ವಾಷಿಂಗ್ಟನ್ (ಪಿಟಿಐ): ತೀವ್ರ ಕುತೂಹಲ ಕೆರಳಿಸಿದ್ದ ಅಂತರರಾಷ್ಟ್ರೀಯ ಹಣಕಾಸು ನಿಧಿಗೆ (ಐಎಂಎಫ್) ಮೊಟ್ಟ ಮೊದಲ ಮಹಿಳಾ ಮುಖ್ಯಸ್ಥೆಯಾಗಿ ಫ್ರಾನ್ಸ್‌ನ ಹಣಕಾಸು ಸಚಿವೆ ಕ್ರಿಸ್ಟೀನ್ ಲಗಾರ್ಡ್ (57) ಆಯ್ಕೆಯಾಗಿದ್ದಾರೆ.
1944ರಲ್ಲಿ `ಐಎಂಎಫ್~ ಅಸ್ತಿತ್ವಕ್ಕೆ ಬಂದ ನಂತರ ಮುಖ್ಯಸ್ಥರಾಗಿ ಆಯ್ಕೆಯಾಗುತ್ತಿರುವ ಮೊದಲ ಮಹಿಳೆ ಲಗಾರ್ಡ್. ಮೆಕ್ಸಿಕನ್ ಸೆಂಟ್ರಲ್ ಬ್ಯಾಂಕಿನ ಗವರ್ನರ್ ಅಗಸ್ಟಿನ್ ಕ್ರಿಸ್ಟೀನ್ಸ್ ಕೂಡ ಅಂತಿಮ ಸ್ಪರ್ಧಾ ಕಣದಲ್ಲಿದ್ದರು. ಆದರೆ, 24 ಸದಸ್ಯರನ್ನೊಳಗೊಂಡ `ಐಎಂಎಫ್~ ಕಾರ್ಯಕಾರಿ ಮಂಡಳಿ ಅಂತಿಮವಾಗಿ ಲಗಾರ್ಡ್ ಅವರನ್ನು ಆಯ್ಕೆ ಮಾಡಿತು. ಲಗಾರ್ಡ್ ಅವರ ಐದು ವರ್ಷಗಳ ಅವಧಿ ಜುಲೈ 5ರಿಂದ ಪ್ರಾರಂಭವಾಗಲಿದೆ.
ಲೈಂಗಿಕ ಆರೋಪದ ಹಿನ್ನೆಲೆಯಲ್ಲಿ ಡೊಮಿನಿಕ್ ಸ್ಟ್ರಾಸ್ ಕಾನ್ `ಐಎಂಎಫ್~ಮುಖ್ಯಸ್ಥ ಹುದ್ದೆಗೆ ಇತ್ತೀಚೆಗೆ ರಾಜೀನಾಮೆ ನೀಡಿದ್ದರು. ಈ ಬಾರಿ ಯೂರೋಪ್ ಹೊರಗಿನವರಲ್ಲಿ ಒಬ್ಬರು `ಐಎಂಎಫ್~ ಮುಖ್ಯಸ್ಥರಾಗಬೇಕು ಎನ್ನುವ ಬೇಡಿಕೆ (ಬ್ರೆಜಿಲ್, ರಷ್ಯಾ, ಚೀನಾ ಮತ್ತು ಭಾರತ) `ಬ್ರಿಕ್~ ದೇಶಗಳಿಂದ ವ್ಯಕ್ತವಾಗಿತ್ತು. ಆದರೆ, ಅನೇಕ ಕಾರಣಗಳಿಗೆ ಅಂತಿಮವಾಗಿ ಲಗಾರ್ಡ್ ಅವರನ್ನು ಆಯ್ಕೆ ಮಾಡಲಾಗಿದೆ. ಯೂರೋಪ್ ಬಿಕ್ಕಟ್ಟಿಗೆ ಸ್ಪಂದಿಸುವುದು ಲಗಾರ್ಡ್ ಮುಂದಿರುವ ತಕ್ಷಣದ ಸವಾಲು ಆಗಿದೆ. ಸದ್ಯಕ್ಕೆ `ಐಎಂಎಫ್~ 187 ಸದಸ್ಯ ದೇಶಗಳಿಗೆ ಸೇವೆ ಒದಗಿಸುತ್ತಿದೆ.
ಪ್ರಣವ್ ಅಭಿನಂದನೆ: ಫ್ರಾನ್ಸ್‌ನ ಹಣಕಾಸು ಸಚಿವೆ ಕ್ರಿಸ್ಟೀನ್ ಲಗಾರ್ಡ್ ಅವರು `ಐಎಂಎಫ್~ ಮುಖ್ಯಸ್ಥರಾಗಿ ಆಯ್ಕೆಯಾಗಿರುವುದಕ್ಕೆ ಕೇಂದ್ರ ಹಣಕಾಸು ಸಚಿವ ಪ್ರಣವ್ ಮುಖರ್ಜಿ ಅಭಿನಂದನೆ ವ್ಯಕ್ತಪಡಿಸಿದ್ದಾರೆ.
ಲಗಾರ್ಡ್ ಇತ್ತೀಚೆಗಷ್ಟೇ ಭಾರತಕ್ಕೆ ಭೇಟಿ ನೀಡಿ, `ಐಎಂಎಫ್~ ಮುಖ್ಯಸ್ಥ ಹುದ್ದೆ ಸ್ಪರ್ಧೆಗೆ ಬೆಂಬಲ ಕೋರಿದ್ದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.