ಕೋವಿಡ್‌ನಿಂದ ಮೃತಪಡುತ್ತಿರುವವರ ಸಂಖ್ಯೆ ಹೆಚ್ಚಾಗುತ್ತಿರುವಂತೆ, ತಾಲ್ಲೂಕು ಆಡಳಿತದಿಂದ ಪ್ರತಿದಿನ ಮಾಧ್ಯಮಗಳಿಗೆ ಬಿಡುಗಡೆ ಮಾಡುತ್ತಿದ್ದ ಕೋವಿಡ್‌-19 ಅಂಕಿಅಂಶಗಳ ಹೆಲ್ತ್‌ ಬುಲೆಟಿನ್‌ನಲ್ಲಿ ಅ.7ರಿಂದ ಈಚೆಗೆ ಮೃತರ ಸಂಖ್ಯೆ ಕಣ್ಮರೆಯಾಗಿದೆ. ಅ.7ರ ಅಂಕಿಅಂಶದಂತೆ ತಾಲ್ಲೂಕಿನಲ್ಲಿ ಕೋವಿಡ್‌ನಿಂದ ಮೃತಪಟ್ಟವರ ಸಂಖ್ಯೆ 93 ಆಗಿತ್ತು. ತಾಲ್ಲೂಕು ಆಡಳಿತ ಬಿಡುಗಡೆ ಮಾಡಿರುವ ಹೆಲ್ತ್‌ ಬುಲೆಟಿನ್‌ ಪ್ರಕಾರ 23 ಜನರಿಗೆ ಕೋವಿಡ್‌-19 ದೃಢಪಟ್ಟಿದೆ. ಒಟ್ಟು ಸೋಂಕಿತರ ಸಂಖ್ಯೆ 3,540. ಈ ಪೈಕಿ 2,901 ಜನ ಗುಣಮುಖರಾಗಿದ್ದಾರೆ. ಅ.7ರಿಂದ ಮೃತರ ಸಂಖ್ಯೆ ನೀಡಿಲ್ಲವಾದರೂ ಗುಣಮುಖರಾಗಿರುವ ಹಾಗೂ ಸೋಂಕು ದೃಢಪಟ್ಟಿರುವ ಅಂಕಿಅಂಶ ಸೂಕ್ಷ್ಮವಾಗಿ ಗಮನಿಸಿದರೆ ಮೃತರ ಸಂಖ್ಯೆ ಸುಮಾರು 130ಕ್ಕೆ ಏರಿಕೆಯಾಗಿರುವುದು ಕಂಡುಬರುತ್ತಿದೆ.
