ರಾಮನಗರ | ದ್ವಿತೀಯ ಪಿಯು ಪರೀಕ್ಷೆ: ಜಿಲ್ಲೆಯ 8,733 ವಿದ್ಯಾರ್ಥಿಗಳು ಸಜ್ಜು

ತಿಂಗಳ ಹಿಂದೆಯೇ ವೇಳಾಪಟ್ಟಿ ಪ್ರಕಟವಾಗಿದ್ದು, ಕಾಲೇಜುಗಳಲ್ಲಿ ಪಾಠ–ಪ್ರವಚನ ಎಲ್ಲವೂ ಮುಗಿದಿದೆ. ಭವಿಷ್ಯದ ಮಾರ್ಗಸೂಚಿಯಾದ ದ್ವಿತೀಯ ಪಿಯುಸಿ ಪರೀಕ್ಷೆಯಲ್ಲಿ ಹೆಚ್ಚು ಅಂಕ ಪಡೆಯುವ ನಿಟ್ಟಿನಲ್ಲಿ ವಿದ್ಯಾರ್ಥಿಗಳು ತಯಾರಿ ನಡೆಸುತ್ತಿದ್ದಾರೆ.

ಸಕಲ ಸಜ್ಜು: ‘ಪರೀಕ್ಷೆಯನ್ನು ಸುಗಮವಾಗಿ ನಡೆಸಲು ಇಲಾಖೆ ಎಲ್ಲಾ ರೀತಿಯಲ್ಲಿ ತಯಾರಿ ನಡೆಸಿ ಸಜ್ಜಾಗಿದೆ. ರಾಮನಗರದ 5, ಚನ್ನಪಟ್ಟಣ 3, ಕನಕಪುರ 2, ಮಾಗಡಿ 2 ಹಾಗೂ ಹಾರೋಹಳ್ಳಿ 1 ಪರೀಕ್ಷಾ ಕೇಂದ್ರಗಳು ಸೇರಿದಂತೆ ಒಟ್ಟು 13 ಕಡೆ ಪರೀಕ್ಷೆ ನಡೆಯಲಿದೆ’ ಎಂದು ಶಾಲಾ ಶಿಕ್ಷಣ ಇಲಾಖೆಯ (ಪದವಿ ಪೂರ್ವ) ಉಪ ನಿರ್ದೇಶಕಿ ನಾಗಮ್ಮ ಎಂ.ಪಿ ಅವರು ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಈ ಸಲ ಪರೀಕ್ಷೆ ಬರೆಯುತ್ತಿರುವವರಲ್ಲಿ ವಿಜ್ಞಾನ ವಿಭಾಗದ ವಿದ್ಯಾರ್ಥಿಗಳೇ ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ. ಈ ವಿಭಾಗದಿಂದ 3,556, ಕಲಾ ವಿಭಾಗದಲ್ಲಿ 2,144 ಹಾಗೂ ವಾಣಿಜ್ಯದಲ್ಲಿ 2,052 ವಿದ್ಯಾರ್ಥಿಗಳು ಪರೀಕ್ಷೆ ಎದುರಿಸಲಿದ್ದಾರೆ’ ಎಂದರು.

‘ಪರೀಕ್ಷೆ ಎದುರಿಸುವವರ ಪೈಕಿ 4,286 ಬಾಲಕಿಯರು ಹಾಗೂ 3,476 ಬಾಲಕರಿದ್ದಾರೆ. ಈ ಸಲ ಮರು ಪರೀಕ್ಷೆಗೆ ಹಾಜರಾಗುತ್ತಿರುವವರು 715 ಹಾಗೂ ಖಾಸಗಿಯಾಗಿ ಪರೀಕ್ಷೆ ಎದುರಿಸುವವರು 256 ಮಂದಿ ಇದ್ದಾರೆ’ ಎಂದು ಹೇಳಿದರು.