ಖಾಸಗಿ ಜಮೀನಿನಲ್ಲಿ ಮರಗಳ ಸರ್ವೇಗೆ ವಿರೋಧ: ಪ್ರತಿಭಟನೆ ಎಚ್ಚರಿಕೆ

‘ಸರ್ಕಾರ ಹೊರಡಿಸಿರುವ ಈ ಆದೇಶ ನಮ್ಮ ಹಕ್ಕನ್ನು ಕಿತ್ತು ಕೊಂಡಂತೆ. ಇಲ್ಲಿರುವ ರೈತರು, ಬೆಳೆಗಾರರು ಯಾರು ಸಹ ಮರಗಳನ್ನು ತೆಗೆದು ತೋಟ ಮಾಡುವುದಿಲ್ಲ ಎಂಬ ಕನಿಷ್ಠ ತಿಳಿವಳಿಕೆಯು ಸರ್ಕಾರಕ್ಕಿಲ್ಲವೇ’ ಎಂದು ಬಿಜೆಪಿ ಜಿಲ್ಲಾ ಘಟಕದ ಅಧ್ಯಕ್ಷ ನಾಪಂಡ ರವಿ ಕಾಳಪ್ಪ ಇಲ್ಲಿ ಶನಿವಾರ ಸುದ್ದಿಗೋಷ್ಠಿಯಲ್ಲಿ ಪ್ರಶ್ನಿಸಿದರು.

ಕೊಡಗಿನ ಬೆಳೆಗಾರರು ಅರಣ್ಯ ನಾಶ ಮಾಡಿದ ಉದಾಹರಣೆಗಳೇ ಇಲ್ಲ. ಶತಮಾನಗಳಿಂದ ಇಲ್ಲಿರುವ ಮರಗಳನ್ನು ಜತನದಿಂದ ಕಾಪಾಡಿಕೊಂಡಿದ್ದಾರೆ. ಈಗ ಸರ್ವೇ ಕಾರ್ಯ ನಡೆಸಿ ಮರಗಳ ಲೆಕ್ಕವನ್ನು ತೆಗೆದಿಟ್ಟುಕೊಂಡಲ್ಲಿ ಮುಂದೆ ಮರಗಳು ಕಳ್ಳತನವಾದರೆ ಹಾಗೂ ಪ್ರಕೃತಿ ವಿಕೋಪದಿಂದ ಮರಗಳು ಬಿದ್ದು ಹೋದರೆ ಯಾರು ಹೊಣೆ ಎಂದು ಅವರು ಪ್ರಶ್ನಿಸಿದರು.

ಈ ಹೊಣೆಗಾರಿಕೆಗೆ ಹೆದರಿ ಸರ್ವೇ ಕಾರ್ಯಕ್ಕೂ ಮುನ್ನವೇ ಬೆಳೆಗಾರರು ತಮ್ಮಲ್ಲಿರುವ ಮರಗಳನ್ನು ಕಡಿಯುವ ಸಾಧ್ಯತೆಯೂ ಹೆಚ್ಚಿದೆ. ಈ ಅಪಕ್ವ ಆದೇಶದಿಂದ ಅರಣ್ಯ ಇಲಾಖೆಯೇ ಕಾಡುಗಳ ನಾಶಕ್ಕೆ ಕಾರಣವಾಗಲಿದೆ ಎಂದು ಅವರು ಕಿಡಿಕಾರಿದರು.’

ಈಗಾಗಲೇ ಅಧಿಕಾರಿಗಳು ಒಂದಿಷ್ಟು ಗ್ರಾಮಗಳ ಪಟ್ಟಿ ಮಾಡಿದ್ದಾರೆ. ನಿಜವಾಗಿಯೂ ಅಧಿಕಾರಿಗಳು ಹಾಗೂ ಸಿಬ್ಬಂದಿ ತೋಟಗಳಿಗೆ ತೆರಳಿ ಸರ್ವೇ ಕಾರ್ಯ ನಡೆಸಿರುವ ಕುರಿತೂ ಅನುಮಾನಗಳಿವೆ. ಕಚೇರಿಯಲ್ಲಿ ಕುಳಿತು ತಾವೇ ಒಂದಿಷ್ಟು ಸಂಖ್ಯೆಯ ಮರಗಳಿವೆ ಎಂದು ಪಟ್ಟಿ ತಯಾರಿಸಿರುವ ಸಾಧ್ಯತೆಯೂ ಇದೆ. ಕೂಡಲೇ ಈ ಬಗೆಯ ಪ್ರಯತ್ನಗಳನ್ನು ಕೈಬಿಡಬೇಕು ಎಂದು ಅವರು ಒತ್ತಾಯಿಸಿದರು.

ಮುಖ್ಯಮಂತ್ರಿ ಕಾನೂನು ಸಲಹೆಗಾರರು ಮೊದಲು ಅರಣ್ಯದಲ್ಲಿರುವ ಮರಗಳ ಸರ್ವೇ ಕಾರ್ಯ ನಡೆಸಿ ಅದರ ಪಟ್ಟಿ ತಯಾರಿಸಿ ಅವುಗಳ ಉಳಿವಿಗೆ ಮುಂದಾಗುವಂತಹ ಸಲಹೆಗಳನ್ನು ಮುಖ್ಯಮಂತ್ರಿಗೆ ನೀಡಲಿ. ಅದು ಬಿಟ್ಟು ರೈತರಿಗೆ, ಬೆಳೆಗಾರರಿಗೆ ತೊಂದರೆಯಾಗುವಂತಹ ಇಂತಹ ಆದೇಶಗಳನ್ನು ಹೊರಡಿಸಲು ಅವರು ಬಿಡಬಾರದು ಎಂದು ಸಲಹೆ ನೀಡಿದರು.

ಬಿಜೆಪಿ ಮುಖಂಡ ಎಂ.ಪಿ.ಸುನಿಲ್ ಸುಬ್ರಮಣಿ ಮಾತನಾಡಿ, ‘ತಲೆತಲಾಂತರಗಳಿಂದ ಅನುಭವಿಸಿಕೊಂಡು ಬಂದ ರೈತರು, ಬೆಳೆಗಾರರ ಖಾಸಗಿ ಆಸ್ತಿಗಳಿಗೆ ಅರಣ್ಯ ಇಲಾಖೆ ಸಿಬ್ಬಂದಿ ನುಗ್ಗುವುದು ಬೇಡ. ಇದು ಅನಗತ್ಯ ಕಾಟ. ಕೊಡಗಿಗೆ ಮಾರಕವಾದ ಆದೇಶ. ಮುಖ್ಯಮಂತ್ರಿಯ ಕಾನೂನು ಸಲಹೆಗಾರರಿಗೂ ಇಲ್ಲಿ ತೋಟ ಇದೆ ಎಂಬುದನ್ನು ಅವರು ಮರೆಯಬಾರದು’ ಎಂದು ಹೇಳಿದರು.

ಮುಂದಿನ 24 ಗಂಟೆಗಳಲ್ಲಿ ಮಾರಕವಾಗಿರುವ ಈ ಆದೇಶವನ್ನು ವಾಪಸ್ ಪಡೆಯದೇ ಹೋದಲ್ಲಿ ಹೋರಾಟ ರೂಪಿಸಲಾಗುವುದು ಎಂದು ಎಚ್ಚರಿಕೆ ನೀಡಿದರು.

ಪಕ್ಷದ ಜಿಲ್ಲಾ ಘಟಕದ ಪ್ರಧಾನ ಕಾರ್ಯದರ್ಶಿಗಳಾದ ಮಹೇಶ್‌ ಜೈನಿ, ಚಲನ್‌ಕುಮಾರ್, ವಿ.ಕೆ.ಲೋಕೇಶ್, ಜಿಲ್ಲಾ ವಕ್ತಾರ ಬಿ.ಕೆ.ಅರುಣ್‌ಕುಮಾರ್ ಭಾಗವಹಿಸಿದ್ದರು.