ತರೀಕೆರೆ: ಜನಪದರು ಮತ್ತು ಸಾಹಿತಿಗಳು ಕಟ್ಟಿ ಬೆಳೆಸಿದ ಸಾಹಿತ್ಯ, ಸಂಸ್ಕೃತಿಯನ್ನು ಉಳಿಸಿ, ಬೆಳೆಸಬೇಕು ಎಂದು ಜಾನಪದ ಪರಿಷತ್ ಜಿಲ್ಲಾ ಘಟಕದ ಅಧ್ಯಕ್ಷ ಜಿ.ಬಿ.ಸುರೇಶ್ ಹೇಳಿದರು.
ತ್ಯಾಗದಬಾಗಿ ಗ್ರಾಮದಲ್ಲಿ ಜಾನಪದ ಪರಿಷತ್ ಜಿಲ್ಲಾ ಘಟಕ ಆಯೋಜಿಸಿದ್ದ ಜಾನಪದ ಕಲೆಗಳ ತರಬೇತಿ ಕಾರ್ಯಾಗಾರ ಉದ್ಘಾಟಿಸಿ ಅವರು ಮಾತನಾಡಿದರು.
ಪಾಶ್ಚಾತ್ಯ ಸಂಸ್ಕೃತಿಯ ಪ್ರಭಾವದಿಂದ ಭಾರತೀಯ ಸಂಸ್ಕೃತಿ ನಶಿಸುತ್ತಿದೆ. ಜನಪದ ಕಲೆಗಳಿಂದ ಸ್ವಸ್ಥ ಸಮಾಜ ನಿರ್ಮಾಣ ಮಾಡಲು ಸಾದ್ಯ ಎಂದರು.
ಶಾಲಾ ಕಾಲೇಜುಗಳಲ್ಲಿ ಮತ್ತು ಸಾರ್ವಜನಿಕ ಕಾರ್ಯಕ್ರಮಗಳಲ್ಲಿ ಹೆಚ್ಚು ಹೆಚ್ಚು ಜಾನಪದ ಕಾರ್ಯಕ್ರಮಗಳನ್ನು ಆಯೋಜಿಸುವುದರಿಂದ ಜಾನಪದ ಸಂಸ್ಕೃತಿಯನ್ನು ಉಳಿಸಬಹುದು ಎಂದರು.
ಮುಖಂಡ ವಸಂತಕುಮಾರ್ ಮಾತನಾಡಿ, ಅಳಿವಿನ ಅಂಚಿನಲ್ಲಿರುವ ಜನಪದ ಕಲೆ ಉಳಿಯಬೇಕಾದರೆ ಇಂದಿನ ಯುವಕರಿಗೆ ಪುನಶ್ಚೇತನ ಕಾರ್ಯ ಕ್ರಮಗಳು ಅಗತ್ಯವಾಗಿವೆ ಎಂದರು.
ಕಲಾವಿದ ಕುಡ್ಲೂರು ರೇವಣಸಿದ್ದಪ್ಪ ಮಾತನಾಡಿ ಜಾನಪದ ಕಲೆ ಉಳಿಸುವಲ್ಲಿ ಜಿಲ್ಲಾ ಜಾನಪದ ಪರಿಷತ್ತು ಹಲವಾರು ಕಾರ್ಯಕ್ರಮಗಳನ್ನು ಮಾಡುತ್ತಿರುವುದು ಶ್ಲಾಘನೀಯ ಎಂದರು.
ತರೀಕೆರೆ ಜಾನಪದ ಪರಿಷತ್ತಿನ ಅಧ್ಯಕ್ಷ ನಾಗೇಶ್, ಗೌರವಧ್ಯಕ್ಷ ದೇವರಾಜು, ಮುಖಂಡರಾದ ಗಿರೀಶ್, ಜಿ.ಟಿ.ಕುಮಾರಸ್ವಾಮಿ, ನಾಗೇನಹಳ್ಳಿ ತಿಮ್ಮಯ್ಯ, ಕೆ.ಆರ್ ಶಿವಕುಮಾರ್, ಎಸ್.ಬಿ.ರಮೇಶ್, ಬಸವರಾಜಯ್ಯ, ನಾಗೇಂದ್ರಪ್ಪ ಹಾಗೂ ಸಿದ್ದೇಶ್ವರ ಜಾನಪದ ಕಲಾ ತಂಡದವರು ಇದ್ದರು.
