10 ರಿಂದ ಮುಂಡರಗಿ ಶಿವರಾಯನ ಜಾತ್ರಾ ವೈಭವ

7

10 ರಿಂದ ಮುಂಡರಗಿ ಶಿವರಾಯನ ಜಾತ್ರಾ ವೈಭವ

Published:
Updated:
Deccan Herald

ರಾಯಚೂರು: ಜಿಲ್ಲೆಯ ದೇವದುರ್ಗ ತಾಲ್ಲೂಕು ಮುಂಡರಗಿ ಶಿವರಾಯನ ಜಾತ್ರಾಮಹೋತ್ಸವವು ಸೆಪ್ಟಂಬರ್ 10 ರಿಂದ 15 ದಿನಗಳವರೆಗೆ ವಿಜೃಂಭಣೆಯಿಂದ ನಡೆಯಲಿದೆ.

ಸೋಮವಾರ ರಾತ್ರಿಯಿಡೀ ಭಕ್ತರು ಪೂಜಾ ಕೈಂಕರ್ಯಗಳನ್ನು ನೆರವೇರಿಸುವರು. ಹತ್ತಾರು ಕಬ್ಬಿಣದ ಗುಂಡುಗಳ ಗೊಂಚಲಿನಿಂದ ಮೈಗೆ ಹೊಡೆದುಕೊಳ್ಳುವುದು, ಅಲಗಿನಿಂದ ಮೈಗೆ ಚುಚ್ಚಿಕೊಳ್ಳುವುದು, ಕಬ್ಬಿಣದ ಸರಪಳಿಯನ್ನು ಹರಿಯುವುದು ನೋಡುಗರ ಮೈನವಿರೇಳುಸುವಂತೆ ಮಾಡುತ್ತದೆ.

1875ರಲ್ಲಿ ನಿರ್ಮಾಣವಾದ ಈ ದೇವಸ್ಥಾನದ ಮೂಲ ಪುರುಷ ನರಸಣ್ಣ ಮುತ್ಯಾ. ಸದ್ಯ ಇರುವ ಶಿವರಾಯ ತಾತನ ಹೇಳಿಕೆ ಭಕ್ತಾದಿಗಳಿಗೆ ತುಂಬಾ ಮಹತ್ವದ್ದಾಗಿದೆ. ಮಳೆ ಬೆಳೆ ಕುರಿತ ಹೇಳಿಕೆಗಳು ನಿಜವಾಗಿವೆ. ರಾತ್ರಿ ಧಾರ್ಮಿಕ ಕಾರ್ಯಕ್ರಮಗಳು ಮುಗಿದ ನಂತರ ನಸುಕಿನ ಜಾವ ತಾತನ ಹೇಳಿಕೆಗಳು ಆರಂಭವಾಗುತ್ತವೆ. ತಾತನ ಹೇಳಿಕೆಯನ್ನು ಕೇಳಲು ಸಾವಿರಾರು ಭಕ್ತರು ತುದಿಗಾಲನಲ್ಲಿ ಕಾಯುತ್ತಿರುತ್ತಾರೆ.

ಮುಂಡರಗಿಯಿಂದ 10 ಕಿ.ಮೀ ದೂರದಲ್ಲಿರುವ ಊಟಿ ಬಸವಣ್ಣ ಸ್ಥಳದಿಂದ ಕುಂಭದಲ್ಲಿ ನೀರು ಸಂಗ್ರಹಿಸಿ ಅಲ್ಲಿಂದ ಮೆರವಣಿಗೆಯೊಂದಿಗೆ ತಂದು ಶಿವರಾಯನಿಗೆ ಪೂಜೆ ನೆರವೇರಿಸುವರು. ಗುಡ್ಡದ ಮೇಲಿರುವ ದೇವಸ್ಥಾನಕ್ಕೆ ಹೋಗಲು ಕೆಳಭಾಗದಿಂದ ಕಾಂಕ್ರಿಟ್ ರಸ್ತೆ ನಿರ್ಮಿಸಲಾಗಿದೆ. ಸುಮಾರು ಒಂದುವರೆ ಶತಮಾನದಷ್ಟು ಹಳೆಯದಾದ ದೇವಸ್ಥಾನದಲ್ಲಿ ಬೃಹದಾಕಾರ ಬಂಡೆಯ ಮೇಲೆ ಹಳೆಯ ಶಾಸನವಿದೆ. ಈ ಶಾಸನದ ಕುರಿತು ಮಾಹಿತಿ ಇನ್ನೂ ಯಾರಿಗೂ ಲಭಿಸಿಲ್ಲ ಎಂದು ಅರ್ಚಕರು ಹೇಳುತ್ತಾರೆ.

ದೇವಸ್ಥಾನದಲ್ಲಿರುವ ಹರಕೆ ಕಲ್ಲನ್ನು ಪ್ರತಿಯೊಬ್ಬ ಭಕ್ತನು ಎತ್ತುವುದು ಇಲ್ಲಿನ ವಿಶೇಷತೆ. ತಮಗೆ ನೆರವೇರಬೇಕಾದ ಕಾರ್ಯಗಳನ್ನು ಮನಸ್ಸಿನಲ್ಲಿ ಅಂದುಕೊಂಡು ಕಲ್ಲನ್ನು ಎತ್ತಿವರು. ಅದು ಅನಾಯಾಸವಾಗಿ ಕೈಗೆ ಬಂದರೆ ಕಾರ್ಯ ನೆರವೇರುವುದು. ಇಲ್ಲವಾದರೆ ಕಲ್ಲು ಮೇಲೆ ಬರುವುದಿಲ್ಲ ಎಂಬುದು ಇಲ್ಲಿನ ಜನರ ನಂಬಿಕೆ.
ದೇವಸ್ಥಾನದ ಹೆಬ್ಬಂಡೆಯ ಮೇಲೆ ಪ್ರತಿಷ್ಠಾಪಿಸಿರುವ ಪರಶಿವನ ಮೂರ್ತಿಯು ಭಕ್ತರನ್ನು ಆಕರ್ಷಿಸುತ್ತದೆ. ದೇವಸ್ಥಾನದ ಕೆಳಗೆ ಪಶ್ಚಿಭಿಮುಖವಾಗಿ ಹಳ್ಳ ಹರಿಯುತ್ತಿದ್ದು ಸುತ್ತಲೂ ಹಸಿರಿನಿಂದ ಕೂಡಿದೆ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !