ಬೆಂಗಳೂರು: ಡಿಸೆಂಬರ್ ತಿಂಗಳಿಗೆ ಕೊನೆಗೊಂಡ ಮೂರನೇ ತ್ರೈಮಾಸಿಕದಲ್ಲಿ ರಿಲಯನ್ಸ್ ಇಂಡಸ್ಟ್ರೀಸ್‌ನ (ಆರ್‌ಐಎಲ್‌) ನಿವ್ವಳ ಲಾಭದಲ್ಲಿ ಶೇ 13.5 ರಷ್ಟು ಏರಿಕೆಯಾಗಿ ₹ 11,640 ಕೋಟಿಗೆ ತಲುಪಿದೆ.
ಹಿಂದಿನ ವರ್ಷದ ಇದೇ ಅವಧಿಯಲ್ಲಿ ₹ 10,251 ಕೋಟಿ ನಿವ್ವಳ ಲಾಭ ದಾಖಲಿಸಿತ್ತು. ಹಿಂದಿನ ವರ್ಷ ಈ ಅವಧಿಯಲ್ಲಿನ ವರಮಾನವು ₹ 1.71 ಲಕ್ಷ ಕೋಟಿಗಳಷ್ಟಿದ್ದರೆ, ಈ ಬಾರಿ ₹ 1.68 ಲಕ್ಷ ಕೋಟಿಗೆ ಇಳಿದು ಶೇ 1.4ರಷ್ಟು ಕುಸಿತ ಕಂಡಿದೆ.
ಜಿಯೊ ಸಾಧನೆ: ‘ಆರ್‌ಐಎಲ್‌’ನ ಅಂಗಸಂಸ್ಥೆ ರಿಲಯನ್ಸ್ ಜಿಯೊ ಇನ್ಫೊಕಾಂನ ಲಾಭ ಗಳಿಕೆ ಗಮನಾರ್ಹವಾಗಿ ಹೆಚ್ಚಿದೆ. ತ್ರೈಮಾಸಿಕದಲ್ಲಿನ ನಿವ್ವಳ ಲಾಭವು ಶೇ 62.5ರಷ್ಟು ಏರಿಕೆಯಾಗಿ ₹ 1,350 ಕೋಟಿಗೆ ತಲುಪಿದೆ.
