ಬರದಲ್ಲಿ ಬೆಳೆಗಾರರ ಕೈಹಿಡಿದ ‘ಶುಂಠಿ’

ಶಿರಸಿ ತಾಲ್ಲೂಕಿನ ಬನವಾಸಿ ಹೋಬಳಿ, ಮುಂಡಗೋಡ, ಯಲ್ಲಾಪುರ, ಹಳಿಯಾಳ ಭಾಗದಲ್ಲಿ ಶುಂಠಿ ಬೆಳೆಯಲಾಗಿದೆ. ಬಹುತೇಕ ಬೆಳೆಗಾರರು ಹಿಮಾಚಲ ತಳಿಯ ಶುಂಠಿ ನಾಟಿ ಮಾಡಿದ್ದರು.

‘ಕೊಳೆರೋಗ ಬಾಧಿಸಿದ ವರ್ಷಗಳಲ್ಲಿ ಒಂದು ಎಕರೆಗೆ 120 ರಿಂದ 130 ಕ್ವಿಂಟಲ್ ಬರುತ್ತಿದ್ದ ಶುಂಠಿ ಈ ಸಲ ಸರಾಸರಿ 200 ರಿಂದ 250 ಕ್ವಿಂಟಲ್‌ನಷ್ಟು ಲಭ್ಯವಾಗಿದೆ. ಹಲವು ಕಡೆ ಶುಂಠಿ ಕೊಯ್ಲು ಆರಂಭವಾಗಿದೆ. ಆರಂಭದಲ್ಲೇ ₹ 8 ಸಾವಿರಕ್ಕೆ ಕ್ವಿಂಟಲ್ ಶುಂಠಿ ಮಾರಾಟವಾಗುತ್ತಿದೆ. ಖರೀದಿದಾರರೇ ಬೆಳೆಗಾರರ ಕ್ಷೇತ್ರಕ್ಕೆ ಬರುತ್ತಿದ್ದಾರೆ. ಇದು ಶುಂಠಿ ಬೆಳೆಗಾರರಲ್ಲಿ ಸಂತೋಷ ಮೂಡಿಸಿದೆ’ ಎಂದು ಬುಗಡಿಕೊಪ್ಪದ ಶುಂಠಿ ಬೆಳೆಗಾರ ನವೀನ್ ನಾಯ್ಕ.

‘ಮೂರು–ನಾಲ್ಕು ವರ್ಷಗಳಿಂದ ಶುಂಠಿಗೆ ಹಂಗಾಮಿನ ಆರಂಭದ ದಿನಗಳಲ್ಲಿ ಉತ್ತಮ ಬೆಲೆ ಇರಲಿಲ್ಲ. ಕಳೆದ ವರ್ಷ ಕ್ವಿಂಟಲ್ ಶುಂಠಿಗೆ ಗರಿಷ್ಠ ಧಾರಣೆ ₹6 ಸಾವಿರ ಇತ್ತು. ಜಿಲ್ಲೆಯಲ್ಲಿ 4 ಸಾವಿರ ಹೆಕ್ಟೇರ್‌ಗಿಂತ ಹೆಚ್ಚಿದ್ದ ಶುಂಠಿ ಬೆಳೆಯುವ ಪ್ರದೇಶ ಕಳೆದ ಐದು ವರ್ಷಗಳಲ್ಲಿ 2 ಸಾವಿರ ಹೆಕ್ಟೇರ್‌ಗೆ ಕುಸಿದಿತ್ತು’ ಎಂದು ಶುಂಠಿ ಬೆಳೆಗಾರರು ತಿಳಿಸಿದರು.

‘ಮಳೆಯಾಗದ ಕಾರಣ ಭತ್ತ ಬೆಳೆಯಬೇಕಿದ್ದ ಬಹುತೇಕ ರೈತರು ಕಡಿಮೆ ನೀರು ಬೇಡುವ ಶುಂಠಿ ಕೃಷಿಯತ್ತ ಆಸಕ್ತಿ ವಹಿಸಿದರು. ಶುಂಠಿಗೆ ದೆಹಲಿ, ಪುಣೆ ಮಾರುಕಟ್ಟೆಯಿಂದ ಬೇಡಿಕೆ ಬರುತ್ತಿದ್ದು, ಇದರಿಂದ ಭವಿಷ್ಯದಲ್ಲಿ ದರ ಇನ್ನಷ್ಟು ಹೆಚ್ಚುವ ಸಾಧ್ಯತೆ ಇದೆ’ ಎಂದು ಅವರು ತಿಳಿಸಿದರು.