ಹಾವೇರಿ ಜಿಲ್ಲಾ ಪಂಚಾಯಿತಿಸಿಇಒ ರೋಶನ್‌ ವರ್ಗಾವಣೆ

2015ನೇ ಬ್ಯಾಚಿನ ಐಎಎಸ್‌ ಅದಿಕಾರಿಯಾದ ರೋಶನ್‌ ಅವರು 2020ರ ಡಿಸೆಂಬರ್‌ ತಿಂಗಳಿಂದ ಇಲ್ಲಿಯವರೆಗೆ ಅಂದರೆ, ಎರಡು ವರ್ಷ, ಎರಡು ತಿಂಗಳು ಸಿಇಒ ಆಗಿ ಕರ್ತವ್ಯ ನಿರ್ವಹಿಸಿದ್ದಾರೆ. ಕೋವಿಡ್‌ ನಿರ್ವಹಣೆ, ಗ್ರಾಮಪಂಚಾಯಿತಿ ಚುನಾವಣೆ, ನರೇಗಾ ಕಾಮಗಾರಿ, ಜಲಜೀವನ್‌ ಮಿಷನ್‌, ಬಹುಗ್ರಾಮ ಕುಡಿಯುವ ನೀರಿನ ಯೋಜನೆ ಮುಂತಾದ ಯೋಜನೆಗಳ ಪ್ರಗತಿ ಮತ್ತು ಅನುಷ್ಠಾನದಲ್ಲಿ ರೋಶನ್‌ ಅವರ ಕಾರ್ಯವೈಖರಿ ಮತ್ತು ಪರಿಶ್ರಮ ಜನಮೆಚ್ಚುಗೆಗೆ ಪಾತ್ರವಾಗಿದೆ.

86ನೇ ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನದಲ್ಲಿ ಲಕ್ಷಾಂತರ ಜನರಿಗೆ ವಿಶೇಷ ಊಟ ಮತ್ತು ಕುಡಿಯುವ ನೀರಿನ ಸೌಲಭ್ಯವನ್ನು ಕಲ್ಪಿಸುವ ಹೊಣೆ ಹೊತ್ತಿದ್ದ ರೋಶನ್‌ ಅವರ ಕಾರ್ಯ ಅನುಕರಣೀಯ ಎಂದು ಜಿಲ್ಲೆಯ ಜನ ಪ್ರಶಂಸಿದ್ದಾರೆ.

‘ನಿರ್ಮಲ ಹಾವೇರಿ’ ಯೋಜನೆಯಡಿ ಬೂದು ನೀರು ನಿರ್ವಹಣೆ ಮಾಡಲು ಜಿಲ್ಲೆಯ 223 ಗ್ರಾಮ ಪಂಚಾಯಿತಿಗಳ ವ್ಯಾಪ್ತಿಯ 714 ಗ್ರಾಮಗಳಲ್ಲಿ ವೈಜ್ಞಾನಿಕವಾಗಿ ‘ಟೋಪೊ ಸಮೀಕ್ಷೆ’ಯನ್ನು ರಾಜ್ಯದಲ್ಲೇ ಮೊದಲ ಬಾರಿಗೆ ಮಾಡಿದ್ದು ಹಾವೇರಿ ಜಿಲ್ಲೆಯಲ್ಲಿ. ಅಷ್ಟೇ ಅಲ್ಲ, ‘ಸ್ವಚ್ಛತಾ ಹಿ ಸೇವಾ ಅಭಿಯಾನ’ದಲ್ಲಿ ರಾಜ್ಯದಲ್ಲೇ ಹಾವೇರಿ ಜಿಲ್ಲೆ ಪ್ರಥಮ ಸ್ಥಾನ ಪಡೆದ ಕಾರಣ, ಮೊಹಮ್ಮದ್‌ ರೋಶನ್‌ ಅವರಿಗೆ ನವದೆಹಲಿಯ ರಾಷ್ಟ್ರಪತಿ ಭವನದಲ್ಲಿ ಪ್ರಶಸ್ತಿಯನ್ನು ಪ್ರದಾನ ಮಾಡಲಾಗಿತ್ತು.

ಹಾವೇರಿ ಜಿಲ್ಲಾ ಪಂಚಾಯಿತಿ ಸಿಇಒ ಸ್ಥಾನಕ್ಕೆ ಐಎಎಸ್‌ ಅಧಿಕಾರಿ ಭಾರತಿ ಡಿ. ಅವರನ್ನು ಸರ್ಕಾರ ವರ್ಗಾವಣೆ ಮಾಡಿದೆ.