ಭಾನುವಾರ, ಸೆಪ್ಟೆಂಬರ್ 26, 2021
21 °C
ವಿಶ್ವ ಜನಸಂಖ್ಯಾ ದಿನಾಚರಣೆ; ಜನಸಂಖ್ಯಾ ಬೆಳವಣಿಗೆಯ ವೇಗ ತಗ್ಗಿಸುವಲ್ಲಿ ಮಹಿಳೆಯರ ಪಾತ್ರ ಅಪಾರ

ಕುಟುಂಬ ಕಲ್ಯಾಣ ಯೋಜನೆಗೆ ಪುರುಷರ ನಿರಾಸಕ್ತಿ..!

ಡಿ.ಬಿ.ನಾಗರಾಜ Updated:

ಅಕ್ಷರ ಗಾತ್ರ : | |

ವಿಜಯಪುರ: ಕುಟುಂಬ ಕಲ್ಯಾಣ ಯೋಜನೆಯಡಿ ಶಾಶ್ವತವಾಗಿ ಮಕ್ಕಳಾಗದಂತೆ, ಸಂತಾನ ಹರಣ ಶಸ್ತ್ರಚಿಕಿತ್ಸೆಗೆ ಒಳಪಡುವುದಕ್ಕೆ ಪುರುಷರು ಹಿಂದೇಟು ಹಾಕುವುದು ಜಿಲ್ಲೆಯ ವ್ಯಾಪ್ತಿಯಲ್ಲಿ ಯಥಾ ಪ್ರಕಾರ ಮುಂದುವರೆದಿದೆ.

ಕುಟುಂಬ ಕಲ್ಯಾಣ ಮತ್ತು ಆರೋಗ್ಯ ಇಲಾಖೆ ಜಿಲ್ಲೆಯ ವಿವಿಧೆಡೆ ಈ ಕುರಿತಂತೆ ಹಲ ಜಾಗೃತಿ ಕಾರ್ಯಕ್ರಮ, ಶಿಬಿರದ ಮೂಲಕ ಸಮುದಾಯದಲ್ಲಿ ತಿಳಿವಳಿಕೆ ಮೂಡಿಸಿದರೂ; ವರ್ಷದ ಅವಧಿಯಲ್ಲಿ ಯೋಜನೆಯಡಿ ಸಂತಾನಹರಣ ಶಸ್ತ್ರಚಿಕಿತ್ಸೆಗೆ ಒಳಪಟ್ಟ ಪುರುಷರ ಸಂಖ್ಯೆ ಕೇವಲ 16.

ಮಹಿಳೆಯರು ಮಾತ್ರ ಹೆಚ್ಚಿನ ಸಂಖ್ಯೆಯಲ್ಲಿ ಸಂತಾನಹರಣ ಶಸ್ತ್ರಚಿಕಿತ್ಸೆಗೆ ಒಳಪಡುತ್ತಿದ್ದಾರೆ. ವರ್ಷದಿಂದ ವರ್ಷಕ್ಕೆ ಈ ಸಂಖ್ಯೆ ಹೆಚ್ಚುತ್ತಿದೆ. ಹಿಂದಿನ ವರ್ಷ ನಿಗದಿಪಡಿಸಿದ ಗುರಿಯಲ್ಲಿ ಮಹಿಳೆಯರ ಶಸ್ತ್ರ ಚಿಕಿತ್ಸೆ ವಿಭಾಗದಲ್ಲಿ 83% ಗುರಿ ಸಾಧಿಸಿದ್ದರೆ, ಪುರುಷರ ವಿಭಾಗದಲ್ಲಿನ ಸಾಧನೆ ಅಷ್ಟಿಲ್ಲಾ ಎಂದು ಜಿಲ್ಲಾ ಆರೋಗ್ಯ ಇಲಾಖೆಯ ಮೂಲಗಳು ತಿಳಿಸಿವೆ.

ಹಿಂಜರಿಕೆ:  ‘ಸಂತಾನಹರಣ ಶಸ್ತ್ರಚಿಕಿತ್ಸೆಗೆ ಒಳಪಡುವಲ್ಲಿ ಪುರುಷರು ವ್ಯಾಪಕ ಪ್ರಮಾಣದಲ್ಲಿ ಹಿಂಜರಿಯುತ್ತಿದ್ದಾರೆ. ಸಾಕಷ್ಟು ಮಾಹಿತಿ, ವಿಶ್ವಾಸ ತುಂಬಿದರೂ ಶಸ್ತ್ರಚಿಕಿತ್ಸೆಗೆ ಒಳಗಾಗಲು ಒಲ್ಲೆ ಎನ್ನುತ್ತಾರೆ’ ಎಂದು ಜಿಲ್ಲಾ ಆರೋಗ್ಯ ಇಲಾಖೆಯ ಆರ್‌ಸಿಎಚ್‌ ಅಧಿಕಾರಿ ಸುರೇಶ ಚವ್ಹಾಣ ತಿಳಿಸಿದರು.

‘ಶಸ್ತ್ರಚಿಕಿತ್ಸೆಗೆ ಒಳಪಟ್ಟರೇ ಕೆಲಸ ಮಾಡಲು ತೊಂದರೆಯಾಗಲಿದೆ. ಶಕ್ತಿ ಕಳೆದುಕೊಳ್ಳಲಿದ್ದೇವೆ ಎಂಬ ಅಪನಂಬಿಕೆ, ಮೂಢನಂಬಿಕೆಯೇ ಬಹುಪಾಲು ಗಂಡಸರಲ್ಲಿ ತುಂಬಿದೆ. ಇದರ ಜತೆಗೆ ಬಹುತೇಕರು ತಮಗೆ ತಲಾ ಒಂದು ಗಂಡು, ಹೆಣ್ಣು ಮಗುವಾಗುತ್ತಿದ್ದಂತೆ, ಮಹಿಳೆಗೆ ಸಂತಾನಹರಣ ಶಸ್ತ್ರಚಿಕಿತ್ಸೆ ಮಾಡಿಸುತ್ತಾರೆ. ಈಚೆಗಿನ ದಿನಗಳಲ್ಲಿ ಬಹುತೇಕ ಹೆರಿಗೆಗಳು ಸಿಝೇರಿಯನ್‌ ಆಗುತ್ತಿರುವುದು ಸಹ ಕುಟುಂಬ ಯೋಜನೆಯಲ್ಲಿ ಪುರುಷರ ಪಾಲ್ಗೊಳ್ಳುವಿಕೆಯನ್ನು ತಗ್ಗಿಸುತ್ತಿದೆ’ ಎಂದು ಅವರು ವಿಶ್ಲೇಷಿಸಿದರು.

‘ಕೆಲ ತಿಂಗಳ ಹಿಂದಷ್ಟೇ ಈ ನಿಟ್ಟಿನಲ್ಲಿ ಶಿಬಿರ, ಕಾರ್ಯಾಗಾರ ಆಯೋಜಿಸಿದ್ದೆವು. ವಿದ್ಯಾವಂತರು, ನೌಕರಸ್ತರನ್ನೇ ಆಹ್ವಾನಿಸಿದ್ದೆವು. ಕುಟುಂಬ ಕಲ್ಯಾಣ ಯೋಜನೆ, ಶಸ್ತ್ರಚಿಕಿತ್ಸೆ ಕುರಿತಂತೆ ತಿಳಿ ಹೇಳಿದೆವು. ಇಲಾಖೆ ವತಿಯಿಂದ ಸಾಕಷ್ಟು ಜಾಗೃತಿ ಮೂಡಿಸಿದೆವು. ಆದರೆ ನಿರೀಕ್ಷಿತ ಫಲಿತಾಂಶ ಮಾತ್ರ ದೊರಕಲಿಲ್ಲ’ ಎಂದು ಚವ್ಹಾಣ ಬೇಸರ ವ್ಯಕ್ತಪಡಿಸಿದರು.

ಕಾಪರ್ಟಿಗೆ ಮಹಿಳೆಯರಲ್ಲೂ ಆತಂಕ:  ‘ಜನಸಂಖ್ಯೆಯ ವೇಗದ ಬೆಳವಣಿಗೆ ತಡೆಗಟ್ಟಲು ಆರೋಗ್ಯ ಇಲಾಖೆ ಹೆರಿಗೆಗೊಳಗಾದ ಮಹಿಳೆಯ ಕುಟುಂಬ ವರ್ಗದ ಮನವೊಲಿಸಿ, ಕಾಪರ್‌ಟಿ ಅಳವಡಿಸುವ ಯೋಜನೆಯೂ ನಿಗದಿತ ಗುರಿ ಸಾಧಿಸಲು ಸಾಧ್ಯವಾಗಿಲ್ಲ. ಇದಕ್ಕೆ ಮಹಿಳೆಯರಲ್ಲಿನ ಆತಂಕವೇ ಹೆಚ್ಚಿನ ಅಡ್ಡಿಯಾಗುತ್ತಿದೆ’ ಎಂದು ಸುರೇಶ ಹೇಳಿದರು.

‘ಹೆರಿಗೆಯಾದ ನಂತರ ಮಹಿಳೆಗೆ ಕಾಪರ್‌ಟಿ ಅಳವಡಿಸಿದರೆ 10 ವರ್ಷ ಮಗುವಾಗುವುದನ್ನು ತಡೆಗಟ್ಟುತ್ತದೆ. ಆದರೆ ಮಹಿಳೆಯರಿಗೆ ಕಾಪರ್‌ಟಿ ಬಗ್ಗೆಯೇ ಅಪನಂಬಿಕೆ. ಮೂಢನಂಬಿಕೆ. ಎಷ್ಟೇ ತಿಳಿವಳಿಕೆ ಮೂಡಿಸಿದರೂ ಅಳವಡಿಸಿಕೊಳ್ಳಲು ಮುಂದಾಗುವವರ ಸಂಖ್ಯೆ ಕಡಿಮೆಯಿರುತ್ತದೆ. ಇದರಿಂದ ಯೋಜನೆಯಡಿ ಹೆರಿಗೆಯಾದ ಮಹಿಳೆಯರ ಸಂಖ್ಯೆಯ 25% ಗುರಿ ದಾಟಲು ಸಾಧ್ಯವಾಗುತ್ತಿಲ್ಲ’ ಎಂದು ಅವರು ತಿಳಿಸಿದರು.

ಚುಚ್ಚುಮದ್ದಿಗೆ ಬೇಡಿಕೆ:  ‘ಮಕ್ಕಳಾಗುವುದನ್ನು ತಡೆಗಟ್ಟುವ ಚುಚ್ಚುಮದ್ದನ್ನು ಆರೋಗ್ಯ ಇಲಾಖೆ ವರ್ಷದ ಹಿಂದಷ್ಟೇ ಜಿಲ್ಲೆಯಲ್ಲಿ ಪರಿಚಯಿಸಿತ್ತು. ಇದಕ್ಕೆ ಸಮುದಾಯದಿಂದ ಸಾಕಷ್ಟು ಬೇಡಿಕೆಯಿದೆ’ ಎಂದು ಸುರೇಶ ಮಾಹಿತಿ ನೀಡಿದರು.  ‘ಆರಂಭದಲ್ಲಿ ಜಿಲ್ಲೆಗೆ ಕೇವಲ 300 ಚುಚ್ಚುಮದ್ದು ಪೂರೈಸಿದ್ದರು. ಮೂರು ತಿಂಗಳಿಗೊಮ್ಮೆ ಈ ಚುಚ್ಚುಮದ್ದನ್ನು ತೆಗೆದುಕೊಂಡರೇ ಮಕ್ಕಳಾಗುವುದನ್ನು ಮುಂದೂಡಬಹುದು. ಪೂರೈಸಿದ್ದ ಚುಚ್ಚುಮದ್ದು ಕೆಲ ದಿನಗಳಲ್ಲೇ ಖಾಲಿಯಾಗಿದ್ದವು. ನಂತರ 500 ಪೂರೈಸಿದ್ದರು. ಇವು ಮುಗಿಯುವ ಹಂತಕ್ಕೆ ಬಂದಿವೆ’ ಎಂದು ಅವರು ಹೇಳಿದರು.

ಇದೇ 24ರವರೆಗೆ ಜಿಲ್ಲೆಯ ತಾಲ್ಲೂಕು ಆಸ್ಪತ್ರೆ, ಸಮುದಾಯ ಆರೋಗ್ಯ ಕೇಂದ್ರಗಳಲ್ಲಿ ಸಂತಾನಹರಣ ಶಸ್ತ್ರಚಿಕಿತ್ಸಾ ಶಿಬಿರ ನಡೆಯಲಿವೆ. ವೈದ್ಯರಿಗೆ ಸೂಚನೆಯನ್ನು ನೀಡಿದ್ದೇವೆ
ಡಾ.ಜ್ಯೋತಿ ಪಾಟೀಲ, ಕುಟುಂಬ ಕಲ್ಯಾಣ ಅಧಿಕಾರಿ

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು