ಭಾನುವಾರ, ಜೂಲೈ 5, 2020
28 °C
ಎರಡು ವಾರಗಳಲ್ಲಿ ಮೂರನೇ ಹೂಡಿಕೆ

ಜಿಯೊ ಪ್ಲ್ಯಾಟ್‌ಫಾರ್ಮ್ಸ್‌ನಲ್ಲಿ ವಿಸ್ತಾ ಈಕ್ವಿಟಿ ₹11,367 ಕೋಟಿ

ಪಿಟಿಐ Updated:

ಅಕ್ಷರ ಗಾತ್ರ : | |

Prajavani

ನವದೆಹಲಿ: ರಿಲಯನ್ಸ್‌ ಇಂಡಸ್ಟ್ರೀಸ್‌ನ (ಆರ್‌ಐಎಲ್‌) ಡಿಜಿಟಲ್‌ ಘಟಕವಾದ ಜಿಯೊ ಪ್ಲ್ಯಾಟ್‌ಫಾರ್ಮ್ಸ್‌ನಲ್ಲಿ ಅಮೆರಿಕದ ವಿಸ್ತಾ ಈಕ್ವಿಟಿ ಪಾರ್ಟನರ್ಸ್‌ ₹ 11,367 ಕೋಟಿ ಬಂಡವಾಳ ಹೂಡಿಕೆ ಮಾಡಿದೆ.

ಎರಡು ವಾರಗಳ ಅವಧಿಯಲ್ಲಿ ಮೂರನೇ ಹೂಡಿಕೆ ಇದಾಗಿದೆ. ತೈಲದಿಂದ ದೂರಸಂಪರ್ಕವರೆಗೆ ವಹಿವಾಟು ನಡೆಸುವ ‘ಆರ್‌ಐಎಲ್‌’, 2021ರ ವೇಳೆಗೆ  ಸಾಲದಿಂದ ಮುಕ್ತಗೊಳ್ಳಲು ಪಾಲು ಬಂಡವಾಳವನ್ನು ಮಾರಾಟ ಮಾಡುತ್ತಿದೆ. ಸದ್ಯದ ಬೆಳವಣಿಗೆ ಗಮನಿಸಿದರೆ ಈ ವರ್ಷದ ಡಿಸೆಂಬರ್‌ ವೇಳೆಗೆ ಕಂಪನಿಯ ಉದ್ದೇಶ ಪೂರ್ಣಗೊಳ್ಳುವ ಸಾಧ್ಯತೆ ಇದೆ.  ಇದುವರೆಗಿನ ಮೂರು  ಪಾಲು ಮಾರಾಟದಿಂದ ಕಂಪನಿಗೆ ₹ 60,596.37 ಕೋಟಿ ಮೊತ್ತದ ಬಂಡವಾಳ ಹರಿದು ಬಂದಿದೆ.

ವಿಸ್ತಾ ಈಕ್ವಿಟಿ ಪಾರ್ಟನರ್ಸ್‌, ಜಿಯೊ ಪ್ಲ್ಯಾಟ್‌ಫಾರ್ಮ್ಸ್‌ನ ಶೇ 2.32 ಪಾಲು ಬಂಡವಾಳ ಖರೀದಿಸಲಿದೆ. ಈ ಮೂಲಕ ರಿಲಯನ್ಸ್‌ ಇಂಡಸ್ಟ್ರೀಸ್‌, ಫೇಸ್‌ಬುಕ್‌ ನಂತರದ ಮೂರನೇ ಅತಿದೊಡ್ಡ ಹೂಡಿಕೆ ಸಂಸ್ಥೆಯಾಗಿರಲಿದೆ.

ವಿಸ್ತಾ ಈಕ್ವಿಟಿ ಪಾರ್ಟನರ್‌ನ ಸಹ ಸ್ಥಾಪಕ ಬ್ರಿಯಾನ್‌ ಸೇಠ್‌ ಅವರ ತಂದೆ ಗುಜರಾತ್‌ನವರಾಗಿದ್ದಾರೆ. ಮುಕೇಶ್‌ ಅಂಬಾನಿ ಅವರೂ ಗುಜರಾತ್‌ನವರಾಗಿದ್ದಾರೆ. ವಿಸ್ತಾದ ಸ್ಥಾಪಕ ರಾಬರ್ಟ್‌ ಸ್ಮಿಥ್‌ ಜತೆಗಿನ ಮುಕೇಶ್‌ ಅವರ ವೈಯಕ್ತಿಕ ಸಂಪರ್ಕದ ಫಲವಾಗಿ ಈ ಹೂಡಿಕೆ ಒಪ್ಪಂದ ಏರ್ಪಟ್ಟಿದೆ.

ಜಿಯೊ ಪ್ಲ್ಯಾಟ್‌ಫಾರ್ಮ್ಸ್‌ನ ಶೇ 20ರಷ್ಟು ಪಾಲು ಬಂಡವಾಳ ಮಾರಾಟ ಮಾಡಲು ‘ಆರ್‌ಐಎಲ್‌’ ನಿರ್ಧರಿಸಿದೆ. ಇನ್ನಷ್ಟು ಕಂಪನಿಗಳು ಉಳಿದ ಪಾಲು ಬಂಡವಾಳ ಖರೀದಿಸಲಿವೆ.

20 %: ಜಿಯೊ ಪ್ಲ್ಯಾಟ್‌ಫಾರ್ಮ್ಸ್‌ನ ಪಾಲು ಮಾರಾಟಕ್ಕೆ
13.46 %: ಮೂರು ಒಪ್ಪಂದದಿಂದ ಮಾರಾಟಗೊಂಡ ಪಾಲು
₹ 60,596.37 ಕೋಟಿ: ಜಿಯೊ ಪ್ಲ್ಯಾಟ್‌ಫಾರ್ಮ್ಸ್‌ ಸಂಗ್ರಹಿಸಿದ ಮೊತ್ತ

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.