ಮುಂಬೈ: ಗುತ್ತಿಗೆ ಆಧಾರಿತ ಉದ್ಯೋಗಾವಕಾಶ ಕಲ್ಪಿಸುವಲ್ಲಿ ಬೆಂಗಳೂರು ಮತ್ತು ಹೈದರಾಬಾದ್ ಮುಂಚೂಣಿಯಲ್ಲಿವೆ ಎಂದು ಸಮೀಕ್ಷೆಯೊಂದು ತಿಳಿಸಿದೆ.
ಕೋವಿಡ್–19 ಸಾಂಕ್ರಾಮಿಕದಿಂದಾಗಿ ಕಂಪನಿಗಳು ಉದ್ಯೋಗ ವ್ಯವಸ್ಥೆಯಲ್ಲಿ ಕೆಲವು ಬದಲಾವಣೆಗಳನ್ನು ಮಾಡಿಕೊಂಡಿವೆ. ಇದರಿಂದಾಗಿ ಗುತ್ತಿಗೆ ಆಧಾರಿತ ಉದ್ಯೋಗಾವಕಾಶಗಳಿಗೆ ಬೇಡಿಕೆ ಬರುತ್ತಿದೆ ಎಂದು ಗುತ್ತಿಗೆ ಆಧಾರಿತ ಉದ್ಯೋಗ ಒದಗಿಸುವಲ್ಲಿ ಕಂಪನಿಗಳಿಗೆ ನೆರವಾಗುವ ಟೆಕ್ಫೈಂಡರ್ ಕಂಪನಿ ಹೇಳಿದೆ.
ಗುತ್ತಿಗೆ ಆಧಾರಿತ ಉದ್ಯೋಗದ ಒಟ್ಟಾರೆ ಬೇಡಿಕೆಯಲ್ಲಿ ಬೆಂಗಳೂರು ಮತ್ತು ದಾವಣಗೆರೆ ಶೇಕಡ 29ರಷ್ಟು ಪಾಲು ಹೊಂದಿರುವ ಕಾರಣ ಕರ್ನಾಟಕ ರಾಜ್ಯವು ಮುಂಚೂಣಿಯಲ್ಲಿದೆ. ತೆಲಂಗಾಣದ ಹೈದರಾಬಾದ್ ಮತ್ತು ವಾರಂಗಲ್ ಒಟ್ಟಾರೆ ಶೇ 24ರಷ್ಟು ಪಾಲು ಹೊಂದಿವೆ. ಮಹಾರಾಷ್ಟ್ರ (ಶೇ 18), ತಮಿಳುನಾಡು (ಶೇ 15) ಹಾಗೂ ದೆಹಲಿ (ಶೇ 14) ನಂತರದ ಸ್ಥಾನದಲ್ಲಿವೆ.
ಜುಲೈ–ಸೆಪ್ಟೆಂಬರ್ ಅವಧಿಯಲ್ಲಿ ದೇಶದಾದ್ಯಂತ ಇರುವ 42 ಸಾವಿರ ಗುತ್ತಿಗೆದಾರರಿಂದ ಮಾಹಿತಿ ಸಂಗ್ರಹಿಸಿ ಈ ವರದಿ ನೀಡಿದೆ.
ಒಟ್ಟಾರೆ ಬೇಡಿಕೆಯಲ್ಲಿ ಒಂದನೇ ಶ್ರೇಣಿಯ ನಗರಗಳ ಪಾಲು ಶೇ 58ರಷ್ಟಿದೆ. ಎರಡನೇ ಶ್ರೇಣಿಯ ನಗರಗಳಲ್ಲಿ ಶೇ 32 ಹಾಗೂ ಮೂರನೇ ಶ್ರೇಣಿಯ ನಗರಗಳಲ್ಲಿ ಶೇ 10ರಷ್ಟು ಬೇಡಿಕೆ ಇದೆ ಎಂದು ತಿಳಿಸಿದೆ.
ಸಾಫ್ಟ್ವೇರ್ ಡೆವಲಪರ್ಸ್, ಸಾಫ್ಟ್ವೇರ್ ಎಂಜಿನಿಯರ್ಗಳು, ಫ್ರಂಟ್ ಎಂಡ್ ಡೆವಲಪರ್ಸ್, ಡೇಟಾ ಅನಲಿಟಿಕ್ಸ್, ವೆಬ್ ಡೆವಲಪರ್, ಡೇಟಾ ಸೈಂಟಿಸ್ಟ್, ಜಾವಾ ಡೆವಲಪರ್ಗಳಿಗೆ ಗುತ್ತಿಗೆ ಆಧಾರದ ಮೇಲೆ ಕೆಲಸ ಮಾಡಲು ಬೇಡಿಕೆ ಬಂದಿದೆ.
ಐ.ಟಿ ಕ್ಷೇತ್ರ ಅಲ್ಲದೆ, ಔಷಧ, ಮಾರಾಟ ಮತ್ತು ಮಾರುಕಟ್ಟೆ, ದೂರಸಂಪರ್ಕ ಹಾಗೂ ವಿಮಾ ವಲಯಗಳಲ್ಲಿಯೂ ಹೊಸ ಗುತ್ತಿಗೆ ಆಧಾರಿತ ಉದ್ಯೋಗಾವಕಾಶಗಳು ಹೆಚ್ಚಾಗಿವೆ ಎಂದು ಅದು ತಿಳಿಸಿದೆ.