ಚಿಕ್ಕೋಡಿ: ಆಧುನಿಕ ಜೀವನ ಶೈಲಿಯಿಂದಾಗಿ ಗುಜರಿ ಅಂಗಡಿ ಸೇರುತ್ತಿರುವ ಪುರಾತನ ಗೃಹೋಪಯೋಗಿ ಮತ್ತು ಕೃಷಿ ಪರಿಕರಗಳನ್ನು ಯಕ್ಸಂಬಾದಲ್ಲಿ ನಡೆಯುತ್ತಿರುವ ಜೊಲ್ಲೆ ಉದ್ಯೋಗ ಸಮೂಹ ಸಂಸ್ಥೆಯ ಹಮ್ಮಿಕೊಂಡಿರುವ ಪ್ರೇರಣಾ ಉತ್ಸವದಲ್ಲಿ ಪ್ರದರ್ಶಿಸಲಾಗಿದ್ದು ಇವು ಜನರ ಗಮನ ಸೆಳೆಯುತ್ತಿವೆ.
ಕಟ್ಟಿಗೆಯ ತೊಟ್ಟಿಲು, ಹಿರಿಯರು ಧಾನ್ಯ ಅಳೆಯಲು ಬಳಸುತ್ತಿದ್ದ ಚಿಟ್ಟಿ, ನಿಟವಿಗಳು, ತಾಂಬೂಲ ಡಬ್ಬಿ, ಪುರಾತನ ಪ್ರಸಾಧನ ಸಾಮಗ್ರಿಗಳು, ಹಳೆಯ ಕಾಲದ ಪಾತ್ರೆಗಳು, ಮಣ್ಣಿನ ಮಡಿಕೆಗಳ ಅಡಕಲ್ಲು, ಕತ್ತಿ ಗುರಾಣಿಗಳು, ಕೂರಿಗೆ–ಖುರೂಪಿಗಳಾದಿ ಕೃಷಿ ಪರಿಕರಗಳು ವಸ್ತು ಪ್ರದರ್ಶನದಲ್ಲಿ ಇವೆ.
ಇಂದಿನ ದಿನಗಳಲ್ಲಿ ಮನೆ ತುಂಬ ಪ್ಲಾಸ್ಟಿಕ್ ವಸ್ತುಗಳು, ಯಂತ್ರಗಳು ತುಂಬಿಕೊಂಡಿವೆ. ಹಿರಿಯರು ಬಳಸುತ್ತಿದ್ದ ರುಬ್ಬು ಕಲ್ಲಿನ ಸ್ಥಾನವನ್ನು ಗ್ರೈಂಡರ್ ಆಕ್ರಮಿಸಿಕೊಂಡಿದೆ. ಚಿಟ್ಟಿ, ನಿಟವಿಗಳು ಕಣ್ಮರೆಯಾಗಿವೆ. ಕೌದಿಗಳ ಜಾಗದಲ್ಲಿ ರಂಗುರಂಗಿನ ರಗ್ಗುಗಳು ಬಂದಿವೆ. ಇಂತಹ ಅಪರೂಪದ ಹಳೆಯ ವಸ್ತುಗಳನ್ನು ಸಮುದಾಯಕ್ಕೆ, ಅದರಲ್ಲೂ ವಿದ್ಯಾರ್ಥಿಗಳಿಗೆ ಪರಿಚಯಿಸುವ ಪ್ರಯತ್ನವೇ ಈ ವಸ್ತು ಪ್ರದರ್ಶನ.
ಹಳೆಯ ಪೇಪರ್, ಐಸ್ಕ್ರೀಮ್ ಕಡ್ಡಿ, ಪ್ಲಾಸ್ಟಿಕ್ ಶೀಟ್ ಸೇರಿದಂತೆ ವಿವಿಧ ವಸ್ತುಗಳನ್ನು ಬಳಸಿಕೊಂಡು ರಚಿಸಿರುವ ಅಂದವಾದ ಕಲಾಕೃತಿಗಳು, ತಮ್ಮ ಕಲ್ಪನೆಗೆ ಕುಂಚದಿಂದ ರೂಪದ ನೀಡಿದ ಚಿತ್ರಕೃತಿಗಳು, ವಿಜ್ಞಾನ ಮಾದರಿಗಳು ಉತ್ಸವದ ಆಕರ್ಷಣೆಗಳಾಗಿವೆ.
ವಸ್ತು ಪ್ರದರ್ಶನ ವೀಕ್ಷಿಸಲು ಬರುವ ಹಿರಿಯರು ತಾವು ಬಳಸುತ್ತಿದ್ದ ವಸ್ತುಗಳನ್ನು ಕಂಡು ಹಳೆಯ ನೆನಪುಗಳಿಗೆ ಜಾರಿದರೆ, ಮಕ್ಕಳು ಈ ವಸ್ತುಗಳು ಏನೆಂದು ತಿಳಿಯದೇ ಇತರರಿಂದ ವಿವರಣೆ ಪಡೆಯುತ್ತಿದ್ದ ದೃಶ್ಯ ಸಾಮಾನ್ಯವಾಗಿತ್ತು.
‘ನಮ್ಮ ಹೊಲ್ಲಾ ಉಳುಮಿ ಮಾಡಾಕ್ ಈಗ ಟ್ರ್ಯಾಕ್ಟರ್ ಬಳಸ್ತಾರ, ನಾವು ಕಟ್ಟಿಗೆ ಕೂರಿಗಿನ್ ನೋಡಿದ್ದಿಲ್ರೀ, ಇಲ್ಲಿ ಕೂರಿಗೆ, ಖೂರೂಪಿ ನೋಡಿ ಖುಷಿಯಾಯ್ತು, ಹಿತ್ತಾಳೆ ಪಾತ್ರೆಗಳು, ಮಣ್ಣಿನ ಮಡಿಕೆಗಳು, ಕಟ್ಟಿಗೆಯ ರವಿಗೆ, ಕೊಡಮಣಿಗೆ (ರೊಟ್ಟಿ ತಟ್ಟುವ ಪಾತ್ರೆ) ಕಂಡರೆ ಹಳೇ ಕಾಲದ ಜನರ ಜೀವನಶೈಲಿ ಅರ್ಥ ಆಗತೈತೀ ನೋಡ್ರಿ..’ ಎಂದು ವಿದ್ಯಾರ್ಥಿಗಳು ಹೇಳುತ್ತಿದ್ದರು. ಜೊಲ್ಲೆ ಉದ್ಯೋಗ ಸಮೂಹದ ವತಿಯಿಂದ ನಡೆಯುತ್ತಿರುವ ಈ ವಸ್ತು ಪ್ರದರ್ಶನ ಇದೇ 28 ವರೆಗೆ ನಡೆಯಲಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.