ನವದೆಹಲಿ: ಷೇರುಪೇಟೆಯಲ್ಲಿನ ಚಂಚಲ ವಹಿವಾಟು ಮತ್ತು ಕೋವಿಡ್‌ ಬಿಕ್ಕಟ್ಟಿನಿಂದಾಗಿ ಹೂಡಿಕೆದಾರರು ಸುರಕ್ಷಿತ ಹೂಡಿಕೆಯತ್ತ ಹೆಚ್ಚು ಗಮನ ಹರಿಸುತ್ತಿದ್ದಾರೆ.
ಚಿನ್ನದ ವಿನಿಮಯ ವಹಿವಾಟು ನಿಧಿಗಳಲ್ಲಿ (ಇಟಿಎಫ್‌) ಮೇನಲ್ಲಿ ₹ 815 ಕೋಟಿ ಬಂಡವಾಳ ತೊಡಗಿಸಿರುವುದು ಹೂಡಿಕೆದಾರರ ಬದಲಾದ ಧೋರಣೆಗೆ ಸಾಕ್ಷಿಯಾಗಿದೆ.
ಏಪ್ರಿಲ್‌ನಲ್ಲಿ ಚಿನ್ನದ ಇಟಿಎಫ್‌ನಲ್ಲಿ ₹ 731 ಕೋಟಿ ಹೂಡಿಕೆಯಾಗಿತ್ತು ಎಂದು ಭಾರತೀಯ ಮ್ಯೂಚುವಲ್‌ ಫಂಡ್‌ ಸಂಸ್ಥೆಗಳ ಒಕ್ಕೂಟ (ಎಎಂಎಫ್‌ಐ) ಮಾಹಿತಿ ನೀಡಿದೆ.
2019ರಿಂದಲೂ ಹೂಡಿಕೆದಾರರಿಗೆ ಚಿನ್ನದ ಇಟಿಎಫ್‌ ಉತ್ತಮ ಸಂಪತ್ತು ಸೃಷ್ಟಿಸುವ ಮಾರ್ಗವಾಗಿದ್ದು, 2019ರ ಆಗಸ್ಟ್‌ನಿಂದ ₹ 3,299 ಕೋಟಿ ಹೂಡಿಕೆಯಾಗಿದೆ.
’ಕೋವಿಡ್‌ನಿಂದಾಗಿ ಜಾಗತಿಕ ಆರ್ಥಿಕತೆಯು ಕುಸಿತದ ಹಾದಿ ಹಿಡಿದಿದೆ. ಈ ಹಂತದಲ್ಲಿ ಚಿನ್ನವು ಮತ್ತೆ ಹೂಡಿಕೆದಾರರನ್ನು ಆಕರ್ಷಿಸುತ್ತಿದೆ.ಚಿನ್ನದ ಬೆಲೆ ಏರಿಕೆಯೂ ಲಾಭ ಗಳಿಕೆಯ ಅವಕಾಶವನ್ನು ತಂದುಕೊಟ್ಟಿದೆ’ ಎಂದು ಮಾರ್ನಿಂಗ್‌ಸ್ಟಾರ್‌ ಇನ್‌ವೆಸ್ಟ್‌ಮೆಂಟ್‌ ಅಡ್ವೈಸರಿ ಇಂಡಿಯಾದ ಸಂಶೋಧನಾ ವಿಶ್ಲೇಷಕ ಹಿಮಾಂಶು ಶ್ರೀವಾಸ್ತವ ಹೇಳಿದ್ದಾರೆ.
