ಬೇಸಿಗೆ ಬಿಸಿಲು
ಅಕ್ಷರ ಗಾತ್ರ :ಆ |ಆ |ಆ
ಆಗಸದಲ್ಲಿ
ಸೂರ್ಯನ ಠಾವು
ಏರಿದೆ ನೆಲದಲಿ ಬಿಸಿಲಿನ ಕಾವು
ಬೇಸಿಗೆ ಬಿಸಿಲಿಗೆ
ಸುಟ್ಟಿದೆ ನೆತ್ತಿಯು
ಹರಿದಿದೆ ಮೊಗದಲಿ ದಳದಳ ಬೆವರು
ಅಲುಗಾಡದೆ
ನಿಂತಿದೆ ಗಿಡಮರಗಳು
ಓಡಿದೆ ದೂರಕೆ ತಣ್ಣನೆ ಗಾಳಿಯು
ನಿತ್ಯವು ಸೆಕೆ ಸೆಕೆ
ಒಳಗು ಹೊರಗು
ಉರಿದಿದೆ ಮೈಕೈ ಚುರು ಚುರು
ಉಸುಕಿನ ಹೊಂಡ
ಹರಿಯುವ ಹೊಳೆಯು
ಬತ್ತಿದೆ ಬಾವಿಯ ನೀರಿನ ಸೆಲೆಯು
ಝರಿ ತೊರೆ ಹಳ್ಳದಿ
ತುಂಬದು ಬೊಗಸೆ
ಬುಗಿಲೆದ್ದಿದೆ ನೀರಿಗೆ ಹಾಹಾಕಾರವು
ದುಡ್ಡು ಕೊಟ್ಟರು
ಸಿಗದೆ ಹೋಗಿದೆ
ಮೊಸರು ಮಜ್ಜಿಗೆ ಶರಬತ್ತು
ಐಸ್ಕ್ರೀಮ್‍ವಾಲಾ
ಗಂಟೆ ಹೊಡೆದರೆ
ಮುಗಿಬಿದ್ದು ತಿನುವರು ಹತ್ತತ್ತು
ಒಣಗಿದ ಗಂಟಲು
ತಂಪಾಗುವುದು
ಕುಡಿದರೆ ಒಂದು ಎಳೆನೀರು
ಅಜ್ಜಿಯು ಬೆಳೆಸಿದ
ತೆಂಗಿನ ಮರದಲಿ
ನೂರಿವೆ ಕಾಯಿ ಏನ್ಬಂತು
ಉಂಡರು ಉಟ್ಟರು
ಕುಂತರು ಎದ್ದರು
ಹೊಟ್ಟೆಲಿ ತುಂಬಿದೆ ಸಂಕಟವು
ಬಿಸಿಲಿನ ತಾಪಕೆ
ದಾರಿ ದಾರಿಗೂ
ಇರಬೇಕಿತ್ತು ಗಿಡಮರವು
ಮದುವೆ ದಿಬ್ಬಣ
ತೇರಿನ ಜಾತ್ರೆ
ರಜೆಯ ಸಂಭ್ರಮ ಬೇಸಿಗೆಗೆ
ಬೇಸಿಗೆ ಬಿಸಿಲಿಗೆ
ಸುರಿದರೆ ಜಡಿಮಳೆ
ತಂಪು ತಂಪು ಮೈಮನಕೆ
ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ
ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್
ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.
