‘ವೈಕುಂಠಪುರಮುಲೋ’ ಎರಡನೇ ಹಾಡು ಬಿಡುಗಡೆಗೆ ಸಿದ್ಧ

ಯಾವುದೇ ಸಿನಿಮಾಕ್ಕಾಗಲಿ ವಿಮರ್ಶೆ ಕೆಟ್ಟದ್ದಾಗಿದ್ದು, ಚಿತ್ರದ ಬಗ್ಗೆ ‘ಚೆನ್ನಾಗಿಲ್ಲ’ ಎಂಬ ಮಾತು ಕೇಳಿ ಬಂದರೂ ಕೂಡ ಟೀಸರ್‌, ಟ್ರೇಲರ್ ಸದ್ದಿನಿಂದಲೇ ಮೊದಲ ವಾರದಲ್ಲೇ ನಿರ್ಮಾಪಕರ ಜೇಬು ತುಂಬುತ್ತಿರುವುದು ಸುಳ್ಳಲ್ಲ.

ಆ ಕಾರಣಕ್ಕಾಗಿ ಇತ್ತೀಚೆಗೆ ನಿರ್ಮಾಪಕರು ಸಿನಿಮಾ ಬಿಡುಗಡೆಗೆ ಮೊದಲೇ ಹೈಪ್ ಸೃಷ್ಟಿಸಲು ವಿಭಿನ್ನ ತಂತ್ರಗಳನ್ನು ಪ್ರಯೋಗಿಸುತ್ತಿದ್ದಾರೆ. ಅದಕ್ಕೆ ಸಾಕ್ಷಿ ಅಲ್ಲು ಅರ್ಜುನ್ ಅಭಿಯನದ ‘ಅಲಾ ವೈಕುಂಠಪುರಮುಲೋ’ ಸಿನಿಮಾ.

ಈ ಸಿನಿಮಾದ ಹಾಡೊಂದನ್ನು ಸಿನಿಮಾ ಬಿಡುಗಡೆಗೆ 100 ದಿನ ಇರುವ ಮೊದಲೇ ರಿಲೀಸ್ ಮಾಡಲಾಗಿತ್ತು. ಸುಮ್ಮನೆ ಆಡಿಯೊ ಕೇಳಿಸುವ ಬದಲು ತಮನ್ ಹಾಗೂ ಸಿದ್ ಶ್ರೀರಾಮ್‌ಗಾಗಿ ವಿಶೇಷ ಸೆಟ್ ತಯಾರಿಸಿ ಅದರಲ್ಲಿ ಹಾಡನ್ನು ಚಿತ್ರೀಕರಣ ಮಾಡಿ, ಅದರ ವಿಡಿಯೊ ಬಿಡುಗಡೆ ಮಾಡಿದ್ದರು.

ಈ ಹಾಡಿನ ಚಿತ್ರೀಕರಣಕ್ಕಾಗಿ ನಿರ್ಮಾಪಕರು ₹ 25ಲಕ್ಷ ಖರ್ಚು ಮಾಡಿದ್ದಾರೆ. ಅವರ ನಿರೀಕ್ಷೆಯಂತೆ ಆ ಹಾಡು ಬಿಗ್ ಹಿಟ್ ಕಂಡಿದೆ. ‘ಸಾಮಜ ವರ ಗಮನ‘ ಸಾಲು ಭಾಷೆ ಅರಿಯದವರ ಬಾಯಲ್ಲೂ ಕೇಳುವಂತಾಗಿದೆ. ಇದನ್ನು 4 ಕೋಟಿಗೂ ಅಧಿಕ ಮಂದಿ ಯುಟ್ಯೂಬ್‌ನಲ್ಲಿ ವೀಕ್ಷಿಸಿದ್ದಾರೆ.

ಈ ಒಂದು ಹಾಡಿನಿಂದಲೇ ಸಿನಿಮಾ ಬಿಡುಗಡೆಯಾದ ದಿನವೇ ಕೋಟಿ ಕೋಟಿ ಬಾಚುವ ನಿರೀಕ್ಷೆ ಚಿತ್ರತಂಡದ್ದು.

ಹಾಡಿನ ಯಶಸ್ಸಿನ ಉತ್ಸಾಹದಲ್ಲೇ ನಿರ್ಮಾಪಕರು ಚಿತ್ರದ ಇನ್ನೊಂದು ಹಾಡಿನ ಬಿಡುಗಡೆಗೆ ಸಿದ್ಧರಾಗಿದ್ದಾರೆ. ಇದು ಮಾಸ್ ಹಾಡಾಗಿದ್ದು ಈ ದೀಪಾವಳಿಗೆ ಬಿಡುಗಡೆಯಾಗುವ ನಿರೀಕ್ಷೆ ಇದೆ.

ಸಾಮಜ ವರ ಗಮನ ಹಾಡಿಗೆ ಶಾಸ್ತ್ರೀಯ ಸಂಗೀತದ ಟಚ್ ಇದ್ದು ಇದು ಕ್ಲಾಸ್ ಪ್ರೇಕ್ಷಕರನ್ನು ಹೆಚ್ಚು ಸೆಳೆದಿದೆ. ಆ ಕಾರಣಕ್ಕೆ ಮುಂದಿನ ಹಾಡು ಮಾಸ್ ಪ್ರೇಕ್ಷಕರನ್ನು ಸೆಳೆಯಲಿದೆ.

ತೆಲುಗು ಸಿನಿ ಇಂಡಸ್ಟ್ರಿಯಲ್ಲಿ ಸಂಕ್ರಾಂತಿ ವೇಳೆಗೆ ಸಿನಿಮಾ ಬಿಡುಗಡೆ ತೀವ್ರ ಪೈಪೋಟಿ ಇದ್ದು ಇಂತಹ ಹೊಸ ತಂತ್ರಗಳು ಪ್ರೇಕ್ಷಕರನ್ನು ಸೆಳೆಯಲಿವೆ.