ಸೋಮವಾರ, ಜುಲೈ 4, 2022
25 °C

ಹೋಳಿ ಹಬ್ಬವಾಡಿದ ಹಿಂದೂ– ಮುಸ್ಲಿಂ ಯುವಕರು

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಕಲಬುರಗಿ: ಹೋಳಿ ಹಬ್ಬದ ಮುನ್ನಾದಿನವಾದ ಗುರುವಾರವೇ ನಗರದ ವಿವಿಧೆಡೆ ರಂಗಿನಾಟ ನಡೆಯಿತು. ಇಲ್ಲಿನ ಪುಟಾಣಿ ಗಲ್ಲಿಯಲ್ಲಿ ಪ್ರತಿ ವರ್ಷದಂತೆ ಈ ಬಾರಿಯೂ ಹಿಂದೂ ಹಾಗೂ ಮುಸ್ಲಿಂ ಯುವಕರು ಪರಸ್ಪರ ಬಣ್ಣ ಹೆಚ್ಚಿ, ತಮಟೆ ಬೀಟ್‌ಗಳಿಗೆ ಹೆಜ್ಜೆ ಹಾಕಿ ಸಂಭ್ರಮಿಸಿದರು.

ಪುಟಾಣಿ ಗಲ್ಲಿ ವ್ಯಾಪಾರಿಗಳ ಮುಖಂಡ ಬಾಬುರಾವ್‌ ಜಹಾಗೀರದಾರ್‌, ಇಮ್ರಾನ್‌, ಇಕ್ಬಾಲ್‌ ಅವರ ನೇತೃತ್ವದಲ್ಲಿ ಎಲ್ಲರೂ ಹೋಳಿ ಹಬ್ಬದ ಹಾಡು ಹಾಡಿ, ಕುಣಿದು ನಲಿದರು. ಕೆಂಪು ಬಣ್ಣದ ಪುಡಿ ಹಾಗೂ ನೀರಲ್ಲಿ ಕಲಸಿದ ವರ್ಣವನ್ನು ಎರಚಾಡಿ, ಪರಸ್ಪರ ಶುಭ ಕೋರಿದರು.

ನಗರದ ಮಿಲನ್‌ ಚೌಕ್‌, ಚಪ್ಪಲ್‌ ಬಜಾರ್‌, ಬ್ರಹ್ಮಪೂರ, ಒಕ್ಕಲಗೇರಿ, ರೋಜಾ ಬಡಾವಣೆ ಸೇರಿದಂತೆ ವಿವಿಧೆಡೆ ಕೂಡ ಗುರುವಾರವೇ ಬಣ್ಣದಾಟ ನಡೆಯಿತು.

‘ಗುರುವಾರ ಮಧ್ಯಾಹ್ನ 1ಕ್ಕೆ ಆರಂಭವಾಗುವ ಹುಣ್ಣಿಮೆಯು ಶುಕ್ರವಾರ ಮಧ್ಯಾಹ್ನ 1 ಗಂಟೆಗೆ ಮುಗಿಯುತ್ತದೆ. ಹುಣ್ಣಿಮೆ ಮುಗಿದ ಬಳಿಕ ಕಾಮನನ್ನು ಸುಡುವುದು ಸರಿಯಲ್ಲ. ಮೇಲಾಗಿ, ಶುಕ್ರವಾರ ಬೆಳಿಗ್ಗೆಯಿಂದಲೇ ಮೊಸರು ಗಡಿಗೆ ಒಡೆಯುವ ಸ್ಪರ್ಧೆಗಳು ಆರಂಭವಾಗುತ್ತವೆ. ಹಾಗಾಗಿ, ಮುನ್ನಾದಿನವೇ ನಾವು ಬಣ್ಣ ಎರಚಾಟ ಮಾಡಿ, ಕಾಮನ ಪ್ರತಿಮೆ ಸುಡುವ ಪದ್ಧತಿ ರೂಢಿಸಿಕೊಂಡಿದ್ದೇವೆ’ ಎಂದು ಮುಖಂಡ ಬಾಬುರಾವ್‌ ತಿಳಿಸಿದರು.

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು