ವೈಭವದ ಮಾರಮ್ಮದೇವಿ ತುಂಬಲು ಪರಿಷೆ
ಮೊಳಕಾಲ್ಮುರು: ಚಳ್ಳಕೆರೆ ತಾಲ್ಲೂಕು ತಳಕು ಹೋಬಳಿ ಗೌರಸಮುದ್ರದಲ್ಲಿ ಮಂಗಳವಾರ ಸುಪ್ರಸಿದ್ಧ ಮಾರಮ್ಮದೇವಿ ತುಂಬಲು ಪರಿಷೆ ಸಹಸ್ರಾರು ಭಕ್ತರ ಸಮ್ಮುಖದಲ್ಲಿ ವೈಭವದಿಂದ ನಡೆಯಿತು. ಹತ್ತಾರು ಅಪ್ಪಟ ಬುಡಕಟ್ಟು ಸಂಸ್ಕೃತಿಗಳನ್ನು ಬಿಂಬಿಸುವ ಜಾತ್ರೆ ಎಂದೇ ಹೆಸರು ಮಾಡಿರುವ ಹಾಗೂ ರಾಜ್ಯ ಹಾಗೂ ಆಂಧ್ಪ್ರದೇಶದ ಸಹಸ್ರಾರು ಭಕ್ತರನ್ನು ಕಲೆ ಒಂದಡೆ ಹಾಕುವ ವೈಶಿಷ್ಟ್ಯದ ‘ಗೌಸಂದ್ರ ಮಾರಮ್ಮ’ ಜಾತ್ರೆಯನ್ನು ಪ್ರತಿವರ್ಷ ಶ್ರಾವಣ ಮಾಸದ ಮುಕ್ತಾಯದಲ್ಲಿ ಬರುವ ಅಮಾವಾಸ್ಯೆ ನಂತರದ ಮಂಗಳವಾರ ನಡೆಸಿಕೊಂಡು ಬರಲಾಗುತ್ತಿದೆ.
ಇಲ್ಲಿ ಬೇವಿನಸೀರೆ ಹರಕೆ, ಬಾಯಿಗೆ ಬೀಗ, ಕುರಿ–ಕೋಳಿ, ದವಸ ಧಾನ್ಯ, ತರಕಾರಿಗಳನ್ನು ಅರ್ಪಿಸುವುದು ಐತಿಹ್ಯವಾಗಿದೆ. ಬೆಳಿಗ್ಗೆ 11ಕ್ಕೆ ದೇವಸ್ಥಾನದಿಂದ ದೇವಿಯನ್ನು ಮೆರವಣಿಗೆ ಮೂಲಕ ತುಂಬಲು ಸ್ಥಳಕ್ಕೆ ಕರೆದುಕೊಂಡು ಬರಲಾಯಿತು. 12.30ಕ್ಕೆ ದೇವಿಯನ್ನು ಪೌಳಿ ಸುತ್ತ ಎರಡು ಸುತ್ತು ಪ್ರದಕ್ಷಿಣೆ ಹಾಕಿಸಿದ ನಂತರ ಕಟ್ಟೆ ಮೇರೆ ಕೂರಿಸಲಾಯಿತು. ಈ ವೇಳೆ ಬುಡಕಟ್ಟು ಸಂಸ್ಕೃತಿಗಳಾದ ಉರುಮೆ, ತಪ್ಪಡೆ, ಡೋಲು, ಚಾಮರ, ನವಿಲುಗರಿ, ಬೇವಿನ ಕೊಂಬೆ ಪ್ರದರ್ಶನ ಗಮನ ಸೆಳೆದವು.
ದೇವಿ ಬರುವಾಗ ದಾರಿಯುದ್ದಕ್ಕೂ ಹರಕೆ ಹೊತ್ತ ಭಕ್ತರು ಕೋಳಿ, ಕಾಳುಮೆಣಸು, ಮಂಡಕ್ಕಿ, ಕರಿಮಣಿ, ಬಾಳೆಹಣ್ಣು, ತಮ್ಮ ಹೊಲಗಳಲ್ಲಿ ಬೆಳೆದಿದ್ದ ಹೂವು, ದವಸಗಳನ್ನು ತೂರಿದರು. ಈ ವೇಳೆ ಮಹಿಳೆಯರು ಕರಿಮೆಣಸು, ಕರಿಮಣಿಗಳನ್ನು ಆರಿಸಿಕೊಂಡರು.
ಕಟ್ಟೆ ಮೇಲೆ ದೇವಿಯನ್ನು ಪ್ರತಿಷ್ಠಾಪಿಸಿದ ನಂತರ ಎದುರಿನ ದೀಪಸ್ತಂಭವನ್ನು ಏರಿದ ಮೀಸಲು ಭಕ್ತರು ದೀಪ ಹೊತ್ತಿಸಿದರು. ಹರಕೆ ಹೊತ್ತ ಸಾವಿರಾರು ಭಕ್ತರು ಬೆಳಿಗ್ಗೆಯಿಂದೇ ಬೇವಿನಸೀರೆ ಸೇರಿದಂತೆ ಹಲವು ಹರಕೆ ಸಲ್ಲಿಕೆ ಮಾಡಿದರು.
ಶಾಸಕ ಎಸ್. ತಿಪ್ಪೇಸ್ವಾಮಿ, ವಿಧಾನ ಪರಿಷತ್‌ ಸದಸ್ಯೆ ಜಯಮ್ಮ ಬಾಲರಾಜ್‌, ನಂಜುಂಡಪ್ಪ ವರದಿ ಅನುಷ್ಠಾನ ಉಸ್ತುವಾರಿ ಸಮಿತಿ ಅಧ್ಯಕ್ಷ ಎನ್‌.ವೈ.ಗೋಪಾಲಕೃಷ್ಣ, ತಹಶೀಲ್ದಾರ್‌ ಕಾಂತರಾಜ್, ಜಿಲ್ಲಾಪಂಚಾಯ್ತಿ ಸದಸ್ಯ ಡಾ.ಬಿ.ಯೋಗೇಶ್‌ಬಾಬು ಉಪಸ್ಥಿತರಿದ್ದರು. ಬುಧವಾರ ಮಧ್ಯಾಹ್ನ 3ಕ್ಕೆ ಗೌರಸಮುದ್ರ ದೇವಸ್ಥಾನ ಮುಂಭಾಗ ಸಿಡಿ ಮಹೋತ್ಸವ ನಡೆಯಲಿದೆ.
Lok Sabha Elections Results 2024 |ನರೇಂದ್ರ ಮೋದಿ ಅವರ 'ವಿಕಸಿತ ಭಾರತ' ಅಥವಾ ರಾಹುಲ್ ಗಾಂಧಿ ಅವರ ಇಂಡಿಯಾ ಐಕ್ಯ ಭಾರತ? ಜಗತ್ತಿನ ಅತಿದೊಡ್ಡ ಪ್ರಜಾಪ್ರಭುತ್ವದ 18ನೇ ಲೋಕಸಭೆಗೆ ನಡೆದ ಚುನಾವಣೆ ಫಲಿತಾಂಶದ ಕ್ಷಣ ಕ್ಷಣದ ಮಾಹಿತಿ, ವಿಶ್ವಾಸಾರ್ಹ ವಿಶ್ಲೇಷಣೆ, ಅಂಕಿ ಅಂಶಗಳಿಗಾಗಿ ಪ್ರಜಾವಾಣಿ ನೋಡಿ. ಇದರ ಜೊತಗೆ, ಆಂಧ್ರಪ್ರದೇಶ ಮತ್ತು ಒಡಿಶಾ ವಿಧಾನಸಭೆ ಚುನಾವಣೆಯ ಫಲಿತಾಂಶವೂ ಇಲ್ಲೇ ಲಭ್ಯ. ಪ್ರಜಾವಾಣಿಯನ್ನು ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಫಾಲೋ ಮಾಡಲು ಮರೆಯದಿರಿ.