ಜನ ಸಾಮಾನ್ಯರ ಜೇಬಿಗೆ ಮತ್ತಷ್ಟು ಕತ್ತರಿ, ಆಕ್ರೋಶ

ದೂರದ ಊರಿಗೆ ಪ್ರಯಾಣಿಸುವಎಕ್ಸ್‌ಪ್ರೆಸ್‌ ಬಸ್‌ಗಳ ಟಿಕೆಟ್‌ ದರ ಗಣನೀಯವಾಗಿ ಹೆಚ್ಚಿದೆ.ಚಾಮರಾಜನಗರ, ಗುಂಡ್ಗುಪೇಟೆಗಳಿಂದ ಮೈಸೂರಿಗೆ ಹೋಗುವ ಎಕ್ಸ್‌ಪ್ರೆಸ್‌ ಬಸ್‌ಗಳ ದರ ₹8, ಯಳಂದೂರು–ಮೈಸೂರು ಮಾರ್ಗದಲ್ಲಿ ಸಂಚರಿಸುವ ಎಕ್ಸ್‌ಪ್ರೆಸ್‌ ಬಸ್‌ಗಳ ಟಿಕೆಟ್‌ ದರ ₹9, ಕೊಳ್ಳೇಗಾಲ–ಮೈಸೂರು ಮಾರ್ಗದ ದರ ₹6 ಹೆಚ್ಚಾಗಿದೆ. ಇದುವರೆಗೂ ಈ ಮಾರ್ಗಗಳಲ್ಲಿ ಟಿಕೆಟ್‌ ದರ ಕ್ರಮವಾಗಿ (ಟೋಲ್‌ ಶುಲ್ಕ ಸೇರಿ) ₹55, ₹54 ಮತ್ತು ₹59 ಇತ್ತು.

ಚಾಮರಾಜನಗರ ಹಾಗೂ ಗುಂಡ್ಲುಪೇಟೆ ಮೂಲಕ ಮೈಸೂರಿಗೆ ಹೋಗುವ ಅಂತರರಾಜ್ಯ ಬಸ್‌ ಟಿಕೆಟ್‌ ದರ ₹65ರಿಂದ ₹70ಕ್ಕೆ ಹೆಚ್ಚಿದೆ.

ಮಹದೇಶ್ವರ ಬೆಟ್ಟ ಹಾಗೂ ಮೈಸೂರು ನಡುವೆ ಸಂಚರಿಸುವವರು ಬುಧವಾರದಿಂದ ಟಿಕೆಟ್‌ಗೆ ₹155 ಪಾವತಿಸುತ್ತಿದ್ದಾರೆ. ಇದುವರೆಗೂ ಟಿಕೆಟ್‌ ದರ ₹134 ಇತ್ತು.ಕೊಳ್ಳೇಗಾಲ ಮತ್ತು ಬೆಂಗಳೂರು ಮಾರ್ಗದ ಪ್ರಯಾಣ ದರ ₹12 ಹೆಚ್ಚಾಗಿದೆ. ₹130 ಇದ್ದ ಟಿಕೆಟ್‌ ಬೆಲೆ ₹142 ಆಗಿದೆ.

ಉಳಿದಂತೆ ಚಾಮರಾಜನಗರ, ಕೊಳ್ಳೇಗಾಲ, ಗುಂಡ್ಲುಪೇಟೆ, ಯಳಂದೂರು, ಹನೂರು, ನಂಜನಗೂಡು ನಡುವೆ ಸಂಚರಿಸುವ ಎಕ್ಸ್‌ಪ್ರೆಸ್‌ ಬಸ್‌ಗಳ ದರ ₹3ರಿಂದ ₹5ವರೆಗೆ ಹೆಚ್ಚಾಗಿದೆ. ಸಾಮಾನ್ಯ ಬಸ್‌ ದರ ₹3ರಿಂದ ₹7ರವರೆಗೂ ಹೆಚ್ಚಾಗಿದೆ.

ಮತ್ತಷ್ಟು ಹೊರೆ:ಕೊಳ್ಳೇಗಾಲ ಕಲ್ಲಿಕೋಟೆ ನಡುವಿನ ರಾಷ್ಟ್ರೀಯ ಹೆದ್ದಾರಿ766ರಲ್ಲಿ ನಿರ್ಮಿಸಲಾಗಿರುವ ಮೂರು ಟೋಲ್‌ ಸಂಗ್ರಹ ಕೇಂದ್ರಗಳಲ್ಲಿ ಡಿಸೆಂಬರ್‌ 10ರಿಂದ ಟೋಲ್‌ ಸಂಗ್ರಹ ಆರಂಭವಾಗುತ್ತಿದ್ದಂತೆಯೇ, ಆ ಮೊತ್ತವನ್ನು ಪ್ರಯಾಣಿಕರಿಂದಲೇ ಪಡೆಯಲು ಕೆಎಸ್‌ಆರ್‌ಟಿಸಿ ನಿರ್ಧರಿಸಿತ್ತು. ಹಾಗಾಗಿ, ನಂಜನಗೂಡು ಮಾರ್ಗದಲ್ಲಿ ಸಂಚರಿಸುವ ಬಸ್‌ಗಳ ಟಿಕೆಟ್‌ ದರವನ್ನು ₹5 ಹಾಗೂ ತಿ.ನರಸೀಪುರ ಮಾರ್ಗದಲ್ಲಿ ಸಾಗುವ ಬಸ್‌ಗಳ ದರವನ್ನು ₹4 ಹೆಚ್ಚಿಸಲಾಗಿತ್ತು.

ಡಿಸೆಂಬರ್‌ 10ರಿಂದ ಪ್ರಯಾಣಿಕರು ಟಿಕೆಟ್‌ಗೆಹೆಚ್ಚುವರಿವಾಗಿ ₹5, ಈಗ ಮತ್ತೆ ‌ಪ್ರಯಾಣ ದರವನ್ನು ₹6–₹9ರವರೆಗೆ ಹೆಚ್ಚು ಮಾಡಿರುವುದು ಜನ ಸಾಮಾನ್ಯರಿಗೆ ಮತ್ತಷ್ಟು ಹೊರೆ ಆದಂತಾಗಿದೆ.

ಪ್ರಯಾಣಿಕರ ಆಕ್ರೋಶ:ಬುಧವಾರ ಬಹುತೇಕ ಬಸ್‌ಗಳಲ್ಲಿ ನಿರ್ವಾಹಕರು ಪ್ರಯಾಣಿಕರ ಆಕ್ರೋಶವನ್ನು ಎದುರಿಸಬೇಕಾಯಿತು.

ಮೈಸೂರು ಬಸ್‌ ಹತ್ತಿದ್ದ ರೈತರೊಬ್ಬರು, ₹63 ಟಿಕೆಟ್‌ ದರ ನೋಡಿ ನಿರ್ವಾಹಕರ ಮೇಲೆ ಕೋಪಗೊಂಡರು. ‘ರಾಜ್ಯದಾದ್ಯಂತ ಟಿಕೆಟ್‌ ದರ ಹೆಚ್ಚಾಗಿದೆ’ ಎಂದು ನಿರ್ವಾಹಕರು ಹೇಳಿದ್ದಕ್ಕೆ, ‘ನಮ್ಮ ಟೊಮೆಟೊ ಬೆಲೆ ಹೆಚ್ಚಾಗುವುದಿಲ್ಲ. ಅಷ್ಟೇ ಇದೆ. ನಿಮಗೆ ಸಂಬಳ ಕೊಡುವುದಕ್ಕೆ ನಮ್ಮ ಕೈಯಲ್ಲಿ ಯಾಕೆ ಹೆಚ್ಚು ದುಡ್ಡು ತೆಗೆದುಕೊಳ್ಳುತ್ತೀರಿ’ ಎಂದು ಆ ರೈತ ಅಸಮಾಧಾನ ವ್ಯಕ್ತಪಡಿಸಿದರು.

ಸ್ಟೇಜ್‌ ದರವೂ ಹೆಚ್ಚಳ: ‘ಗ್ರಾಮೀಣ ಪ್ರದೇಶಗಳಲ್ಲಿ ಸಂಚರಿಸುವ ಬಸ್‌ಗಳಲ್ಲಿ ಮೊದಲ ಮೂರು ಕಿ.ಮೀಗಳವೆರೆಗೆ (ಮೊದಲ ಸ್ಟೇಜ್‌) ಇದ್ದ ಪ್ರಯಾಣ ದರವನ್ನು ₹7 ರಿಂದ ₹5ಕ್ಕೆ ಇಳಿಸಲಾಗಿದೆ. ಉಳಿದಂತೆ ಎರಡನೇ ಹಂತದ ದರವನ್ನು ₹9ರಿಂದ ₹10ಕ್ಕೆ ಹೆಚ್ಚಿಸಲಾಗಿದೆ. ಮೂರನೇ ಹಂತದ ದರವನ್ನು ಬದಲಿಸಲಾಗಿಲ್ಲ. ₹15 ಅಷ್ಟೇ ಇದೆ’ ಎಂದು ಕೆಎಸ್‌ಆರ್‌ಟಿಸಿ ಚಾಮರಾಜನಗರ ವಿಭಾಗದ ಸಂಚಾರ ಅಧಿಕಾರಿ ಎಸ್‌.ಎಸ್‌.ಪರಮೇಶ್ವರಪ್ಪ ಅವರು ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಇದುವರೆಗೂ ಬಸ್‌ ಹತ್ತಿದ ಪ್ರಯಾಣಿಕರು ಮುಂದಿನ ನಿಲ್ದಾಣದಲ್ಲಿ ಇಳಿದರೂ ₹7 ಕೊಡಬೇಕಿತ್ತು. ಇನ್ನು ₹5 ನೀಡಿದರೆ ಸಾಕು’ ಎಂದು ಅವರು ಹೇಳಿದರು.

ರೈಲಿಗೆ ಬೇಡಿಕೆ ಹೆಚ್ಚುವ ನಿರೀಕ್ಷೆ

ಬಸ್‌ ದರ ಏರಿಕೆಯಾಗುತ್ತಿದ್ದಂತೆಯೇ ಚಾಮರಾಜನಗರದಿಂದ ಮೈಸೂರಿಗೆ ಪ್ರಯಾಣಿಸುವವರು ಇನ್ನು ಮುಂದೆ ರೈಲುಗಳನ್ನು ಬಳಸುವ ನಿರೀಕ್ಷೆ ಹೆಚ್ಚಾಗಿದೆ.

ಪ್ರಯಾಣಿಕರ ರೈಲಿಗೆ ಚಾಮರಾಜನಗರ–ಮೈಸೂರು ನಡುವೆ ₹20 ಟಿಕೆಟ್‌ ದರವಿದೆ. ಎಕ್ಸ್‌ಪ್ರೆಸ್‌ಗಾದರೆ ₹40 ಪಾವತಿಸಬೇಕು.

ತಿರುಪತಿ ಎಕ್ಸ್‌ಪ್ರೆಸ್‌ ಸೇರಿದಂತೆ ದಿನಂಪ್ರತಿ ಐದು ರೈಲುಗಳು ಚಾಮರಾಜನಗರ–ಮೈಸೂರು ನಡುವೆ ಓಡಾಡುತ್ತವೆ. ಬೆಳಿಗ್ಗೆ 7.15, 10.40, ಮ. 3.10 (ಎಕ್ಸ್‌ಪ್ರೆಸ್‌), ಸಂ. 5.00, 6.00 ಮತ್ತು ರಾತ್ರಿ 9 ಗಂಟೆಗೆ ರೈಲುಗಳು ಇವೆ.

ಚಾಮರಾಜನಗರದಿಂದ ಮಾತ್ರ ಮೈಸೂರಿಗೆ ರೈಲು ಸಂಪರ್ಕ ಇದ್ದು, ಉಳಿದ ಪಟ್ಟಣಗಳ ಜನರು ಬಸ್ಸುಗಳನ್ನೇ ಅವಲಂಬಿಸಬೇಕಾಗಿದೆ.