ನವದೆಹಲಿ: ದೇಶದ ಮೊದಲ ಕಾರ್ಪೊರೇಟ್ ಬಾಂಡ್ ಷೇರು ವಿನಿಮಯ ನಿಧಿಯಾಗಿರುವ ಭಾರತ್ ಬಾಂಡ್ ಇಟಿಎಫ್, ತನ್ನ ಮೊದಲ ಕೊಡುಗೆಯಲ್ಲಿ ₹ 12,400 ಕೋಟಿ ಸಂಗ್ರಹಿಸಿದೆ.
ಈ ತಿಂಗಳ 12ರಿಂದ 20ರವರೆಗೆ ಈ ಇಟಿಎಫ್ ಖರೀದಿಗೆ ಅವಕಾಶ ಕಲ್ಪಿಸಿಕೊಡಲಾಗಿತ್ತು. ಈ ಬಾಂಡ್ ಇಟಿಎಫ್ ಮೂಲಕ ಸಂಗ್ರಹವಾಗುವ ಬಂಡವಾಳವನ್ನು ಕೇಂದ್ರೋದ್ಯಮಗಳಿಗೆ ಮೂಲಸೌಕರ್ಯಗಳನ್ನು ಒದಗಿಸಲು ಬಳಕೆ ಮಾಡಲಾಗುವುದು.
‘ಭಾರತ್ ಬಾಂಡ್ ಇಟಿಎಫ್’ಗೆ ಎಲ್ಲ ಬಗೆಯ ಹೂಡಿಕೆದಾರರಿಂದ ಉತ್ತೇಜಕರ ಪ್ರತಿಕ್ರಿಯೆ ದೊರೆತಿದೆ. ಮೂರು ಮತ್ತು 10 ವರ್ಷಗಳ ಬಾಂಡ್ಗಳಿಗೆ ನಿಗದಿಪಡಿಸಿದ್ದ ಮೊತ್ತಕ್ಕಿಂತ ಹೆಚ್ಚು ಹಣ ಸಂಗ್ರಹವಾಗಿದೆ. 55 ಸಾವಿರ ರಿಟೇಲ್ ಹೂಡಿಕೆದಾರರು ಈ ಹೂಡಿಕೆ ಪ್ರಕ್ರಿಯೆಯಲ್ಲಿ ಭಾಗವಹಿಸಿರುವುದು ಮಹತ್ವದ ಸಂಗತಿಯಾಗಿದೆ’ ಎಂದು ಹೂಡಿಕೆ ಮತ್ತು ಸರ್ಕಾರಿ ಆಸ್ತಿ ನಿರ್ವಹಣೆ ಇಲಾಖೆಯ (ಡಿಐಪಿಎಎಂ) ಕಾರ್ಯದರ್ಶಿ ಟಿ. ಕೆ. ಪಾಂಡೆ ಅವರು ಟ್ವೀಟ್ ಮಾಡಿದ್ದಾರೆ.
ಸಂಗ್ರಹವಾದ ಮೊತ್ತವನ್ನು ಕೇಂದ್ರೋದ್ಯಮಗಳ ‘ಎಎಎ’ ಮಾನದಂಡದ ಬಾಂಡ್ಸ್ಗಳಲ್ಲಿ ಮಾತ್ರ ತೊಡಗಿಸಲು ನಿರ್ಧರಿಸಲಾಗಿದೆ.
ಡಿಮ್ಯಾಟ್ ಖಾತೆ ಹೊಂದಿಲ್ಲದವರ ಅನುಕೂಲಕ್ಕಾಗಿ ‘ಭಾರತ್ ಬಾಂಡ್ ಫಂಡ್ ಆಫ್ ಫಂಡ್ಸ್ (ಎಫ್ಒಎಫ್) ಆರಂಭಿಸಲಾಗಿದೆ.