ಈಜಿಪುರ ಮೇಲ್ಸೇತುವೆ: ಕಾಮಗಾರಿಗೆ ಹಲವು ವಿಘ್ನ

ಬೆಂಗಳೂರು: ಒಂಬತ್ತು ವರ್ಷಗಳ ಹಿಂದೆ ರೂಪುಗೊಂಡಿದ್ದ ಈಜಿಪುರ ಎಲಿವೇಟೆಡ್‌ ಕಾರಿಡಾರ್‌ ಯೋಜನೆ ಕಾಮಗಾರಿಯ ಪುನರಾರಂಭಕ್ಕೆ ಹಲವು ವಿಘ್ನಗಳು ಎದುರಾಗಿವೆ.

ಮೇಲ್ಸೇತುವೆ ಪೂರ್ಣಗೊಳಿಸುವ ಕಾಮಗಾರಿಗೆ ಶುಕ್ರವಾರ ಚಾಲನೆ ದೊರೆತಿದೆ. ಆದರೆ, ಐಐಎಸ್‌ಸಿ ತಾಂತ್ರಿಕ ವರದಿ, ಭೂಸ್ವಾಧೀನ ಪ್ರಕ್ರಿಯೆ ವಿಳಂಬ, ಮರಗಳ ತೆರವಿಗೆ ತಡೆಯಂತಹ ಹಲವು ಅಡೆ–ತಡೆಗಳು ಮೊದಲ ದಿನದಿಂದಲೇ ಕಾಡಲಾರಂಭಿಸಿವೆ.

ಎರಡು ವರ್ಷಗಳಿಂದ ಕಾಮಗಾರಿ ಸ್ಥಗಿತಗೊಂಡಿದ್ದು, ಅದನ್ನು ಯಾವ ರೀತಿಯಲ್ಲಿ ಮುಂದುವರಿಸಬೇಕು. ಯಾವ ಮುನ್ನೆಚ್ಚರಿಕೆ ಕ್ರಮ ಅಥವಾ ತಂತ್ರಜ್ಞಾನ ಅಳವಡಿಸಿಕೊಳ್ಳಬೇಕು ಎಂಬ ತಾಂತ್ರಿಕ ವರದಿಯನ್ನು ಭಾರತೀಯ ವಿಜ್ಞಾನ ಸಂಸ್ಥೆ (ಐಐಎಸ್ಸಿ) ನೀಡಬೇಕಿದೆ. ಈ ವರದಿ ಲಭ್ಯವಾಗಲು ಎರಡು ತಿಂಗಳಾಗಲಿದೆ. ವರದಿ ಬಂದ ನಂತರವಷ್ಟೇ ಮೂಲ ಕಾಮಗಾರಿ ಆರಂಭವಾಗಲಿದೆ.

ಇನ್ನು ಕೇಂದ್ರೀಯ ಸದನ, ಸೇಂಟ್‌ ಜಾನ್ಸ್‌ ಆಸ್ಪತ್ರೆ, ಜಲಮಂಡಳಿಯ ಕಟ್ಟಡಗಳು ಸೇರಿದಂತೆ ಖಾಸಗಿ ಕಟ್ಟಡಗಳ ಭೂಸ್ವಾಧೀನ ಪ್ರಕ್ರಿಯೆ ಇನ್ನೂ ಮುಗಿದಿಲ್ಲ. ಕಟ್ಟಡ ಹಾಗೂ ಕಾಂಪೌಂಡ್‌ಗಳ ಮೇಲೆ ಅಗತ್ಯವಿರುವ ಭೂಮಿಯ ಗುರುತು ಹಾಕಲಾಗಿದೆ. ಆದರೆ, ಅದನ್ನು ಸ್ವಾಧೀನಪಡಿಸಿಕೊಳ್ಳುವ ಪ್ರಕ್ರಿಯೆ ಮತ್ತೆ ಶುರುವಾಗಬೇಕಿದೆ.

‘ಭೂಸ್ವಾಧೀನಕ್ಕೆ ಸಂಬಂಧಿಸಿದಂತೆ ಈ ಹಿಂದೆ ಮಾಲೀಕರೊಂದಿಗೆ ಮಾತುಕತೆ ನಡೆಸಲಾಗಿದೆ. ಎಲ್ಲರೂ ನಗದನ್ನು ಬಯಸಿದ್ದರು. ಈಗ ಮತ್ತೆ ಮಾತುಕತೆ ನಡೆಸಿ ಎಲ್ಲವನ್ನೂ ಅಂತಿಮಗೊಳಿಸಬೇಕಿದೆ. ಸರ್ವೆ ಕಾರ್ಯವನ್ನೂ ನಡೆಸಬೇಕಿದೆ. ಇದಕ್ಕೆಲ್ಲ ಸಿದ್ಧತೆ ಮಾಡಿಕೊಳ್ಳಲಾಗಿದೆ’ ಎಂದು ಬಿಬಿಎಂಪಿ ಯೋಜನೆ ವಿಭಾಗದ ಕಾರ್ಯಪಾಲಕ ಎಂಜಿನಿಯರ್‌ ಯೋಗೇಶ್‌ ತಿಳಿಸಿದರು.

‘ಸರ್ವೆ ಕೈಗೊಂಡು, ಸರ್ಕಾರಿ ಸಂಸ್ಥೆಗಳೊಂದಿಗೆ ಉನ್ನತಮಟ್ಟದ ಸಭೆ ನಡೆಸಿ ಪರಿಹಾರವನ್ನು ನಿರ್ಧರಿಸಲಾಗುತ್ತದೆ. ಖಾಸಗಿಯವರೊಂದಿಗೂ ಮಾತುಕತೆ ನಡೆಸಲಾಗುತ್ತದೆ. ಇದೆಲ್ಲವೂ ಮುಗಿಯಲು ಎರಡು–ಮೂರು ತಿಂಗಳು ಬೇಕು’ ಎಂದರು.

‘ಮರಗಳನ್ನು ತೆರವು ಮಾಡದೆ ಮೇಲ್ಸೇತುವೆ ನಿರ್ಮಿಸಲು ಸಾಧ್ಯವಾಗುತ್ತಿಲ್ಲ. ಈ ಬಗ್ಗೆ ಸಭೆ ನಡೆಸಿಯೇ ಅಂತಿಮ ನಿರ್ಧಾರ ಕೈಗೊಳ್ಳಲಾಗಿತ್ತು. ಅರಣ್ಯ ವಿಭಾಗದೊಂದಿಗೆ ಚರ್ಚಿಸಿ, ಕಾನೂನು ಕೋಶದ ಸಲಹೆ ಮೇರೆಗೆ ಮುಂದುವರಿಯಲಾಗುತ್ತದೆ’ ಎಂದು ಹೇಳಿದರು.

‘ಮೇಲ್ಸೇತುವೆಯ ಎಲ್ಲ ಕೆಲಸಗಳನ್ನೂ ಆರಂಭಿಸಲು ಇನ್ನೂ ಮುರ್ನಾಲ್ಕು ತಿಂಗಳು ಬೇಕು. ಪ್ಲಾಂಟ್‌ನಲ್ಲಿ ಪ್ರಾಥಮಿಕ ಕೆಲಸ ಹಾಗೂ ದೊಮ್ಮಲೂರು ಭಾಗದಲ್ಲಿ ರ್‍ಯಾಂಪ್‌ ಕಾಮಗಾರಿಯನ್ನು ಆರಂಭಿಸಿದ್ದೇವೆ. ಇಲ್ಲೂ ಮರಗಳು ತೆರವಾದರೆ ಮಾತ್ರ ಕೆಲಸವಾಗುತ್ತದೆ’ ಎಂದು ಗುತ್ತಿಗೆದಾರರ ಯೋಜನೆ ವ್ಯವಸ್ಥಾಪಕ ಸುರೇಶ್ ತಿಳಿಸಿದರು.