ಶನಿವಾರ, ಜೂಲೈ 11, 2020
26 °C
ಕಾಲುವೆ ನಿರಂತರ ಒತ್ತುವರಿ, ಜಾಗ ಕಬಳಿಸುವ ಪ್ರಯತ್ನ

ರಾಜಕಾಲುವೆಯಲ್ಲಿ ನಿವೇಶನ ವಿಂಗಡಣೆ

ಕಾಂತರಾಜ್ Updated:

ಅಕ್ಷರ ಗಾತ್ರ : | |

ಬಂಗಾರಪೇಟೆ ಅಮರಾವತಿ ನಗರದ ಗಾಯತ್ರಿ ದೇಗುಲದ ಬಳಿ ರಾಜಕಾಲುವೆಗೆ ಮಣ್ಣು ಸುರಿದಿರುವುದು

ಬಂಗಾರಪೇಟೆ: ಪಟ್ಟಣದ ಗಾಯತ್ರಿ ದೇಗುಲದ ಬಳಿ ರಾಜಕಾಲುವೆಗೆ ಮಣ್ಣು ತಳ್ಳಿ ನಿವೇಶನ ವಿಂಗಡಿಸುವ ಪ್ರಯತ್ನ ಸದ್ದಿಲ್ಲದೆ ನಡೆದಿದೆ.

ಪಟ್ಟಣದ ದೊಡ್ಡಕೆರೆ ಮತ್ತು ಅತ್ತಿಗಿರಿಕೊಪ್ಪ ಕೆರೆಗೆ ಸಂಪರ್ಕ ಕಲ್ಪಿಸುವ ವಿಸ್ತಾರವಾದ ಈ ರಾಜಕಾಲುವೆ ಅಮರಾವತಿ ನಗರ, ಕುಪ್ಪಸ್ವಾಮಿ ಮದುಲಿಯಾರ್ ಬಡಾವಣೆ, ಮುನಿಯಮ್ಮ ಬಡಾವಣೆ ಸೇರಿದಂತೆ ಕೆಲ ಬಡಾವಣೆಗಳ ಮೂಲಕ ಹಾದುಹೋಗಿದೆ.

ಪ್ರಸ್ತುತ ಕಾಲುವೆಗೆ ಮಣ್ಣು ತಳ್ಳಿರುವ ಜಾಗವನ್ನು ಕಬಳಿಸಲು ಹಲವು ವರ್ಷದಿಂದ ಪ್ರಯತ್ನ ನಡೆದಿದೆ. ಗಾಯತ್ರಿ ವಿಪ್ರಭವನದ ಪೂರ್ವಕ್ಕೆ ಸುಮಾರು 150 ಅಡಿ ವಿಸ್ತಾರವಾದ ಕಾಲುವೆ ಜಾಗವಿದ್ದು, ಅದನ್ನು ನಿವೇಶನವನ್ನಾಗಿ ವಿಂಗಡಿಸಿ ಕೋಟಿಗಟ್ಟಲೆ ಲಾಭ ಗಳಿಸುವ ಹುನ್ನಾರ ನಡೆದಿದೆ.

ಪ್ರಜಾವಾಣಿ ವರದಿ: ಡಿ.ಕೆ.ರವಿ ಜಿಲ್ಲಾಧಿಕಾರಿಯಾಗಿದ್ದ ಸಂದರ್ಭ ಇದೇ ಜಾಗದಲ್ಲಿ ಮಣ್ಣುರಾಶಿ ಹಾಕಿ ಕಾಲುವೆ ಮಚ್ಚುವ ಪ್ರಯತ್ನ ನಡೆದಿತ್ತು. ಈ ಬಗ್ಗೆ ‘ಪ್ರಜಾವಾಣಿ’ಯಲ್ಲಿ ವರದಿ ಪ್ರಕಟಗೊಂಡ ಕೂಡಲೆ ಎಚ್ಚೆತ್ತುಕೊಂಡ ಅಂದಿನ ಪುರಸಭೆ ಅಧಿಕಾರಿಗಳು ಕಾಲುವೆಗೆ ಮಣ್ಣು ಹಾಕದಂತೆ
ತಡೆದಿದ್ದರು.

ಆರು ವರ್ಷದಿಂದ ತಟಸ್ಥವಾಗಿದ್ದ ಪ್ರಭಾವಿ ವ್ಯಕ್ತಿ ಈಗ ಏಕಾಏಕಿ ಕಾಲುವೆಗೆ ಮಣ್ಣು ಸುರಿದು ನಿವೇಶನ ವಿಂಗಡಿಸಿರುವುದು ಹಲವು ಅನುಮಾನಕ್ಕೆ ಎಡೆಮಾಡಿದೆ. ಕಾಲುವೆ ಒತ್ತುವರಿಯಿಂದಾಗಿ ಸುಮಾರು 150 ಅಡಿ ವಿಸ್ತಾರವಾದ ಕಾಲುವೆ ಕೆಲವೆಡೆ 40-50 ಅಡಿಗೆ ಕುಗ್ಗಿದೆ.

ಹದ್ದು ಮೀರಿದ ಹಳ್ಳ: ಸುಮಾರು 25ಕ್ಕಿಂತ ಹೆಚ್ಚು ಕೆರೆಗಳಲ್ಲಿನ ನೀರು ಕಾಲುವೆಯಲ್ಲಿ ಹರಿಯಲಿದ್ದು ‘ಹದ್ದು ಮೀರಿದ ಹಳ್ಳ’ ಎನ್ನುವ ಹೆಸರಿದೆ. 2005ರಲ್ಲಿ ಅತಿವೃಷ್ಠಿಯಾದ ಸಂದರ್ಭದಲ್ಲಿ ಕಾಲುವೆ ಸಮೀಪದ ಮೂರು ನಗರಗಳ ಬಹುತೇಕ ಮನೆಗಳಿಗೆ ನೀರು ನುಗ್ಗಿ ದೊಡ್ಡ ಅವಾಂತರವೇ ಸೃಷ್ಟಿಯಾಗಿತ್ತು.

ಅಂದಿನ ಮುಖ್ಯಮಂತ್ರಿ ಧರ್ಮಸಿಂಗ್, ಅಂದು ವಿರೋಧ ಪಕ್ಷದ ನಾಯಕರಾಗಿದ್ದ ಈಗಿನ ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ, ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡ ಮತ್ತಿತರರು ಸ್ಥಳಕ್ಕೆ ಭೇಟಿ ನೀಡಿ, ಒತ್ತುವರಿ ತೆರವುಗೊಳಿಸುವಂತೆ ಆದೇಶಿಸಿದ್ದರು. ಕಾಲುವೆ ವಿಸ್ತರಣೆಗೆ ₹50 ಲಕ್ಷ ಅನುದಾನ ಕೂಡ ಬಿಡುಗಡೆ ಮಾಡಲಾಗಿತ್ತು. ಆದರೆ ಕಾಲುವೆ ವಿಸ್ತರಣೆ ಕಾರ್ಯ ಮಾತ್ರ ನಡೆದಿಲ್ಲ ಎನ್ನುವುದು ಸ್ಥಳೀಯರ ಕೊರುಗು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು