ದೊಡ್ಡಬಳ್ಳಾಪುರ: ತಾಲ್ಲೂಕಿನ ಚಿಕ್ಕನಹಳ್ಳಿಯಲ್ಲಿ ಶನಿವಾರ ಬಿಸಿಲಿನ ಬೇಗೆಯ ನಡುವೆ ಜಾನುವಾರುಗಳಿಗೆ ಖರೀದಿಸಿ ಬಣವೇ ಹಾಕಲಾಗಿದ್ದ ಒಣ ಮೇವಿಗೆ ಆಕಸ್ಮಿಕವಾಗಿ ಬೆಂಕಿ ಬಿದ್ದ ಸಾವಿರ ರೂಪಾಯಿ ಮೌಲ್ಯದ ಮೇವು ಸುಟ್ಟು ಭಸ್ಮವಾಗಿದೆ.
ಚಿಕ್ಕನಹಳ್ಳಿ ಗ್ರಾಮದ ಮುನಿರಾಜು ಎಂಬುವವರು ವಾರದ ಹಿಂದೆಯಷ್ಟೇ ಒಂದು ಹುಲ್ಲಿನ ಪೆಂಡಿಗೆ ₹300 ಗಳಂತೆ ಕೊಟ್ಟು ಹುಲ್ಲು ತಂದು ಬಣವೇ ಹಾಕಿದ್ದರು. ಆದರೆ ಶನಿವಾರ ಬಿಸಿಲಿನ ತೀವ್ರತೆಯ ಜೊತೆ ಆಕಸ್ಮಿಕ ತಗುಲಿದ ಬೆಂಕಿ ಬಣವೇ ಸಂಪೂರ್ಣ ಸುಟ್ಟು ಹೋಗಿದ್ದು, ಸಾವಿರಾರು ರೂಪಾಯಿ ನಷ್ಟವಾಗಿದೆ ಎಂದು ಸ್ಥಳೀಯರು ತಿಳಿಸಿದ್ದಾರೆ.
ತೀವ್ರವಾದ ಬರದ ಹಿನ್ನೆಲೆಯಲ್ಲಿ ರಾಜ್ಯ ಸರ್ಕಾರ ಮೇವಿನ ಬ್ಯಾಂಕ್ ಸ್ಥಾಪನೆ ಮುಂತಾದ ಬರ ನಿರ್ವಹಣೆ ಕುರಿತು ಅನೇಕ ಘೋಷಣೆ ಮಾಡಿದೆ. ಆದರೆ ತಾಲ್ಲೂಕಿನಲ್ಲಿ ಬರ ನಿರ್ವಹಣೆ ಕುರಿತು ಯಾವುದೇ ಕ್ರಮವನ್ನು ತಾಲ್ಲೂಕು ಆಡಳಿತ ಮಾಡುತ್ತಿಲ್ಲ ಎಂದು ರೈತರು ತೀವ್ರ ಅಸಮಧಾನ ವ್ಯಕ್ತಪಡಿಸಿದ್ದಾರೆ.
