಾಗುತ್ತವೆ. ಅಲ್ಲದೇ ವಿದ್ಯಾರ್ಥಿಗಳು ಹಾಗೂ ಪಾದಚಾರಿಗಳು ರಸ್ತೆ ದಾಟುವುದೇ ಕಷ್ಟವಾಗುತ್ತದೆ. ವಾಹನ ದಟ್ಟಣೆ ನಿಯಂತ್ರಿಸಲು ಸಿಗ್ನಲ್ ಮುಕ್ತ ವ್ಯವಸ್ಥೆ ಪರಿಹಾರವಲ್ಲ~ ಎಂದರು.

ಆಶಾ ಎಂಬುವರು ಮಾತನಾಡಿ, `ಈ ಹಿಂದೆ ರೇಸ್‌ಕೋರ್ಸ್ ರಸ್ತೆ ಸಾಕಷ್ಟು ಮರಗಳಿಂದ   ಕಂಗೊಳಿಸುತ್ತಿತ್ತು. ಆ ಮರಗಳನ್ನೆಲ್ಲಾ ಕಡಿದು ಪರಿಸರ ಹಾಳು ಮಾಡಲಾಗಿದೆ. ಬೆಂಗಳೂರಿನ ಸೌಂದರ್ಯ ಹಾಗೂ ವಾತಾವರಣಕ್ಕೆ ಹಾನಿಯಾಗುವ ಯಾವುದೇ ಅಭಿವೃದ್ಧಿ ಬೇಡ~ ಎಂದು ಹೇಳಿದರು.

ಇಷ್ಟೊಂದು ವಿರೋಧ ಏಕೆ?
`ಕೇವಲ 500 ಮೀಟರ್ ಉದ್ದದ ರಸ್ತೆ ವಿಸ್ತರಣೆಗೆ ಇಷ್ಟೊಂದು ವಿರೋಧ ಏಕೆ ಎಂಬುದೇ ಗೊತ್ತಾಗುತ್ತಿಲ್ಲ. ನಾವು ಕೇವಲ ಇಂದಿನ ಪರಿಸ್ಥಿತಿಯನ್ನು ಗಮನಿಸಿದರಷ್ಟೇ ಸಾಲದು. ಮುಂದಿನ ಪೀಳಿಗೆಯವರಿಗೆ ಅನುಕೂಲವಾಗುವ ರೀತಿಯಲ್ಲಿ ಅಭಿವೃದ್ದಿ ಕೈಗೊಳ್ಳಬೇಕು. ನಗರದಲ್ಲಿ ಈ ಹಿಂದೆ ಸಾವಿರಾರು ಮರಗಳನ್ನು ಕಡಿದಾಗ ಸುಮ್ಮನಿದ್ದ ಮಂದಿ ಈಗ 19 ಮರಗಳನ್ನು ಕಡಿಯುವುದಕ್ಕೆ ದೊಡ್ಡದಾಗಿ ವಿರೋಧಿಸುತ್ತಿ ರುವುದು ಅಚ್ಚರಿ ಮೂಡಿಸಿದೆ. ಬೆಳಿಗ್ಗೆ ಹಾಗೂ ಸಂಜೆ ವೇಳೆ ವಿಪರೀತ ಟ್ರಾಫಿಕ್ ಜಾಮ್ ಉಂಟಾಗುತ್ತಿದ್ದು, ವಿಸ್ತರಣೆ ಕೈಗೊಳ್ಳುವುದು ಸೂಕ್ತ~.
-ಬಿ.ಎಂ.ನಟರಾಜ್, ಪರಿಸರವಾದಿ

`ನಾನು ನಿತ್ಯ ಸದಾಶಿವನಗರದಿಂದ ತುಮಕೂರಿಗೆ ಹೋಗಿ ಬರುತ್ತೇನೆ. ತುಮಕೂರಿನಿಂದ ಗೊರಗುಂಟೆ ಪಾಳ್ಯಕ್ಕೆ ಬರಲು ಒಂದು ಗಂಟೆಯಾದರೆ, ಅಲ್ಲಿಂದ ಸದಾಶಿವನಗರಕ್ಕೆ ಬರಲು ಒಂದು ಗಂಟೆ ಬೇಕಾಗುತ್ತದೆ. ವಾಹನ ದಟ್ಟಣೆಯಿಂದ ನಿತ್ಯ ಪರದಾಡುವಂತಾಗಿದೆ. ಶೀಘ್ರವಾಗಿ ವಿಸ್ತರಣೆ ಕಾರ್ಯ ಆರಂಭಿಸಿ~.
-ಜಗದೀಶ್, ಸದಾಶಿವನಗರ ನಿವಾಸಿ

`ಸ್ಯಾಂಕಿ ರಸ್ತೆಯಲ್ಲಿ ವಾಹನ ದಟ್ಟಣೆ ತೀವ್ರ ವಾಗಿರುತ್ತದೆ. ಈ ಬಗ್ಗೆ ಅರಿವಿಲ್ಲದ ಜನ ಅನಗತ್ಯ ವಿಸ್ತರಣೆಗೆ ವಿರೋಧ ವ್ಯಕ್ತಪಡಿಸುತ್ತಿದ್ದಾರೆ. ಆದರೆ ರಸ್ತೆ ಕಿರಿದಾಗಿರುವುದರಿಂದ ತೊಂದರೆ ಅನುಭವಿ ಸುತ್ತಿರುವವರು ನಾವು. ಹಾಗಾಗಿ ವಿಸ್ತರಣೆ ಸೂಕ್ತ~,
-ವೀರಣ್ಣಗೌಡ, ಮಲ್ಲೇಶ್ವರ

`ಸ್ಟೆಲ್ಲಾ ಮೇರಿಸ್ ಶಾಲೆಯ ಆಡಳಿತ ಮಂಡಳಿ ಪಾಲಿಕೆ ಭೂಮಿಯನ್ನು ಒತ್ತುವರಿ ಮಾಡಿಕೊಂಡು ಕಟ್ಟಡ ನಿರ್ಮಿಸಿದ್ದು, ಸರ್ವಿಸ್ ರಸ್ತೆ ಬಂದ್ ಮಾಡಿದ್ದಾರೆ. ಹಾಗಾಗಿ ಒತ್ತುವರಿ ತೆರವುಗೊಳಿಸಿ ವಿಸ್ತರಣೆ ಕಾರ್ಯ ಕೈಗೊಳ್ಳಿ~.
-ಗೋವಿಂದರಾಜು

`ಈ ರಸ್ತೆ ವಿಸ್ತರಣೆ ತೀರಾ ಅಗತ್ಯವಿದೆ. ಏಕೆಂದರೆ ಇದು ತುಮಕೂರು ರಸ್ತೆಯನ್ನು ಸಂಪರ್ಕಿಸುವ ಪ್ರಮುಖ ರಸ್ತೆಗಳಲ್ಲಿ ಒಂದು. ರಸ್ತೆ ವಿಸ್ತರಣೆ ಕಾರ್ಯ ಕೈಗೊಳ್ಳಲಿ. ಕಡಿದ ಮರಗಳಿಗೆ ಬದಲಾಗಿ ಹೆಚ್ಚು ಸಸಿಗಳನ್ನು ನೆಡಲಿ~.
-ರಾಮು, ಆರ್‌ಎಂವಿ ಬಡಾವಣೆ

`ಭಾಷ್ಯಂ ವೃತ್ತದಿಂದ ಅಯ್ಯಪ್ಪ ಸ್ವಾಮಿ ದೇವಾಲಯದವರೆಗಿನ ರಸ್ತೆ ಕಿರಿದಾಗಿದ್ದು, ದಟ್ಟಣೆ ಉಂಟಾಗುತ್ತಿದೆ. ಅಲ್ಲಿಯ ಮರಗಳು ಅಪರೂಪ ಪ್ರಭೇದಗಳಲ್ಲ ಎಂದು ಮರ ಕಡಿ ಯುವುದು         ಸರಿಯಲ್ಲ. ಆದರೆ ವಿಸ್ತರಣೆ ಅಗತ್ಯವಿರುವುದರಿಂದ ಮುಂದುವರಿಸುವುದು ಸೂಕ್ತ~.
-ಜಗದೀಶ್‌ಚಂದ್ರ, ನಿವೃತ್ತ ಪ್ರಧಾನ ಅರಣ್ಯ   ಸಂರಕ್ಷಣಾಧಿಕಾರಿ