ಆಹಾರ ಸುರಕ್ಷತಾ ಅಧಿಕಾರಿ ಎಸಿಬಿ ಬಲೆಗೆ

ಲಂಚವಾಗಿ ಪಡೆದಿದ್ದ ₹ 8 ಸಾವಿರ ನಗದು ಹಾಗೂ ಕೆಲ ಕಡತಗಳನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ತುಳಸಿ ರಂಗನಾಥ್‌ ಅವರು ಜಿಲ್ಲಾ ಸರ್ವೇಕ್ಷಣಾಧಿಕಾರಿಯಾಗಿಯೂ ಕೆಲಸ ಮಾಡುತ್ತಿದ್ದಾರೆ.

ಹೊಳಲ್ಕೆರೆ ರಸ್ತೆ ಹಾಗೂ ಜೆಎಂಐಟಿ ಮುಂಭಾಗದಲ್ಲಿ ಮಂಜುನಾಥ್‌ ಎಂಬುವರು ಬೇಕರಿ ನಡೆಸುತ್ತಿದ್ದಾರೆ. ಈ ಬೇಕರಿ ಮೇಲೆ ದಾಳಿ ನಡೆಸಿದ ತುಳಸಿ ರಂಗನಾಥ್‌ ಆಹಾರ ಸುರಕ್ಷತಾ ನಿಯಮದಡಿ ಪರವಾನಗಿ ಪಡೆದಿಲ್ಲವೆಂದು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ದಂಡದ ರೂಪದಲ್ಲಿ ₹ 80 ಸಾವಿರ ಪಾವಿತಿಸಿ ಪರವಾನಗಿ ಪಡೆಯುವಂತೆ ತಾಕೀತು ಮಾಡಿದ್ದರು ಎಂದು ಎಸಿಬಿ ಪೊಲೀಸರು ತಿಳಿಸಿದ್ದಾರೆ.

ದಂಡ ವಿನಾಯಿತಿ ನೀಡಲು ಅಂಗಡಿ ಮಾಲೀಕರಿಗೆ ₹ 10 ಸಾವಿರ ಲಂಚಕ್ಕೆ ಬೇಡಿಕೆ ಇಟ್ಟಿದ್ದರು. ಲಂಚ ನೀಡಲು ಇಷ್ಟವಿಲ್ಲದ ಮಂಜುನಾಥ್‌ ಎಸಿಬಿಗೆ ದೂರು ನೀಡಿದ್ದರು. ಗುರುವಾರ ಮನೆಯಲ್ಲಿಯೇ ₹ 8 ಸಾವಿರ ಲಂಚ ಪಡೆಯುತ್ತಿದ್ದಾಗ ದಾಳಿ ನಡೆಸಿ ಅಧಿಕಾರಿಯನ್ನು ಬಂಧಿಸಲಾಗಿದೆ ಎಂದು ಎಸಿಬಿ ಪೊಲೀಸರು ಮಾಹಿತಿ ನೀಡಿದ್ದಾರೆ.