ದೇವನಹಳ್ಳಿ: ಸಮುದಾಯ ಭವನದಲ್ಲಿ ಕಸ ಸಂಗ್ರಹ!

ಸಮುದಾಯದ ಬಳಕೆಗೆ ಉಪಯೋಗವಾಗಬೇಕಿದ್ದ ಭವನವನ್ನು, ದುರಸ್ತಿ ಮಾಡಿ ಸಾರ್ವಜನಿಕ ಉಪಯೋಗಕ್ಕೆ ವಿನಿಯೋಗಿಸುವ ಬದಲು ಗ್ರಾ.ಪಂ ವ್ಯಾಪ್ತಿಯಲ್ಲಿ ಉತ್ಪತ್ತಿಯಾಗುವ ತ್ಯಾಜ್ಯವನ್ನು ವಿಲೇವಾರಿ ಮಾಡಲು ಬಳಕೆ ಮಾಡುತ್ತಿರುವುದು ಸರಿಯಲ್ಲ ಎಂದು ಸೋಲೂರಿನ ಮಧು ದೂರಿದ್ದಾರೆ.

2008ರಲ್ಲಿ ₹10 ಲಕ್ಷ ರೂಪಾಯಿ ವೆಚ್ಚದಲ್ಲಿ ಸಮುದಾಯ ಭವನ ನಿರ್ಮಾಣವಾಗಿದ್ದು, ಅದನ್ನು ಸೂಕ್ತವಾಗಿ ನಿರ್ವಹಣೆ ಮಾಡದೇ ಸಿಬ್ಬಂದಿ ವರ್ಗ ನಿರ್ಲಕ್ಷ್ಯತೆಯಿಂದಾಗಿ ಪಾಳು ಬಿದ್ದಿದ್ದ ಪರಿಸ್ಥಿತಿಗೆ ತಲುಪಿದೆ. ಇದರಲ್ಲಿ ಸ್ವ ಉದ್ಯೋಗ ಘಟಕ, ತರಬೇತಿ ಕೇಂದ್ರಗಳನ್ನು ಸ್ಥಾಪನೆ ಮಾಡಿ ಸಮುದಾಯಕ್ಕೆ ಉಪಯೋಗಿಸಬೇಕು' ಎಂದು ಆಗ್ರಹಿಸಿದ್ದಾರೆ.

ಈಗಾಗಲೇ ಬ್ಯಾಡರಹಲ್ಲಿ ಸಮೀಪ ನೂತನ ಘನ ತ್ಯಾಜ್ಯ ವಿಲೇವಾರಿ ಘಟಕವೂ ನಿರ್ಮಾಣವಾಗಿದ್ದರೂ ವಿಶ್ವನಾಥಪುರ ಗ್ರಾ.ಪಂ ಮಾತ್ರ ಸಮುದಾಯ ಭವನದಲ್ಲಿ ತಾತ್ಕಲಿಕವಾಗಿ ಕಸ ವಿಲೇವಾರಿ ಮಾಡುತ್ತಿದ್ದಾರೆ. ಶಿಥಿಲಗೊಂಡಿರುವ ಭವನವನ್ನು ದುರಸ್ತಿ ಮಾಡಿ ಸದುಪಯೋಗ ಪಡಿಸಿಕೊಳ್ಳಲು ಚಿಂತನೆ ಮಾಡಬೇಕಿದೆ ಎಂದು ಸ್ಥಳೀಯರು ಆಗ್ರಹಿಸಿದ್ದಾರೆ.