ಬೆಂಬಲ ಬೆಲೆಗಿಂತ ದರ ಕಡಿಮೆ ಮಾಡಬೇಡಿ

6
ಮೆಕ್ಕೆಜೋಳ ವ್ಯಾಪಾರಿಗಳಿಗೆ ಜಿಲ್ಲಾಧಿಕಾರಿ ಡಿ.ಎಸ್. ರಮೇಶ್‌ ಸೂಚನೆ

ಬೆಂಬಲ ಬೆಲೆಗಿಂತ ದರ ಕಡಿಮೆ ಮಾಡಬೇಡಿ

Published:
Updated:
Deccan Herald

ದಾವಣಗೆರೆ: ಸರ್ಕಾರ ನಿಗದಿಪಡಿಸಿರುವ ಬೆಂಬಲ ಬೆಲೆಗಿಂತಲೂ ಕಡಿಮೆ ದರದಲ್ಲಿ ಕೃಷಿ ಉತ್ಪನ್ನಗಳನ್ನು ಖರೀದಿಸದಂತೆ ವ್ಯಾಪಾರಿಗಳಿಗೆ ಜಿಲ್ಲಾಧಿಕಾರಿ ಡಿ.ಎಸ್. ರಮೇಶ್‌ ತಿಳಿಸಿದರು.

ಜಿಲ್ಲಾಡಳಿತ ಭವನದಲ್ಲಿ ಬುಧವಾರ ಮೆಕ್ಕೆಜೋಳ ಮತ್ತು ಭತ್ತ ಖರೀದಿ ಕೇಂದ್ರ ತೆರೆಯುವ ಕುರಿತು ಚರ್ಚಿಸಲು ಏರ್ಪಡಿಸಿದ್ದ ಸಭೆಯಲ್ಲಿ ಅವರು ಮಾತನಾಡಿದರು.

ಮೆಕ್ಕೆಜೋಳ ಬೆಳೆ ಈಗಾಗಲೇ ಕಟಾವಿಗೆ ಬಂದಿದ್ದು, ಭತ್ತ ಕೂಡ ಹೆಚ್ಚಿನ ಪ್ರದೇಶದಲ್ಲಿ ಬೆಳೆಯಲಾಗಿದೆ. ಹೀಗಾಗಿ, ಕೇಂದ್ರ ಸರ್ಕಾರ ಘೋಷಿಸಿರುವ ಬೆಂಬಲ ಬೆಲೆಯಡಿ ಖರೀದಿ ಕೇಂದ್ರ ಸ್ಥಾಪಿಸಲು ಕಳೆದ ತಿಂಗಳೇ ಸರ್ಕಾರಕ್ಕೆ ಪ್ರಸ್ತಾವ ಕಳುಹಿಸಲಾಗಿದೆ. ಆದರೆ, ಸರ್ಕಾರದಿಂದ ಇದುವರೆಗೂ ಪ್ರತಿಕ್ರಿಯೆ ಬಂದಿಲ್ಲ ಎಂದು ಹೇಳಿದರು.

ರೈತ ಮುಖಂಡ ಎಚ್‌.ಎಂ. ಮಹೇಶ್ವರ ಸ್ವಾಮಿ, ‘ಜಿಲ್ಲೆಯಲ್ಲಿ ಮಳೆ ಕೈಕೊಟ್ಟಿದೆ. ಹೀಗಾಗಿ, ಮೆಕ್ಕೆಜೋಳ ಕಾಳು ಕಟ್ಟಲಿಲ್ಲ. ಎಕರೆಗೆ ಗರಿಷ್ಠ 5–6 ಚೀಲ ಇಳುವರಿ ಬರುವುದೂ ಕಷ್ಟ. ಬೆಲೆ ಕುಸಿತದಿಂದಾಗಿ ರೈತರು ಇನ್ನಷ್ಟು ನಷ್ಟ ಅನುಭವಿಸುವಂತಾಗಿದೆ. ಜಿಲ್ಲಾಡಳಿತ ಖರೀದಿ ಕೇಂದ್ರ ಆರಂಭಿಸಿ ಬೆಂಬಲ ಬೆಲೆ ನೀಡಬೇಕು. ಇಲ್ಲದಿದ್ದರೆ ಕೃಷಿ ಮಾರುಕಟ್ಟೆಗಳಲ್ಲಿ ಮೆಕ್ಕೆಜೋಳ ದಾಸ್ತಾನು ಇಟ್ಟುಕೊಂಡು ಫಸಲಿನ ಶೇ 80ರಷ್ಟು ಸಾಲವನ್ನು ಕೊಡಿಸಲು ಕ್ರಮ ಕೈಗೊಳ್ಳಬೇಕು’ ಎಂದು ಆಗ್ರಹಿಸಿದರು.

ಬಲ್ಲೂರು ರವಿಕುಮಾರ್‌, ಹುಚ್ಚವ್ವನಹಳ್ಳಿ ಮಂಜುನಾಥ್‌ ಮಾತನಾಡಿ, ‘ಈ ಹಿಂದೆ ಜಿಲ್ಲಾಧಿಕಾರಿಯಾಗಿದ್ದ ದ್ಯಾಬೇರಿ ಅವರು, ಬೆಂಬಲ ಬೆಲೆಗಿಂತಲೂ ಕಡಿಮೆ ಇಲ್ಲದಂತೆ ಕೃಷಿ ಉತ್ಪನ್ನಗಳನ್ನು ಖರೀದಿಸಬೇಕು ಎಂದು ವ್ಯಾಪಾರಿಗಳಿಗೆ ಆದೇಶ ಹೊರಡಿಸಿದ್ದರು. ನೀವೂ ಸೂಚನೆ ನೀಡಬೇಕು. ಸಂಕಷ್ಟದಲ್ಲಿರುವ ರೈತರನ್ನು ಕಾಪಾಡಬೇಕು’ ಎಂದು ಡಿ.ಎಸ್‌. ರಮೇಶ್‌ ಅವರನ್ನು ಆಗ್ರಹಿಸಿದರು.

ರೈತರ ಮನವಿಗೆ ಸ್ಪಂದಿಸಿದ ಜಿಲ್ಲಾಧಿಕಾರಿ, ಗುಣಮಟ್ಟದ ಮೆಕ್ಕೆಜೋಳಕ್ಕೆ ₹ 1,700ಕ್ಕಿಂತ ಕಡಿಮೆ ಇಲ್ಲದಂತೆ ದರ ನಿಗದಿಪಡಿಸಿಕೊಂಡು ವ್ಯಾಪಾರ ನಡೆಸಿ. ರೈತರಿಗೂ ಅನುಕೂಲ ಮಾಡಿಕೊಡಿ ಎಂದು ವ್ಯಾಪಾರಿಗಳಿಗೆ ಮೌಖಿಕ ಆದೇಶ ನೀಡಿದರು.

ಜಿಲ್ಲಾ ಪಂಚಾಯಿತಿ ಸದಸ್ಯ ತೇಜಸ್ವಿ ಪಟೇಲ್‌, ರೈತ ಮುಖಂಡ ಮಲ್ಲಾಪುರ ದೇವರಾಜ್, ಹೊಸಳ್ಳಿ ಮಲ್ಲೇಶ್‌, ಮಲ್ಲಶೆಟ್ಟಿಹಳ್ಳಿ ಚನ್ನಬಸಪ್ಪ, ಬುಳ್ಳಾಪುರದ ಹನುಮಂತಪ್ಪ, ಅರಕನಾಳು ಸಿದ್ದಪ್ಪ, ಎಪಿಎಂಸಿ ವರ್ತಕರ ಪ್ರತಿನಿಧಿ ಕುಬೇರಪ್ಪ, ದೊಗ್ಗಳ್ಳಿ ಬಸವರಾಜ್, ಜಾವಿದ್‌ ಸಾಹೇಬ್‌, ಜಂಟಿ ಕೃಷಿ ನಿರ್ದೇಶಕ ಶರಣಪ್ಪ ಮುದಗಲ್, ಎಪಿಎಂಸಿ ಸಹಾಯಕ ನಿರ್ದೇಶಕ ವಿಜಯಪ್ರಭು, ಉಪ ವಿಭಾಗಾಧಿಕಾರಿ ಜಿ. ನಜ್ಮಾ, ತಹಶೀಲ್ದಾರ್‌ ಸಂತೋಷ್‌ಕುಮಾರ್‌ ಅವರೂ ಇದ್ದರು.

***

ಬರ ಪಟ್ಟಿಗೆ ಸೇರದ ಜಗಳೂರು: ಚರ್ಚೆ

1956ರಿಂದ 2017ರವರೆಗೂ ಜಗಳೂರು ತಾಲ್ಲೂಕನ್ನು ನಿರಂತರವಾಗಿ ಬರಪೀಡಿತ ಪಟ್ಟಿಗೆ ಸೇರಿದೆ. ಆದರೆ, ಈ ವರ್ಷ ಜಗಳೂರನ್ನು ಕೈಬಿಡಲಾಗಿದೆ. ಆದರೆ, ಹೆಚ್ಚಿನ ನೀರಾವರಿ ಪ್ರದೇಶ ಹೊಂದಿರುವ ಹರಿಹರ ತಾಲ್ಲೂಕನ್ನು ಬರಪಟ್ಟಿಗೆ ಸೇರಿಸಲಾಗಿದೆ. ಯಾವ ಮಾನದಂಡದ ಆಧಾರದಲ್ಲಿ ಜಗಳೂರು ತಾಲ್ಲೂಕನ್ನು ಬರಪೀಡಿತ ಪಟ್ಟಿಗೆ ಸೇರಿಸಿಲ್ಲ ಎಂದು ರೈತರು ಪ್ರಶ್ನಿಸಿದರು.

ಜಿಲ್ಲಾಧಿಕಾರಿ ರಮೇಶ್‌, ‘ಪ್ರತಿ ಗ್ರಾಮ ಪಂಚಾಯಿತಿಗಳಲ್ಲೂ ಮಳೆ ಮಾಪನ ಕೇಂದ್ರಗಳನ್ನು ಸ್ಥಾಪಿಸಿ, ಆನ್‌ಲೈನ್‌ನಲ್ಲಿ ಕೇಂದ್ರೀಕೃತ ವ್ಯವಸ್ಥೆಯಲ್ಲಿ ಮಾಹಿತಿ ಸಂಗ್ರಹಿಸಲಾಗುತ್ತದೆ. ಹಾಗೆಯೇ ಸ್ಯಾಟಲೆಟ್‌ ಮೂಲಕವೂ ಸಮೀಕ್ಷೆ ನಡೆಸಲಾಗುತ್ತದೆ. ಮಣ್ಣಿನಲ್ಲಿರುವ ತೇವಾಂಶವನ್ನೂ ಗಣನೆಗೆ ತೆಗೆದುಕೊಂಡು ಸರ್ಕಾರ ಬರಪೀಡಿತ ಪ್ರದೇಶ ಪಟ್ಟಿಯನ್ನು ಸಿದ್ಧಪಡಿಸಲಾಗುತ್ತದೆ. ಜಿಲ್ಲಾಡಳಿತದಿಂದ ಬರಪೀಡಿತ ಪ್ರದೇಶ ಘೋಷಣೆಗೆ ಪ್ರಸ್ತಾವ ಸಲ್ಲಿಸುವ ಪ್ರಕ್ರಿಯೆಯನ್ನು ಈಗ ಕೈಬಿಡಲಾಗಿದೆ. ಬಹುಶಃ ಎರಡನೇ ಹಂತದಲ್ಲಿ ಜಗಳೂರು ತಾಲ್ಲೂಕನ್ನೂ ಬರಪೀಡಿತ ಪಟ್ಟಿಗೆ ಸೇರಿಸಬಹುದು’ ಎಂದು ಹೇಳಿದರು.

***

‘ಬೆಳೆ ವಿಮೆ ಕಟ್ಟಲು ಹೇಳಬಾರದಿತ್ತು!’

ರೈತ ಮುಖಂಡ ಸಿದ್ದಣ್ಣ ಮಾತನಾಡಿ, ‘ಹರಪನಹಳ್ಳಿ ತಾಲ್ಲೂಕಿನಲ್ಲಿ ಮೆಕ್ಕೆಜೋಳ ಐದಾರು ಚೀಲ ಕೂಡ ಇಳುವರಿ ಬಂದಿಲ್ಲ. ಹೀಗಿದ್ದರೂ ಬೆಳೆ ವಿಮೆಯ ಪರಿಹಾರ ಮೊತ್ತ ಸಿಕ್ಕಿಲ್ಲ. ಜಿಲ್ಲಾಧಿಕಾರಿ ವಿಮಾ ಸಂಸ್ಥೆಯ ಅಧಿಕಾರಿಗಳನ್ನು ಕರೆಯಿಸಿ, ಪರಿಹಾರ ಕೊಡಿಸಬೇಕು’ ಎಂದು ಆಗ್ರಹಿಸಿದರು.

ಅಧಿಕಾರಿಗಳು ಬೆನ್ನು ಬಿದ್ದು ಫಸಲ್‌ ಬಿಮಾ ಕಂತು ಕಟ್ಟಿಸಿಕೊಂಡರು. ಈಗ ಪರಿಹಾರ ಕೊಡಿಸಲು ಹಿಂದೇಟು ಹಾಕುತ್ತಿದ್ದಾರೆ ಎಂದೂ ಹರಿಹಾಯ್ದರು. ಇದಕ್ಕೆ ಪ್ರತಿಕ್ರಿಯಿಸಿದ ಜಿಲ್ಲಾಧಿಕಾರಿ, ‘ನಾನು ಅಧಿಕಾರ ವಹಿಸಿಕೊಂಡಾಗ 27 ಸಾವಿರ ರೈತರಿಗೆ ₹ 54 ಕೋಟಿ ಫಸಲ್‌ ಬಿಮಾ ಯೋಜನೆಯಿಂದ ಪರಿಹಾರ ಸಿಕ್ಕಿತು. ಹೀಗಾಗಿ, ನಾನೇ ಅಧಿಕಾರಿಗಳ ಬೆನ್ನು ಬಿದ್ದು, ರೈತರಿಂದ ಬೆಳೆ ವಿಮೆ ಕಟ್ಟಿಸುವಂತೆ ಮಾಡಿದೆ. ಕೇವಲ ₹ 300 ಪಾವತಿಸಿದ ರೈತರಿಗೆ ₹ 30 ಸಾವಿರದಿಂದ ₹ 40 ಸಾವಿರದವರೆಗೂ ಪರಿಹಾರ ಸಿಕ್ಕರೆ ಅನುಕೂಲ ಆಗುತ್ತದೆ ಎಂದು 2016–17ನೇ ಸಾಲಿನಲ್ಲಿ 80 ಸಾವಿರ ರೈತರಿಂದ ವಿಮೆ ಕಟ್ಟಿಸಲಾಯಿತು. ಆಗಲೂ 12 ಸಾವಿರ ರೈತರಿಗೆ ಪರಿಹಾರ ಸಿಕ್ಕಿತು. ಬೆಳೆ ವಿಮೆ ಕಟ್ಟಲು ಹೇಳಬಾರದಿತ್ತು’ ಎಂದು ಭಾವುಕವಾಗಿ ಹೇಳಿದರು.

‘ಫಸಲ್‌ ಬಿಮಾ ಅನುಷ್ಠಾನ ಏಜೆನ್ಸಿಯವರು ಇಳುವರಿಯ ಸಮೀಕ್ಷೆ ನಡೆಸಿ, ಕೃಷಿ ಇಲಾಖೆಗೆ ಸಲ್ಲಿಸಿರುವ ವರದಿಯನ್ನು ಪರಿಶೀಲಿಸಲಾಗುವುದು. ಮಾನದಂಡಗಳ ಪ್ರಕಾರ ವಿಮಾ ಪರಿಹಾರ ಕೊಡಿಸಲು ಸಾಧ್ಯವಿದ್ದರೆ ರೈತರಿಗೆ ನ್ಯಾಯ ಒದಗಿಸಲಾಗುವುದು ಎಂದು ಭರವಸೆ ನೀಡಿದರು.

***

ಪ್ರಸಕ್ತ ಸಾಲಿನ ಕನಿಷ್ಠ ಬೆಂಬಲ ಬೆಲೆ

ಕೃಷಿ ಉತ್ಪನ್ನ: ದರ (ಕ್ವಿಂಟಾಲ್‌ಗೆ)

ಭತ್ತ (ಸಾಮಾನ್ಯ): ₹ 1750

ಭತ್ತ (ಗ್ರೇಡ್ ಎ): ₹ 1770

ಜೋಳ(ಹೈಬ್ರೀಡ್): ₹ 2430

ಜೋಳ(ಮಾಲ್ದಂಡಿ): ₹ 2450

ರಾಗಿ: ₹ 2897

ಮೆಕ್ಕೆಜೋಳ: ₹ 1700

ತೊಗರಿ: ₹ 5675

ಹೆಸರು: ₹ 6975

ಉದ್ದು: ₹ 5600

ಶೇಂಗಾ: ₹ 4890

ಸೂರ್ಯಕಾಂತಿ: ₹ 5388

ಹುಚ್ಚೆಳ್ಳು (ಗುರೆಳ್ಳು): ₹ 5877

ಹತ್ತಿ (ಮಧ್ಯಮ ಎಳೆ): ₹ 5150

ಹತ್ತಿ (ಉದ್ದ ಎಳೆ): ₹ 5450

***

ಜಿಲ್ಲೆಯ ಬೆಳೆ ವಿವರ

ಬೆಳೆ: ವಿಸ್ತೀರ್ಣ(ಹೆಕ್ಟೇರ್‌ನಲ್ಲಿ)

ಭತ್ತ: 57,442

ಜೋಳ: 3,732

ರಾಗಿ: 8,763

ಮೆಕ್ಕೆಜೋಳ: 1,84,139

ತೊಗರಿ: 11,502

ಶೇಂಗಾ: 17,387

ಸೂರ್ಯಕಾಂತಿ: 400

ಹತ್ತಿ: 6,278

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !