ಶಿರಸಿ | ಗುತ್ತಿಗೆದಾರರು ಅತಂತ್ರ: ಯಂತ್ರ ಮಾರುವ ಸ್ಥಿತಿ

ಉತ್ತರ ಕನ್ನಡದ ಒಟ್ಟು 12 ತಾಲ್ಲೂಕುಗಳಲ್ಲಿ 500ಕ್ಕೂ ಹೆಚ್ಚು ಗುತ್ತಿಗೆದಾರರಿಗೆ ಸುಮಾರು ₹400 ಕೋಟಿ ಬಾಕಿ ಹಣ ಸರ್ಕಾರದಿಂದ ಬರಬೇಕಾಗಿದೆ.

ಜಿಲ್ಲೆಯಲ್ಲಿ ಲೋಕೋಪಯೋಗಿ ಇಲಾಖೆ ಕಾರವಾರ ವಿಭಾಗದಲ್ಲಿ ಒಟ್ಟೂ ₹57.58 ಕೋಟಿ ಮತ್ತು ಶಿರಸಿ ವಿಭಾಗದಲ್ಲಿ ₹105.03 ಕೋಟಿ ಮತ್ತು ಜಿಲ್ಲಾ ಪಂಚಾಯಿತಿ, ತಾಲ್ಲೂಕು ಪಂಚಾಯಿತಿ, ನಗರಸಭೆ, ಪುರಸಭೆ, ಪಟ್ಟಣ ಪಂಚಾಯಿತಿ ಸೇರಿ ಇತರ ಇಲಾಖೆಗಳ ಸುಮಾರು ₹250 ಕೋಟಿಗಳಿಗಿಂತಲೂ ಹೆಚ್ಚು ಹಣ ಗುತ್ತಿಗೆದಾರರಿಗೆ ಕಾಮಗಾರಿಗಳಿಗೆ ಸಂಬಂಧಿಸಿ ಪಾವತಿ ಬಾಕಿಯಿದೆ. 

‘ಸಾಲ ಮಾಡಿ ಕಾಮಗಾರಿ ಮಾಡಿದ್ದು, ಬಿಲ್ ಪಾವತಿಯಾಗದೆ ವರ್ಷ ಕಳೆದಿದೆ. ಈಗ ಬಡ್ಡಿ ಕಟ್ಟಲು ನಮ್ಮ ಬಳಿ ಇರುವ ಜೆಸಿಬಿ, ಲಾರಿ, ಯಂತ್ರೋಪಕರಣಗಳನ್ನು ಮಾರುವ ಸ್ಥಿತಿ ಬಂದೊದಗಿದೆ. ಜೀವನ ನಿರ್ವಹಣೆ ತೀರಾ ಕಷ್ಟವಾಗಿದೆ' ಎನ್ನುತ್ತಾರೆ ಗುತ್ತಿಗೆದಾರರು. 

‘ಜಿಲ್ಲೆಯಲ್ಲಿ ಸಣ್ಣ ಗುತ್ತಿಗೆದಾರರು ಹೆಚ್ಚಿದ್ದಾರೆ. ಸರ್ಕಾರವು ಕಾಮಗಾರಿ ಬಿಲ್ಲನ್ನು ನೀಡುತ್ತದೆ ಎಂಬ ವಿಶ್ವಾಸದಿಂದ ಸಾಲ ಮಾಡಿ ಕಾಮಗಾರಿಗಳನ್ನು ಪೂರ್ತಿಗೊಳಿಸಿದ್ದೇವೆ. ಆದರೆ ಬಿಲ್ ಪಾವತಿಯಾಗದಂತೆ ತಡೆಹಿಡಿಯಲಾಗಿದೆ. ಸರ್ಕಾರ ಗುತ್ತಿಗೆದಾರರ ಜೀವನದ ಜತೆ ಚೆಲ್ಲಾಟವಾಡುತ್ತಿದೆ’ ಎಂಬುದು ಹಲವು ಗುತ್ತಿಗೆದಾರರ ದೂರಾಗಿದೆ.  

'ಈಗಾಗಲೇ ಗುತ್ತಿಗೆದಾರರ ಆರ್ಥಿಕ ಪರಿಸ್ಥಿತಿ ತುಂಬಾ ಹದಗೆಟ್ಟಿದ್ದು, ಸಾಲ ಪಡೆದ ಬ್ಯಾಂಕ್'ಗಳಲ್ಲಿ ಕಟಬಾಕಿದಾರರಾಗಿದ್ದಾರೆ. ಹೊಸ ಕಾಮಗಾರಿ ಕೈಗೆತ್ತಿಕೊಳ್ಳಲು ಬಂಡವಾಳವಿಲ್ಲ. ಬ್ಯಾಂಕ್'ಗಳಲ್ಲಿ ಸಾಲ ಸಿಗುತ್ತಿಲ್ಲ. ಈ ಪರಿಸ್ಥಿತಿ ಇನ್ನೂ ಮುಂದುವರಿದಲ್ಲಿ ಗುತ್ತಿಗೆದಾರರು ಮತ್ತು ಅವಲಂಬಿತರು ಆತ್ಮಹತ್ಯೆಗೆ ಶರಣಾಗುವ ಪ್ರಮೇಯ ಒದಗಬಹುದು' ಎಂದು ಗುತ್ತಿಗೆದಾರರೊಬ್ಬರು ಅಸಹಾಯಕರಾಗಿ ಹೇಳಿದರು. 

ಸಾಲ ಮಾಡಿ ಕಾಮಗಾರಿ ಪೂರ್ಣಗೊಳಿಸಿದ್ದೇವೆ. ಬಿಲ್ ಪಾವತಿಯಾಗದ ಕಾರಣ ಸಾಲದ ಬಡ್ಡಿ ತೀರಿಸಲು ಕಷ್ಟವಾಗಿದೆ. ಬೇರೆ ಕಾಮಗಾರಿ ಮಾಡಲು ಹಣದ ಕೊರತೆಯಿದೆ. - ಜಿ.ಎಸ್.ಹಿರೇಮಠ ಸಿವಿಲ್ ಗುತ್ತಿಗೆದಾರರ ಸಂಘದ ಉತ್ತರ ಕನ್ನಡ ಜಿಲ್ಲಾ ಘಟಕದ ಪ್ರಧಾನ ಕಾರ್ಯದರ್ಶಿ