ಬೆಂಗಳೂರು: ಜಾಮೀನು ಷರತ್ತು ಪೂರೈಸಲು ಠಾಣೆಗೆ ಬಂದ ಮಹಿಳಾ ಆರೋಪಿಗೆ ‘ಸ್ಲೇಟ್ ಹಿಡಿದು ಫೋಟೊ ತೆಗೆಸಿಕೊಳ್ಳಬೇಕು’ ಎಂದು ಒತ್ತಾಯಿಸಿದ್ದ ಪೊಲೀಸರ ಕ್ರಮವನ್ನು ಹೈಕೋರ್ಟ್ ರದ್ದುಪಡಿಸಿದೆ.
‘ಸ್ಲೇಟ್ ಹಿಡಿದು ಫೋಟೊ ತೆಗೆಸಿಕೊಳ್ಳುವಂತೆ ಅರ್ಜಿದಾರ ಮಹಿಳೆಗೆ ಒತ್ತಾಯಿಸಬಾರದು. ಗುರುತು ಪತ್ತೆಗಾಗಿ ಆಕೆಯ ಆಧಾರ್ ಕಾರ್ಡ್ ಸ್ವೀಕರಿಸಬೇಕು. ಅಧೀನ ನ್ಯಾಯಾಲಯದ ನಿರ್ದೇಶನದಂತೆ ಆಕೆ ನೀಡುವ ಒಬ್ಬರ ಭದ್ರತಾ ಖಾತ್ರಿ ಒಪ್ಪಿಕೊಳ್ಳಬೇಕು’ ಎಂದು ನ್ಯಾಯಮೂರ್ತಿ ಅಲೋಕ್ ಅರಾಧೆ ಅವರಿದ್ದ ಏಕಸದಸ್ಯ ಪೀಠ ನಿರ್ದೇಶಿಸಿದೆ.
ಪ್ರಕರಣವೊಂದರ ಆರೋಪಿ ಮಹಿಳೆಗೆ ಹೆಚ್ಚುವರಿ ಸೆಷನ್ಸ್ ನ್ಯಾಯಾಲಯ ಜಾಮೀನು ನೀಡಿತ್ತು. ವೈಯಕ್ತಿಕ ಬಾಂಡ್, ಒಬ್ಬರ ಭದ್ರತಾ ಖಾತ್ರಿ, ಗುರುತು ಪತ್ತೆಗೆ ಆಧಾರ್ ಕಾರ್ಡ್ ನೀಡಲು ಷರತ್ತು ವಿಧಿಸಿತ್ತು.