ಬೆರಗಿನ ಬೆಳಕು: ಹೊಸ ದೇಶದಲ್ಲಿ ಹೊಸ ಪರೀಕ್ಷೆ

ಅವನ ಆಗಮನದ ವಿಷಯವನ್ನು ತಿಳಿದು ರಾಜ ಬ್ರಹ್ಮದತ್ತ ತಾನೇ ಸ್ವತ: ಅವನ ಸ್ವಾಗತ ಮಾಡಿ, ಆದರ ಸತ್ಕಾರದದೊಂದಿಗೆ ನಗರದಲ್ಲಿ ಕರೆತಂದ. ಆದರೆ ವಿಚಿತ್ರವೆಂದರೆ, ಹಿಂದೆ ತಾನೇ ಕೊಟ್ಟಿದ್ದ ಎಂಭತ್ತು ಹಳ್ಳಿಗಳ ಹೊರತಾಗಿ ಯಾವ ವಿಶೇಷ ಸ್ಥಾನವನ್ನು, ಮರ್ಯಾದೆಯನ್ನು ನೀಡಲಿಲ್ಲ. ಆದರೂ ಗೊಣಗದೆ ಮಹೋಷಧಕುಮಾರ ರಾಜನ ಸೇವೆಯಲ್ಲಿ ತೊಡಗಿದ. ಬ್ರಹ್ಮದತ್ತನ ರಾಜ್ಯದಲ್ಲಿ ಎಲ್ಲರೂ ಮಹೋಷಧಕುಮಾರನನ್ನು ಒಪ್ಪಿಕೊಂಡರೂ, ಪಟ್ಟದ ರಾಣಿ ನಂದಾದೇವಿಗೆ ಅಸಮಾಧಾನವಿತ್ತು. ವಿದೇಹರಾಜನ ಮಂತ್ರಿಯೊಬ್ಬ ತಮ್ಮ ನಾಡಿಗೆ ಬಂದು ತಮ್ಮ ರಾಜನನ್ನು, ಮಂತ್ರಿಗಳನ್ನು ಮತ್ತು ಸೈನ್ಯವನ್ನು ಮೋಸಗೊಳಿಸಿ ತಮ್ಮನ್ನು ವಿದೇಹಕ್ಕೆ ಕರೆದೊಯ್ದದು ಆಕೆಗೆ ತುಂಬ ಅಪಮಾನಕರವಾಗಿತ್ತು. ತನ್ನ ಮಗಳು ಪಂಚಾಲಚಂಡಿ ಪ್ರಬಲದೇಶದ ರಾಜನನ್ನು ಮದುವೆಯಾದದ್ದು ಸಂತೋಷವೇ ಆದರೂ ಈ ರೀತಿ ಕಪಟದಿಂದ ಕದ್ದುಕೊಂಡು ಹೋದದ್ದು ಒಪ್ಪತಕ್ಕದ್ದಲ್ಲ ಎಂಬುದು ಆಕೆಯ ಮತ. ಹೀಗಾಗಿ ತನ್ನ ಗಂಡ ಬ್ರಹ್ಮದತ್ತ ಅವನಿಗೆ ಅಷ್ಟು ಮರ್ಯಾದೆ ಕೊಟ್ಟದ್ದು ಸರಿ ಎನ್ನಿಸಿರಲಿಲ್ಲ. ಕುಮಾರ ನಿಜವಾಗಿಯೂ ಬುದ್ಧಿವಂತನೇ ಅಥವಾ ಅದೊಂದು ಘಟನೆ ಆಕಸ್ಮಿಕವೇ ಎಂಬುದನ್ನು ಆಕೆ ತಿಳಿಯಬೇಕಿತ್ತು. ಆದ್ದರಿಂದ ರಾಣಿ ನಂದಾದೇವಿ ಸಾಮಾನ್ಯವಾಗಿ ರಾಜನ ಹತ್ತಿರವೇ ಇರುವ, ಐದು ಜನ ದಾಸಿಯರನ್ನು ಕರೆದು, ಮಾತನಾಡಿಸಿ, ಸಾಧ್ಯವಿದ್ದಾಗಲೆಲ್ಲ ಮಹೋಷಧಕುಮಾರನ ಬಗ್ಗೆ ಸಂಶಯ ಬರುವಂಥ ಮಾತುಗಳನ್ನು ಆಡಲು ಪ್ರೇರೇಪಿಸಿದ್ದಳು. ಅವರೂ ಅವಕಾಶಕ್ಕಾಗಿ ಕಾಯುತ್ತಿದ್ದರು. ಈ ಸಮಯದಲ್ಲಿ ಭೇರಿ ಎಂಬ ಪರಿವ್ರಾಜಿಕೆ ಅರಮನೆಯಲ್ಲಿ ನೆಲೆಸಲು ಬಂದಳು. ಆಕೆ ಮಹಾಸಾಧಕಿ, ಪಂಡಿತೆ ಹಾಗೂ ಭಾರೀ ಶಾಸ್ತ್ರವಿದೆಯಾಗಿದ್ದಳು. ರಾಣಿ ನಂದಾದೇವಿ ಆ ಪರಿವ್ರಾಜಿಕೆಯನ್ನು ಕಂಡು ಮಹೋಷಧಕುಮಾರನನ್ನು ಪರೀಕ್ಷಿಸಲು ಹೇಳಿದಳು. ದೇಶ ಬಿಟ್ಟು ಬೇರೆ ರಾಜನ ಬಳಿಗೆ ಬಂದರೂ ತನ್ನ ಪರೀಕ್ಷೆ ಮಾತ್ರ ತಪ್ಪಲಿಲ್ಲ ಎಂದು ಚಿಂತಿಸಿದ ಕುಮಾರ. ಯಾವುದೇ ಪರೀಕ್ಷೆಗೂ ಸಿದ್ಧನಾಗಲು ತೀರ್ಮಾನಿಸಿದ.