ಭಟ್ಕಳ: ತುಕ್ಕು ಹಿಡಿಯುತ್ತಿದೆ ಪುರಸಭೆಯ ಜೆಸಿಬಿ

ಪಟ್ಟಣದ ವ್ಯಾಪ್ತಿಯಲ್ಲಿ ಚರಂಡಿ ಹೂಳು ತೆಗೆಯುವುದು, ಘನತ್ಯಾಜ್ಯ ಘಟಕದಲ್ಲಿ ಕಸ ತುಂಬುವುದು, ಅಗತ್ಯ ಸಂದರ್ಭದಲ್ಲಿ ಮರ ತೆರವು, ಕಂಬ ತೆರವು ಸೇರಿದಂತೆ ತುರ್ತು ಕೆಲಸಕ್ಕಾಗಿ ಜೆಸಿಬಿ ಯಂತ್ರವನ್ನು ಬಳಸಿಕೊಳ್ಳಲಾಗುತ್ತದೆ. ಈ ಹಿಂದೆ ಪುರಸಭೆಯಲ್ಲಿ ಇದ್ದ ಜೆಸಿಬಿ ಯಂತ್ರ ಗುಜರಿಯಾದ ಕಾರಣ ಎರಡು ವರ್ಷಗಳ ಹಿಂದೆ ಕೆಸ್ ಕಂಪನಿಯ ಹೊಸ ಜೆಸಿಬಿ ಯಂತ್ರ ಖರೀದಿ ಮಾಡಲಾಗಿತ್ತು.

ಖರೀದಿಯ ಆರಂಭದ ದಿನಗಳಲ್ಲಿ ಸರಿಯಾಗಿ ಕಾರ್ಯನಿರ್ವಹಿಸುತ್ತಿದ್ದ ಜೆಸಿಬಿ ಯಂತ್ರ ಕೆಲವು ತಿಂಗಳ ಹಿಂದೆ ಕೆಟ್ಟು ನಿಂತಿದ್ದು ಘನತ್ಯಾಜ್ಯ ಘಟಕದಲ್ಲಿ ಇರಿಸಲಾಗಿದೆ. ಇದರಿಂದಾಗಿ ಪುರಸಭೆಯವರು ಜೆಸಿಬಿಯಿಂದ ಆಗಬೇಕಾದ ಕೆಲಸಗಳನ್ನು ಬಾಡಿಗೆ ಜೆಸಿಬಿ ತರಿಸಿ ಮಾಡಿಸಿಕೊಳ್ಳುತ್ತಿದ್ದಾರೆ.

‘ಕೆಲವೇ ದಿನಗಳಲ್ಲಿ ಮಳೆಗಾಲ ಆರಂಭವಾಗಲಿದೆ. ಮಳೆಗಾಲದಲ್ಲಿ ಅತಿವೃಷ್ಟಿಯಿಂದ ನೀರು ತುಂಬಿಕೊಂಡರೆ ಅಲ್ಲಲ್ಲಿ ತೆರವು ಮಾಡಲು ಜೆಸಿಬಿ ಅಗತ್ಯ ಇದೆ. ಹೊಸದಾಗಿ ಖರೀದಿ ಮಾಡಿರುವ ಜೆಸಿಬಿ ಪದೇಪದೆ ಕೈಕೊಡುತ್ತಿದೆ. ಪಟ್ಟಣದ ಜನರ ತೆರಿಗೆ ಹಣದಿಂದ ಲಕ್ಷಾಂತರ ರೂಪಾಯಿ ನೀಡಿ ಖರೀದಿಸಿದ ಜೆಸಿಬಿಯನ್ನು ನಿರ್ವಹಣೆ ಮಾಡಲಾಗದೇ ತುಕ್ಕು ಹಿಡಿಯಲು ಬಿಟ್ಟರೆ ಮುಂದೆ ಕಥೆ ಏನು’ ಎಂದು ಪ್ರಶ್ನಿಸುತ್ತಾರೆ ಪುರಸಭೆ ಸದಸ್ಯರಾದ ರಾಘವೇಂದ್ರ ಶೇಟ್.

ಜೆಸಿಬಿ ಯಂತ್ರದ ದುರಸ್ತಿ ಬಗ್ಗೆ ಎಂಜಿನಿಯರಿಂಗ್‌ ವಿಭಾಗದಿಂದ ಅಂದಾಜು ಪ್ರತಿ ತರಿಸಿಕೊಂಡು ಆಡಳಿತಾಧಿಕಾರಿಯ ಒಪ್ಪಿಗೆ ಪಡೆದು ದುರಸ್ತಿ ಮಾಡಲು ಕ್ರಮ ವಹಿಸಲಾಗುವುದು

-ಶಿವಾನಂದ ಆಲೂರು ಭಟ್ಕಳ ಪುರಸಭೆಯ ಮುಖ್ಯಾಧಿಕಾರಿ