ಮರವಂತೆ-ತ್ರಾಸಿ ಕಡಲತೀರ ರಕ್ಷಣೆಗೆ ಸುಸ್ಥಿರ ಯೋಜನೆ 

7

ಮರವಂತೆ-ತ್ರಾಸಿ ಕಡಲತೀರ ರಕ್ಷಣೆಗೆ ಸುಸ್ಥಿರ ಯೋಜನೆ 

Published:
Updated:
Deccan Herald

ಬೈಂದೂರು : ಕಡಲ್ಕೊರೆತ ತಡೆಗೆ ದಶಕಗಳಿಂದ ಚಾಲ್ತಿಯಲ್ಲಿರುವ ಕಲ್ಲುಗಳ ಜೋಡಣೆ ನಿರೀಕ್ಷಿತ ಯಶಸ್ಸು ನೀಡುತ್ತಿಲ್ಲ. ಅದಕ್ಕಾಗಿ ಈಗ ಸುಸ್ಥಿರ ಕಡಲತೀರ ನಿರ್ವಹಣಾ ಯೋಜನೆ ಕೈಗೆತ್ತಿಕೊಳ್ಳಲಾಗುತ್ತಿದೆ.

ಸಮುದ್ರದ ಅಂಚಿನಲ್ಲಿ ಹೆದ್ದಾರಿ ಹಾದು ಹೋಗುವ ಮರವಂತೆ-ತ್ರಾಸಿ ನಡುವಿನ ಪ್ರದೇಶ ಸಮುದ್ರತೀರ ಕೊರೆತ ದೃಷ್ಟಿಯಿಂದ ಸೂಕ್ಷ್ಮ ಪ್ರದೇಶವಾಗಿರುವುದರಿಂದ ಇಲ್ಲಿ ಏಷ್ಯನ್ ಡೆವಲಪ್‌ಮೆಂಟ್ ಬ್ಯಾಂಕ್‌ನ ರೂ. 83 ಕೋಟಿ ನೆರವಿನಿಂದ ಅಂತಹ ಸುಸ್ಥಿರ ಕಾಮಗಾರಿ ನಡೆಸಲಾಗುತ್ತಿದೆ ಎಂದು ಯೋಜನೆಯ ಗುತ್ತಿಗೆದಾರ ಕೋಸ್ಟಲ್ ಮರೀನ್ ಕನ್ಸ್ಟ್ರಕ್ಷನ್ ಎಂಡ್ ಇಂಜಿನಿಯರಿಂಗ್ (ಕೊಮ್ಯಾಕೊ) ಕಂಪನಿಯ ಉಪ ಪ್ರಬಂಧಕ ಕಿಶೋರ್‌ಕುಮಾರ್ ಹೇಳಿದರು.

ಬುಧವಾರ ಮಾಧ್ಯಮ ಪ್ರತಿನಿಧಿಗಳನ್ನು ಯೋಜನಾ ಪ್ರದೇಶಕ್ಕೆ ಆಹ್ವಾನಿಸಿ ನಡೆಸಿದ ಸುದ್ದಿಗೋಷ್ಠಿಯಲ್ಲಿ ಕಾಮಗಾರಿಯ ಮಾಹಿತಿ ನೀಡಿದರು.

ಇಲ್ಲಿನದು ಕಾಮಗಾರಿ ಸಾಂಪ್ರದಾಯಿಕ ಕಡಲ್ಕೊರೆತ ತಡೆಗೋಡೆಯಲ್ಲ. ಇದರಲ್ಲಿ ಸಮುದ್ರ ದಂಡೆಯುದ್ದಕ್ಕೆ ಕಲ್ಲುಗಳನ್ನು ಜೋಡಿಸುವ ಬದಲಿಗೆ ದಂಡೆಗೆ ಲಂಬವಾಗಿ ಸಮುದ್ರದಲ್ಲಿ ಹೊರಚಾಚಿರುವ ಗ್ರಾಯನ್ ಅಥವಾ ಕರೆಗೋಡೆ ಎಂದು ಕರೆಯಲಾಗುವ ಕಲ್ಲಿನ ನಿರ್ಮಾಣಗಳನ್ನು ರಚಿಸಲಾಗುತ್ತಿದೆ. ಇವು ತೀರ ಪ್ರದೇಶದ ಸವಕಳಿಯನ್ನು ತಡೆಯುತ್ತವೆ. ಅದರ ಜತೆಗೆ ಎರಡು ಗ್ರಾಯನ್‌ಗಳ ನಡುವೆ ಅಲೆಗಳ ಸಹಜ ಪ್ರಕ್ರಿಯೆಯ ಪರಿಣಾಮವಾಗಿ ಮರಳು ಶೇಖರಣೆಯಾಗಿ ಸಮುದ್ರದಂಡೆ ವಿಸ್ತರಿಸುತ್ತದೆ. ಅದರಿಂದ ಬೀಚ್‌ನ ಸೌಂದರ್ಯ ಹೆಚ್ಚುತ್ತದೆ ಎಂದು ಅವರು ಹೇಳಿದರು.

ಕರೆಗೋಡೆಗಳ ತಳದ 1.5 ಮೀಟರ್ ಮರಳನ್ನು ತೆಗೆದು ಅಲ್ಲಿ ಜಿಯೋಫ್ಯಾಬ್ರಿಕ್ ಶೀಟ್ ಹರಡಿ ಅದರ ಮೇಲೆ ಕಲ್ಲುಗಳನ್ನು ಪೇರಿಸಲಾಗುವುದರಿಂದ ಕರೆಗೋಡೆಗಳು ದೀರ್ಘಕಾಲ ಕುಸಿಯದೆ ಉಳಿಯುತ್ತವೆ. ಬಂದರು ಇಲಾಖೆಯ ಉಸ್ತುವಾರಿಯಲ್ಲಿ ಈ ತೆರನಾದ ಕರೆಗೋಡೆಗಳ ನಿರ್ಮಾಣದಲ್ಲಿ ಪರಿಣತಿ ಇರುವ ತಮ್ಮ ಕಂಪನಿ ಕಾಮಗಾರಿ ನಡೆಸುತ್ತಿದೆ. ಮರವಂತೆ-ತ್ರ್ರಾಸಿಯಲ್ಲಿ ಈಗಾಗಲೇ ಶೇ. 40 ಕಾಮಗಾರಿ ಮುಗಿದಿದೆ. ಮುಂದಿನ ವರ್ಷ ಮಾರ್ಚ್‌ಗೆ ಪೂರ್ಣಗೊಳ್ಳಲಿದೆ ಎಂದರು.

ಕಾಮಗಾರಿಯನ್ನು ವೀಕ್ಷಿಸಿದ ಮಾಧ್ಯಮ ಪ್ರತಿನಿಧಿಗಳು ಈಗಾಗಲೇ ಪೂರ್ಣಗೊಂಡ ಕರೆಗೋಡೆಗಳ ನಡುವೆ ಮರಳು ಶೇಖರಣೆಯಾಗಿ ತೀರ ವಿಸ್ತರಣೆಯಾಗಿರುವುದನ್ನು ಗಮನಿಸಿದರು. ಕಂಪನಿಯ ಇಂಜಿನಿಯರ್ ವೆಂಕಟೇಶ ಇದ್ದರು.

 ಕಾಮಗಾರಿಯ ವಿನ್ಯಾಸವನ್ನು ವಿವರಿಸಿದ ಶಿವಕುಮಾರ್ ಎರಡು ಗ್ರಾಮಗಳ 3.5 ಕಿಲೋಮೀಟರ್ ಪ್ರದೇಶದಲ್ಲಿ ಪ್ರತಿ 120 ಮೀಟರ್ ಅಂತರದಲ್ಲಿ 24 ಕರೆಗೋಡೆಗಳನ್ನು ನಿರ್ಮಿಸಲಾಗುತ್ತಿದೆ. ಇವುಗಳಲ್ಲಿ ಸಮುದ್ರ ಹೆದ್ದಾರಿಗೆ ತೀರ ನಿಕಟವಾಗಿರುವ ಸ್ಥಳದಲ್ಲಿ 9 ’ಟಿ’(T ) ಮಾದರಿಯ ಗೋಡೆಗಳು ಮತ್ತು ಉಳಿದೆಡೆ 15 ’ಐ’(I) ಮಾದರಿಯ ಕರೆಗೋಡೆಗಳು ಇರುತ್ತವೆ. ಐ ಕರೆಗೋಡೆಗಳು 100 ಮೀಟರ್ ಉದ್ದ, ತಳದಲ್ಲಿ30 ಮೀಟರ್ ಮತ್ತು ಶಿರದಲ್ಲಿ 4 ಮೀಟರ್ ಅಗಲವಾಗಿರುತ್ತವೆ. ಟಿ ಮಾದರಿಯವು 40 ಮೀಟರ್ ಉದ್ದ, ತಳದಲ್ಲಿ 36 ಮೀಟರ್ ಮತ್ತು ಶಿರದಲ್ಲಿ 5 ಮೀಟರ್ ಅಗಲವಾಗಿರುತ್ತವೆ. ಟಿ ಮಾದರಿಯ ಗೋಡೆ ಒಟ್ಟು 76 ಮೀಟರ್ ಉದ್ದವಾಗಿರುತ್ತವೆ. ಈ 9 ಕರೆಗೋಡೆಗಳ ಹೊರಮೈಯಲ್ಲಿ ಕಾಂಕ್ರೀಟಿನ ಟೆಟ್ರಾಪಾಡ್‌ಗಳ ರಕ್ಷಣೆ ಒದಗಿಸಲಾಗುವುದು ಎಂದರು.

 ಈಗ ನಿರ್ಮಾಣವಾಗುತ್ತಿರುವ ಕರೆಗೋಡೆ ಹೆಚ್ಚು ಸುಸ್ಥಿರ. ಅದರ ಪರಿಣಾಮವಾಗಿ ಮರಳಿನ ದಂಡೆ ಕೊರೆಯಲ್ಪಡುವ ಬದಲು ವಿಸ್ತರಿಸುತ್ತಿರುವುದನ್ನು ಗಮನಿಸಿದ್ದೇನೆ.
-ವೈ. ಕೆ. ಸಂಜೀವ ಖಾರ್ವಿ, ಮರವಂತೆಯ ಮೀನುಗಾರ ಮುಖಂಡ

 

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !