ಶನಿವಾರ, ಏಪ್ರಿಲ್ 4, 2020
19 °C
ಪಾಪು ಅವರ ಕಾರು ಚಾಲಕ ಸೈಯದ್ ಅಲಿ ನರೇಗಲ್ ನೆನಪಿನಾಳ

ಈಡೇರದ ‘ಮೊಮ್ಮಗಳ’ ಮದುವೆ ಆಸೆ...

ಸೈಯದ್ ಅಲಿ ನರೇಗಲ್ Updated:

ಅಕ್ಷರ ಗಾತ್ರ : | |

Prajavani

ಹುಬ್ಬಳ್ಳಿ: ನನ್ನ ತಾಯಿ ಪೀರಾಂಬಿ ಹಾಗೂ ತಂದೆ ಖಾದರ್‌ ಸಾಬ್‌, ಪಾಟೀಲ ಪುಟ್ಟಪ್ಪ ಅವರ ಮನೆಯಲ್ಲಿ ಕೆಲಸ ಮಾಡುತ್ತಿದ್ದರು. ಅವರ ನೆರವಿನಿಂದ 25 ವರ್ಷಗಳ ಹಿಂದೆ ಅವರ ಕಾರು ಚಾಲಕನಾಗಿ ಸೇರಿಕೊಂಡೆ. ಕೆಲಸಕ್ಕೆ ಸೇರಿದ ಹೊಸದರಲ್ಲಿ ಅವರ ಬಗ್ಗೆ ಏನೂ ಗೊತ್ತಿರಲಿಲ್ಲ.

ಅವರ  ನೇರವಾಗಿ ಹೇಳುವ ಮನೋಭಾವ ನನಗೆ ಇಷ್ಟವಾಗುತ್ತಿದ್ದರೂ, ಒಳಗೊಳಗೆ ಭಯವಾಗುತ್ತಿತ್ತು. ಆದ್ದರಿಂದ ಆರೇ ತಿಂಗಳಲ್ಲಿ ಕೆಲಸ ಬಿಟ್ಟೆ. ಕೆಲ ತಿಂಗಳ ಬಳಿಕ ಮನೆಗೆ ಕರೆಯಿಸಿಕೊಂಡು ಬುದ್ಧಿ ಹೇಳಿ ಜೀವನದ ಕೊನೆಯತನಕ ತಮ್ಮೊಂದಿಗೆ ಇರುವಂತೆ ಹೇಳಿದರು. ಹಾಗೆಯೇ ಜೊತೆಯಲ್ಲಿದ್ದೆ.

ಪಾಪು ಅವರಿಂದಾಗಿ ರಾಜ್ಯ ಮತ್ತು ಹೊರರಾಜ್ಯಗಳ ಬಹಳಷ್ಟು ಮಠ, ಮಂದಿರ, ರಾಜಭವನ, ರಾಷ್ಟ್ರಪತಿ ಭವನ, ಹಲವಾರು ರಾಜಕಾರಣಿಗಳನ್ನು ನೋಡುವ ಸೌಭಾಗ್ಯ ಲಭಿಸಿತು. ಭಾರತ ದರ್ಶನ ಮಾಡುವ ಅವಕಾಶ ಸಿಕ್ಕಿತು.

ತಂದೆಯ ಪ್ರೀತಿ ನೀಡಿ, ಸ್ವಂತ ಮಗನಿಗಿಂತಲೂ ಹೆಚ್ಚು ಅಕ್ಕರೆ ತೋರಿದ ಅವರು, ನನ್ನ ಕುಟುಂಬದವರ ಬಗ್ಗೆ ಅಪಾರ ಗೌರವ ಇತ್ತು. ತಮ್ಮ ಕುಟುಂಬದಂತೆ ನಮ್ಮ ಕುಟುಂಬದ ಹಿತವನ್ನೂ ಕಾಯುತ್ತಿದ್ದರು. 25 ವರ್ಷಗಳಿಂದ ಅವರು ಹೋದಲೆಲ್ಲ ಹೋಗಿದ್ದೇನೆ. ತಮ್ಮ ಹಲವಾರು ಭಾಷಣಗಳಲ್ಲಿ ನನ್ನ ಬಗ್ಗೆ ಉಲ್ಲೇಖ ಮಾಡಿದ್ದಾರೆ. ಪತ್ನಿ ತೀರಿಕೊಂಡ ಬಳಿಕ ಸೈಯದ್‌ ನನ್ನ ಜೀವನದ ಭಾಗವೇ ಆಗಿದ್ದಾರೆ ಎಂದು ಪ್ರಶಂಸಿಸಿದ್ದಾರೆ.

ಪಾಪು, ಮೊಮ್ಮಗಳ (ನನ್ನ ಮಗಳ) ಮದುವೆ ಮಾಡಬೇಕು ಎನ್ನುವ ಆಸೆ ಹೊಂದಿದ್ದರು. ಇದಕ್ಕಾಗಿ ಸ್ವತಃ ಅವರೇ ನಾಲ್ಕೈದು ಕಡೆ ಹುಡುಗನನ್ನೂ ನೋಡಿದ್ದರು. ಆದಿ ಚುಂಚನಗಿರಿಮಠದ ಸ್ವಾಮೀಜಿ, ಸಿದ್ಧೇಶ್ವರ ಸ್ವಾಮೀಜಿ ಹೀಗೆ ಹಲವಾರು ಮಠಾಧೀಶರಿಗೆ ನನ್ನ ಮೊಮ್ಮಗಳ ಮದುವೆಗೆ ನೀವೆಲ್ಲರೂ ಬರಬೇಕು ಎಂದು ಹೇಳಿದ್ದರು. ಆದರೆ, ಈ ಆಸೆ ಈಡೇರುವ ಮೊದಲೇ ಇಹಲೋಕ ತ್ಯಜಿಸಿದ್ದು ಸಾಕಷ್ಟು ನೋವು ತಂದಿದೆ.

ಕೆಲಸಕ್ಕೆ ಸೇರಿದ ಆರಂಭದಲ್ಲಿ ಅವರು ಯಾರು ಎಂಬುದೇ ಗೊತ್ತಿರಲಿಲ್ಲ. ಈಗ ಕನ್ನಡದ ಧೀಮಂತ ನಾಯಕನೊಂದಿಗೆ ಜೀವನ ಕಳೆದಿದ್ದೇ ಸೌಭಾಗ್ಯ ಎನ್ನುವ ಹೆಮ್ಮೆಯ ಭಾವ ಮೂಡಿದೆ. ಇದು ನನ್ನ ಜೀವನವನ್ನು ಸಾರ್ಥಕಗೊಳಿಸಿದೆ. ಅವರು ಹೇಳಿದ್ದ ಕಡೆಗೆಲ್ಲ ಕರೆದೊಯ್ದೆ. ಈಗ ನಾನಿಲ್ಲದಿದ್ದರೂ ಅವರು ಹೊರಟು ಹೋದರು.

ನಿರೂಪಣೆ: ಪ್ರಮೋದ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು