ರೈತನ ಮೇಲೆ ದಾಳಿ; ಚಿರತೆ ಸೆರೆ

ಗುಬ್ಬಿ: ತೋಟಕ್ಕೆ ತೆರಳಿದ್ದ ರೈತನ ಕಿವಿ ಕಚ್ಚಿ ತುಂಡರಿಸಿ, ಗಾಯಗೊಳಿಸಿ ಪೊದೆ ಸೇರಿದ್ದ ಕರಡಿಯನ್ನು ಅರಣ್ಯ ಇಲಾಖೆ ಸೆರೆ ಹಿಡಿದಿದೆ.

ತಾಲ್ಲೂಕಿನ ನಿಟ್ಟೂರು ಹೋಬಳಿ ಮುದ್ದುಪುರ ಗ್ರಾಮದಲ್ಲಿ ಸತತ ನಾಲ್ಕು ಗಂಟೆಗಳ ಕಾರ್ಯಾಚರಣೆ ನಂತರ ಅರಿವಳಿಕೆ ನೀಡಿ ಸೆರೆ ಹಿಡಿಯಲಾಗಿದೆ.

ರೈತ ಮಹದೇವಯ್ಯ (53) ಮುಂಜಾನೆ ತಮ್ಮ ತೋಟಕ್ಕೆ ತೆರಳಿದ್ದ ಸಂದರ್ಭದಲ್ಲಿ ಪೊದೆಯಲ್ಲಿ ಅಡಗಿದ್ದ ಕರಡಿ ದಿಢೀರ್ ದಾಳಿ ನಡೆಸಿ ಕಿವಿಯನ್ನು ಕಚ್ಚಿ ತುಂಡರಿಸಿ ಮೈಮೇಲೆರಗಿ ಪರಚಿ ಗಾಯಗೊಳಿಸಿತ್ತು. ಕಿರುಚಾಟ ಕೇಳಿ ಸ್ಥಳಕ್ಕೆ ಬಂದ ಜನರನ್ನು ಕಂಡು ಪೊದೆ ಸೇರಿತ್ತು.

ವಿಷಯ ತಿಳಿದು ಸ್ಥಳಕ್ಕೆ ಬಂದ ಅರಣ್ಯ ಇಲಾಖೆ ಸಿಬ್ಬಂದಿ ಪೊದೆಯಲ್ಲಿ ಅವಿತ ಕರಡಿ ಹಿಡಿಯಲು ಹಾಸನದ ಅರವಳಿಕೆ ತಜ್ಞ ಡಾ.ಮರುಳೀಧರ್ ನೇತೃತ್ವದ ತಂಡ ಕರೆಸಿದರು. ನಂತರ ಸೆರೆ ಹಿಡಿಯಲಾಯಿತು.

5 ವರ್ಷದ ಗಂಡು ಕರಡಿಯನ್ನು ಬನ್ನೇರುಘಟ್ಟ ಅರಣ್ಯ ಪ್ರದೇಶಕ್ಕೆ ಬಿಡಲಾಯಿತು ಎಂದು ವಲಯ ಅರಣ್ಯಾಧಿಕಾರಿ ರವಿ ತಿಳಿಸಿದರು.