ಬುಧವಾರ, 28 ಫೆಬ್ರುವರಿ 2024
×
ADVERTISEMENT
ಈ ಕ್ಷಣ :
ADVERTISEMENT
ADVERTISEMENT

ಕಡಲೆ ಬೆಳೆಗೆ ಕೀಟ ಬಾಧೆ: ಪರಿಣಾಮ ಬೀರದ ಕೀಟನಾಶಕ

ಮುಳಗುಂದ ರೈತರ ಆರೋಪ
Published 12 ಡಿಸೆಂಬರ್ 2023, 12:51 IST
Last Updated 12 ಡಿಸೆಂಬರ್ 2023, 12:51 IST
ಅಕ್ಷರ ಗಾತ್ರ

ಮುಳಗುಂದ: ‘ಹಿಂಗಾರು ಹಂಗಾಮಿನ ಕಡಲೆ ಬೆಳೆಗೆ ಕೀಟ ಆವರಿಸಿದೆ. ಕೋರೋಜನ್ ಕೀಟ ನಾಶಕ ಸಿಂಪರಣೆ ಮಾಡಿದೆ. ಆದರೆ ಅದು ಪರಿಣಾಮ ಬೀರುತ್ತಿಲ್ಲ. ಅದರ ಗುಣಮಟ್ಟದ ಬಗ್ಗೆ ಅನುಮಾನವಿದೆ’ ಎಂದು ರೈತರು ಆರೋಪಿಸಿದ್ದಾರೆ.

ಪ್ರಸಕ್ತ ವರ್ಷ ಮುಂಗಾರು ವೈಫಲ್ಯದ ಪರಿಣಾಮವಾಗಿ ಹಿಂಗಾರು ಕಡಲೆ ಬಿತ್ತನೆ ಪ್ರದೇಶ ಅಧಿಕವಾಗಿದೆ. ಕಡಲೆ ಬೆಳೆ ಉತ್ತಮವಾಗಿದೆ. ಆದರೆ ಗಿಡದ ತುಂಬಾ ಕೀಟ ಬಾಧಿಸುತ್ತಿದೆ. ಕೀಟ ನಿಯಂತ್ರಣಕ್ಕೆ ರೈತರು ಹೆಚ್ಚಾಗಿ ಕೋರೋಜನ್ ಕೀಟನಾಶಕ ಸಿಂಪರಣೆಯ ಮೊರೆ ಹೋಗಿದ್ದಾರೆ. ಆದರೆ ಅದು ಪರಿಣಾಮ ಬೀರುತ್ತಿಲ್ಲ.

‘ಹತ್ತು ದಿನಗಳ ಹಿಂದೆ 16 ಲೀ.ನೀರಿಗೆ 5 ಎಂ.ಎಲ್. ಕೋರೋಜನ್ ಕೀಟನಾಶನ ಸೇರಿಸಿ ಬೆಳೆಗೆ ಸಿಂಪರಣೆ ಮಾಡಿದ್ದೆ. ಆದರೆ ಈವರೆಗೂ ಕೀಟ ನಿಯಂತ್ರಣಕ್ಕೆ ಬಂದಿಲ್ಲ. ಬದಲಾಗಿ ಕಡಲೆ ಬೆಳೆ ನಾಶವಾಗುತ್ತಿದೆ. ಈ ಹಿಂದೆ ಇದೇ ಕೀಟನಾಶಕ ಸಿಂಪರಣೆ ಮಾಡಿದಾಗ ಉತ್ತಮ ರೀತಿ ಕೆಲಸ ಮಾಡಿತ್ತು. ಆದರೆ ಈಗ ಏನೂ ಪರಿಣಾಮ ಬೀರಿಲ್ಲ. ಇದರಿಂದ ಬೆಳೆ ನಾಶವಾಗಿ ನಮಗೆ ಹಾನಿಯಾಗಿದೆ. ಗುಣಮಟ್ಟದ ಕೀಟನಾಶಕ ಬರುತ್ತಿಲ್ಲ’ ಎಂದು ರೈತ ನಿಂಗಪ್ಪ ಕಬಾಡಿ ಆರೋಪಿಸಿದರು.

ಕೃಷಿ ಸಹಾಯಕ ಅಧಿಕಾರಿ ಎಫ್.ಸಿ. ಗುರಿಕಾರ ರೈತ ನಿಂಗಪ್ಪ ಕಬಾಡಿ ಅವರ ಹೊಲಕ್ಕೆ ಭೇಟಿ ನೀಡಿ ಬೆಳೆ ಪರಿಶೀಲಿಸಿದರು. ‘ಈ ಕುರಿತು ಕೃಷಿ ಜಾಗೃತ ದಳ ಸಿಬ್ಬಂದಿಗೆ ಮಾಹಿತಿ ನೀಡಿದ್ದು, ಕೀಟನಾಶಕ ಸಿಂಪರಣೆ ಮಾಡಿದ ಕಡಲೆ ಬೆಳೆ ಸ್ಯಾಂಪಲ್‍ ಅನ್ನು ಪರೀಕ್ಷೆಗೆ ಒಳಪಡಿಸಿ ಮುಂದಿನ ಕ್ರಮ ಕೈಗೊಳ್ಳುತ್ತಾರೆ’ ಎಂದು ತಿಳಿಸಿದರು.

‘ಕಡಲೆಗೆ ಕೋರೋಜನ್ ಸಿಂಪರಣೆ ಮಾಡಿದ ಪಟ್ಟಣದ ಹಲವು ರೈತರು ಕೀಟ ನಾಶವಾಗದೇ ಪರಿತಪಿಸುವಂತಾಗಿದೆ. ಕೂಡಲೇ ಕೀಟನಾಶಕ ಪರಿಶೀಲನೆಗೆ ಒಳಪಡಿಸಬೇಕು’ ಎಂದು ರೈತ ಸಂಘದ ಕಾರ್ಯದರ್ಶಿ ದೇವರಾಜ ಸಂಗನಪೇಟಿ ಒತ್ತಾಯಿಸಿದರು.

ರೈತರಾದ ಮಹಾಂತೇಶ ಗುಂಜಳ, ಮಂಜುನಾಥ ಕಬಾಡಿ ಇದ್ದರು.

ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.

ADVERTISEMENT
ADVERTISEMENT
ADVERTISEMENT
ADVERTISEMENT