ಚಾಮರಾಜನಗರ: ಜಿಲ್ಲೆಯ ಪ್ರಸಿದ್ಧ ಯಾತ್ರಾ ಸ್ಥಳ ಮಹದೇಶ್ವರ ಬೆಟ್ಟದ ಮಲೆ ಮಹದೇಶ್ವರಸ್ವಾಮಿ ಸ್ವಾಮಿಯ ಲಾಡು ಪ್ರಸಾದದ ಮಾರಾಟ ದರವನ್ನು ಹೆಚ್ಚಿಸಲಾಗಿದೆ.
100 ಗ್ರಾಂ ತೂಕದ ಒಂದು ಲಾಡಿನ ಬೆಲೆ ₹5 ಹೆಚ್ಚಿಸಲಾಗಿದೆ. ಈ ಹಿಂದೆ ಒಂದು ಲಾಡಿನ ಮಾರಾಟ ದರ ₹20 ಇತ್ತು. ಈಗ ₹25 ಆಗಿದೆ. ಭಾನುವಾರದಿಂದಲೇ (ನ.8) ಹೊಸ ದರ ಜಾರಿಗೆ ಬಂದಿದೆ.
ಕ್ಷೇತ್ರ ಅಭಿವೃದ್ಧಿ ಪ್ರಾಧಿಕಾರದ ಉಪಾಧ್ಯಕ್ಷ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವ ಎಸ್.ಸುರೇಶ್ ಕುಮಾರ್ ಅವರ ಅನುಮೋದನೆಯನ್ನು ಪಡೆದು, ಲಾಡು ತಯಾರಿಸಲು ಖರ್ಚಾಗುವ ಪರಿಮಾಣದಂತೆ ಮಾರಾಟ ದರ ಹೆಚ್ಚಿಸಲಾಗಿದೆ ಎಂದು ಪ್ರಾಧಿಕಾರದ ಕಾರ್ಯದರ್ಶಿ ಜಯವಿಭವಸ್ವಾಮಿ ಅವರು ಆದೇಶದಲ್ಲಿ ತಿಳಿಸಿದ್ದಾರೆ.