ಭಾನುವಾರ, ಡಿಸೆಂಬರ್ 8, 2019
20 °C

ಆಯುಷ್ಮಾನ್‌ ಸಂಭಾವನೆ ₹3.50 ಕೋಟಿ

Published:
Updated:

ಆಯುಷ್ಮಾನ್‌ ಖುರಾನಾ ಈಗ ಯಶಸ್ವಿ ನಟರ ಸಾಲಿನಲ್ಲಿ ಗುರುತಿಸಿಕೊಳ್ಳುತ್ತಿದ್ದು, ಲಾಭದಾಯಕ ನಟರ ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದಾರೆ. ಅವರ ನಟನೆಯ ‘ಅಂಧಾಧುನ್‌’, ‘ಬಧಾಯಿ ಹೋ’, ‘ಆರ್ಟಿಕಲ್‌ 15’ ಚಿತ್ರಗಳು ಒಂದರ ಹಿಂದೆ ಒಂದರಂತೆ ಭಾರಿ ಯಶಸ್ಸು ಕಂಡಿವೆ. ‘ಅಂಧಾಧುನ್‌’ ಚಿತ್ರವು ಅತ್ಯುತ್ತಮ ಹಿಂದಿ ಚಲನಚಿತ್ರ ಹಾಗೂ ಅತ್ಯುತ್ತಮ ಚಿತ್ರಕತೆಗಾಗಿ ರಾಷ್ಟ್ರೀಯ ಪ್ರಶಸ್ತಿಯನ್ನೂ ಪಡೆದಿದೆ. ‘ಬಧಾಯಿ ಹೋ’ ನಟನೆಗಾಗಿ ಆಯುಷ್ಮಾನ್‌ಗೆ  ಅತ್ಯುತ್ತಮ ನಟ ಪ್ರಶಸ್ತಿ ದೊರೆತಿದೆ.

ಈ ಎಲ್ಲಾ ಚಿತ್ರಗಳು ಯಶಸ್ಸು ಗಳಿಸುತ್ತಿದ್ದಂತೆಯೇ ಆಯುಷ್ಮಾನ್‌ ಖುರಾನಾ ಅವರ ಸ್ಟಾರ್‌ವ್ಯಾಲ್ಯೂ ಹಾಗೂ ಸಂಭಾವನೆಯಲ್ಲಿ ಭಾರಿ ಏರಿಕೆಯಾಗಿದೆ. ಜಾಹೀರಾತೊಂದರ ನಟನೆಗಾಗಿ ಆಯುಷ್ಮಾನ್‌ ಸಹಿ ಮಾಡಿದ್ದು, ₹3.50 ಕೋಟಿ ಸಂಭಾವನೆ ಪಡೆದಿದ್ದಾರೆ. ತಮ್ಮ ಸಂಭಾವನೆಯನ್ನು ಮೂರು ಪಟ್ಟು ಹೆಚ್ಚಿಸಿಕೊಂಡಿದ್ದಾರೆ ಎಂದು ಮೂಲಗಳು ವರದಿ ಮಾಡಿವೆ.

ಈ ಹಿಂದೆ ಜಾಹೀರಾತು ನಟನೆಗಾಗಿ ₹90 ಲಕ್ಷದಿಂದ ₹1 ಕೋಟಿ ಸಂಭಾವನೆ ಪಡೆಯುತ್ತಿದ್ದರು. ರಾಷ್ಟ್ರೀಯ ಪ್ರಶಸ್ತಿ ಪಡೆದ ನಂತರ ಏಕಾಏಕಿ ಸಂಭಾವನೆ ಏರಿಸಿಕೊಂಡ ಅವರು, ₹3.50 ಕೋಟಿಗಿಂತ ಕಡಿಮೆ ಮೊತ್ತಕ್ಕೆ ನಟಿಸಲ್ಲ ಎಂದು ಖಡಕ್ಕಾಗಿ ತಿಳಿಸಿದ್ದಾರೆ ಎನ್ನಲಾಗಿದೆ.

ಸಿನಿಮಾದ ಸಂಭಾವನೆಯನ್ನೂ ನಟ ಏರಿಕೆ ಮಾಡಿದ್ದಾರೆ ಎಂಬ ಸುದ್ದಿ ಇದೆ. ಸದ್ಯ ಆಯುಷ್ಮಾನ್‌, ಏಕ್ತಾ ಕಪೂರ್‌ ನಿರ್ದೇಶನದ ‘ಡ್ರೀಮ್‌ ಗರ್ಲ್‌’ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಇವರ ನಟನೆಯ ‘ಆರ್ಟಿಕಲ್‌ 15’ ಸಿನಿಮಾಕ್ಕೆ ಭಾರಿ ಮೆಚ್ಚುಗೆ, ಪ್ರಶಂಸೆ ವ್ಯಕ್ತವಾಗಿದೆ. ‘ಡ್ರೀಮ್‌ ಗರ್ಲ್‌’ ಚಿತ್ರವು ಸೆಪ್ಟೆಂಬರ್‌ 13ರಂದು ಬಿಡುಗಡೆಯಾಗುತ್ತಿದೆ.

2017ರಲ್ಲಿ ಬಿಡುಗಡೆಯಾದ ತಮ್ಮ ನಟನೆಯ ‘ಶುಭ್‌ ಮಂಗಲ್‌ ಸಾವಧಾನ್‌’ ಚಿತ್ರದ ಮುಂದಿನ ಅವತರಣಿಕೆಯಲ್ಲಿಯೂ ನಟಿಸಲಿದ್ದಾರೆ. ಈ ಚಿತ್ರಕ್ಕೆ ‘ಶುಭ್‌ ಮಂಗಲ್‌ ಜಾದಾ ಸಾವಧಾನ್’ ಎಂದು ಹೆಸರಿಡಲಾಗಿದೆ. ಇದು ಸಲಿಂಗಕಾಮಿಗಳ ಕುರಿತ ಹಾಸ್ಯ ಚಿತ್ರ. ಇದನ್ನು ಆನಂದ್‌ ಎಲ್‌. ರಾಯ್‌ ನಿರ್ದೇಶಿಸಲಿದ್ದಾರೆ.

ಇದಲ್ಲದೇ ‘ಬಧಾಯಿ ಹೋ’ ಚಿತ್ರದ ಸೀಕ್ವೆಲ್‌ ಕೂಡ ತಯಾರಾಗಲಿದ್ದು, ಇದರಲ್ಲಿ ನೀನಾ ಗುಪ್ತಾ, ಸಾನ್ಯ ಮಲ್ಹೋತ್ರಾ ಮೊದಲಾದವರು ನಟಿಸಲಿದ್ದಾರೆ.

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು