ಗುರುವಾರ , ಸೆಪ್ಟೆಂಬರ್ 23, 2021
27 °C
ಐಐಎಸ್ಸಿ ಮೇಲೆ ಉಗ್ರರ ದಾಳಿ ಪ್ರಕರಣ; ಶಂಕಿತನ ಅರ್ಜಿ ತಿರಸ್ಕರಿಸಿದ ನ್ಯಾಯಾಲಯ

ವಿಜ್ಞಾನಿ ಕೊಂದವನಿಗೆ ಆಶ್ರಯ ನೀಡಿದ್ದ ಹಬೀಬ್!

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Deccan Herald

ಬೆಂಗಳೂರು: ನಗರದ ಭಾರತೀಯ ವಿಜ್ಞಾನ ಸಂಸ್ಥೆ (ಐಐಎಸ್ಸಿ) ಮೇಲೆ ನಡೆದಿದ್ದ ಉಗ್ರರ ದಾಳಿ ಪ್ರಕರಣದಿಂದ ತನ್ನನ್ನು ಕೈಬಿಡುವಂತೆ ಕೋರಿ ಆರೋಪಿ ಮೊಹಮ್ಮದ್ ಹಬೀಬ್ ಮಿಯಾ ಸಲ್ಲಿಸಿದ್ದ ಅರ್ಜಿಯನ್ನು ವಿಶೇಷ ನ್ಯಾಯಾಲಯವು ಗುರುವಾರ ತಿರಸ್ಕರಿಸಿದೆ.

‘ಪ್ರಕರಣದಲ್ಲಿ ನನ್ನ ಪಾತ್ರವಿಲ್ಲ. ನಾನು ಜೈಲಿನಲ್ಲಿರುವುದರಿಂದ ಕುಟುಂಬದವರು ಸಂಕಷ್ಟದಲ್ಲಿದ್ದಾರೆ. ಹೀಗಾಗಿ, ನನ್ನನ್ನು ಪ್ರಕರಣದಿಂದ ಮುಕ್ತಗೊಳಿಸಿ’ ಎಂದು ಅರ್ಜಿಯಲ್ಲಿ ಆರೋಪಿ ಕೋರಿದ್ದ. 

ಅದಕ್ಕೆ ಆಕ್ಷೇಪಣೆ ಸಲ್ಲಿಸಿದ್ದ ಪಬ್ಲಿಕ್ ಪ್ರಾಸಿಕ್ಯೂಟರ್‌ ಬಿ.ಎಸ್.ಪಾಟೀಲ, ‘ಲಷ್ಕರ್‌–ಎ–ತಯಬಾ (ಎಲ್‌ಇಟಿ) ಸಂಘಟನೆಯ ಸದಸ್ಯರು, ಎಕೆ–47 ಗನ್ ಹಾಗೂ ಗ್ರೆನೇಡ್ ಸಮೇತ 2005ರಲ್ಲಿ ಐಐಎಸ್ಸಿ ಮೇಲೆ ದಾಳಿ ಮಾಡಿದ್ದರು. ಪ್ರಮುಖ ಆರೋಪಿ ನೂರುಲ್ಲಾ ಖಾನ್ ಅಲಿಯಾಸ್ ಶಬಾವುದ್ದೀನ್‌, ಗಣಿತ ಪ್ರಾಧ್ಯಾಪಕ ಮನೀಷ್ ಚಂದ್ರಪುರಿ ಅವರನ್ನು ಹತ್ಯೆ ಮಾಡಿದ್ದ. ಘಟನೆಯಲ್ಲಿ ನಾಲ್ವರು ವಿಜ್ಞಾನಿಗಳು ಸಹ ಗಾಯಗೊಂಡಿದ್ದರು. ಇದು ಗಂಭೀರ ಪ್ರಕರಣ. ಆರೋಪಿ ಹಬೀಬ್‌ನನ್ನು ಖುಲಾಸೆಗೊಳಿಸಬಾರದು’ ಎಂದು ಕೋರಿದ್ದರು.

‘ಬಿಹಾರದ ಶಬಾವುದ್ದೀನ್‌, ಲಷ್ಕರ್‌–ಎ–ತಯಬಾ (ಎಲ್‌ಇಟಿ) ಸಂಘಟನೆ ಮುಖಂಡರನ್ನು ಭೇಟಿಯಾಗಲು ಆಗಾಗ ಬಾಂಗ್ಲಾದೇಶಕ್ಕೆ ಅಕ್ರಮವಾಗಿ ಹೋಗಿ ಬರುತ್ತಿದ್ದ. ಅಗರ್ತಲಾ ಬಳಿ ವಾಸವಿದ್ದ ಹಬೀಬ್, ಭಾರತದ ಗಡಿಯಲ್ಲಿ ಶಬಾವುದ್ದೀನ್‌ಗೆ ಆಶ್ರಯ ನೀಡಿದ್ದ. ಹಣ್ಣು ಸಾಗಣೆ ವಾಹನದಲ್ಲಿ ಶಬಾವುದ್ದೀನ್‌ನನ್ನು ಬಾಂಗ್ಲಾದೇಶಕ್ಕೆ ಕಳುಹಿಸಿ, ವಾಪಸ್‌ ಬರಲು ವ್ಯವಸ್ಥೆ ಮಾಡುತ್ತಿದ್ದ. ಅದಕ್ಕೆ ಸಂಬಂಧಪಟ್ಟ ಪುರಾವೆಗಳನ್ನು ತನಿಖಾಧಿಕಾರಿ ಸಂಗ್ರಹಿಸಿದ್ದಾರೆ’ ಎಂದಿದ್ದರು.

ಅವರ ವಾದ ಮನ್ನಿಸಿದ ನ್ಯಾಯಾಧೀಶ ಶಿವನಗೌಡ, ಆರೋಪಿಯ ಅರ್ಜಿಯನ್ನು ತಿರಸ್ಕರಿಸಿ ಆದೇಶ ಹೊರಡಿಸಿದರು.

ಲಖನೌ ಜೈಲಿನಲ್ಲಿ ಪ್ರಮುಖ ಆರೋಪಿ: ಸೇನೆ ಮೇಲೆ ದಾಳಿ ಮಾಡಿದ್ದ ಪ್ರಕರಣದಡಿ ಶಬಾವುದ್ದೀನ್‌ನನ್ನು ಸೆರೆ ಹಿಡಿದಿರುವ ಬಿಹಾರದ ಪೊಲೀಸರು ಆತನನ್ನು ಲಖನೌ ಜೈಲಿನಲ್ಲಿರಿಸಿದ್ದಾರೆ. ಐಐಎಸ್ಸಿ ದಾಳಿ ಪ್ರಕರಣದ ವಿಚಾರಣೆಗೆ ವಿಡಿಯೊ ಕಾನ್ಪರೆನ್ಸ್‌ ಮೂಲಕವೇ ಆತನನ್ನು ವಿಶೇಷ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಯಿತು.

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು