ಇಲ್ಲಿನ ನಾಗರಿಕರು ಕುಕ್ವಾಡೇಶ್ವರಿ ದೇವಿಯನ್ನು ಶಕ್ತಿದೇವತೆ ಎಂದೇ ನಂಬಿದ್ದಾರೆ. ಪ್ರತಿ ಮಂಗಳವಾರ ಮತ್ತು ಶುಕ್ರವಾರ ಪೂಜೆ ಸಲ್ಲಿಸುತ್ತಾರೆ. ಹೋಳಿಗೆ ನೈವೇದ್ಯ ಮಾಡಿ ಹರಕೆ ತೀರಿಸುತ್ತಾರೆ. ಮಹಿಳೆಯರು ದೇವಾಲಯದ ಪಕ್ಕದಲ್ಲೇ ಇರುವ ಅಶ್ವತ್ಥ ಮರಕ್ಕೆ ಬಳೆ, ಹೊಸ ಬಟ್ಟೆ ಕಟ್ಟಿ ಹರಕೆ ಹೊರುತ್ತಾರೆ. ಕೆಲವರು ಮರದ ಕಾಂಡಕ್ಕೆ ಬಾಳೆಹಣ್ಣು ಅಂಟಿಸುತ್ತಾರೆ. ಇಷ್ಟಾರ್ಥ ಈಡೇರಿದ ನಂತರ ಹರಕೆ ತೀರಿಸುತ್ತಾರೆ. ಅಪಘಾತಗಳು ಸಂಭವಿಸದಿರಲಿ ಎಂದು ವಾಹನಗಳನ್ನು ದೇವಾಲಯದ ಸುತ್ತ ಓಡಿಸುತ್ತಾರೆ. ಕುಕ್ವಾಡೇಶ್ವರಿ ದೇವಿಯು ಅಮ್ಮ ಏಳುವುದು, ಕೆಮ್ಮು, ಜ್ವರ ಮತ್ತಿತರ ಕಾಲೆಗಳನ್ನು ದೂರ ಮಾಡುತ್ತಾಳೆ ಎಂಬ ನಂಬಿಕೆ ಇಲ್ಲಿನ ಭಕ್ತರದು.