ಮಂಗಳವಾರ, 19 ಮಾರ್ಚ್ 2024
×
ADVERTISEMENT
ಈ ಕ್ಷಣ :
ADVERTISEMENT
ADVERTISEMENT

ಜೈಲಿನಲ್ಲಿರುವ ಮಗನಿಗೆ ₹ 4,500 ಮನಿ ಆರ್ಡರ್ ಮಾಡಿದ ಶಾರುಕ್ ಖಾನ್

Last Updated 15 ಅಕ್ಟೋಬರ್ 2021, 19:45 IST
ಅಕ್ಷರ ಗಾತ್ರ

ಮುಂಬೈ: ‘ಡ್ರಗ್ಸ್ ಪ್ರಕರಣದಲ್ಲಿ ಎನ್‌ಸಿಬಿಯಿಂದ ಬಂಧಿತನಾಗಿರುವ ಬಾಲಿವುಡ್ ನಟ ಶಾರುಕ್ ಖಾನ್ ಅವರ ಮಗ ಆರ್ಯನ್ ಖಾನ್ ತನ್ನ ತಂದೆಯಿಂದ ಮನಿ ಆರ್ಡರ್ ಮೂಲಕ ₹ 4,500 ಪಡೆದಿದ್ದಾರೆ’ ಎಂದು ಜೈಲಿನ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

‘ಮುಂಬೈನ ಕ್ರೂಸ್ ಹಡಗೊಂದರಿಂದ ವಶಪಡಿಸಿಕೊಂಡ ಡ್ರಗ್ಸ್‌ ಪ್ರಕರಣದಲ್ಲಿ ಬಂಧಿತರಾಗಿರುವ ಆರ್ಯನ್, ಇಲ್ಲಿನ ಆರ್ಥರ್ ರಸ್ತೆಯ ಜೈಲಿನಲ್ಲಿದ್ದು ಅವರು ಜೈಲಿನ ಒಳಗಿನಿಂದಲೇ ವಿಡಿಯೊ ಕಾಲ್ ಮೂಲಕ ತಮ್ಮ ತಂದೆ–ತಾಯಿಯೊಂದಿಗೆ ಮಾತನಾಡಿದ್ದಾರೆ’ ಎಂದು ಅವರು ಮಾಹಿತಿ ನೀಡಿದ್ದಾರೆ.

‘ವಿಶೇಷ ನ್ಯಾಯಾಲಯವು ಆರ್ಯನ್ ಮತ್ತು ಇತರ ಇಬ್ಬರ ಜಾಮೀನು ಅರ್ಜಿಯ ಆದೇಶವನ್ನು ಅ. 20ಕ್ಕೆ ಮುಂದೂಡಿದ್ದು, ಅಲ್ಲಿಯ ತನಕ ಆರ್ಯನ್ ಜೈಲಿನಲ್ಲಿರಬೇಕಾಗುತ್ತದೆ. ಕೋವಿಡ್‌–19 ಮಾರ್ಗಸೂಚಿ ಜಾರಿಯಲ್ಲಿರುವುದರಿಂದ ಮಗನ ಭೇಟಿಗೆ ಅವರ ಪೋಷಕರಿಗೆ ಅನುಮತಿ ನೀಡಿಲ್ಲ. ಹಾಗಾಗಿ, ವಾರಕ್ಕೆ ಎರಡು ಬಾರಿ ವಿಡಿಯೊ ಕಾಲ್ ಮೂಲಕ ಪೋಷಕರೊಂದಿಗೆ ಮಾತನಾಡಲು ಅನುಮತಿ ನೀಡಲಾಗಿದೆ’ ಎಂದು ಜೈಲಿನ ಅಧಿಕಾರಿಯಬ್ಬರು ಮಾಹಿತಿ ನೀಡಿದ್ದಾರೆ.

ಜೈಲಿನ ಊಟ: ’ಜೈಲಿನಲ್ಲಿ ತಯಾರಿಸಲಾಗುತ್ತಿರುವ ಆಹಾರವನ್ನೇ ಆರ್ಯನ್ ಅವರಿಗೆ ನೀಡಲಾಗುತ್ತಿದೆ. ಹೊರಗಿನ ಊಟಕ್ಕೆ ಅನುಮತಿ ನೀಡಿಲ್ಲ. ಇಲ್ಲಿ ನೀಡಲಾಗುತ್ತಿರುವ ಆಹಾರವು ಗುಣಮಟ್ಟದ್ದಾಗಿದ್ದು, ಅಗತ್ಯವಿರುವ ಮಾನದಂಡಗಳ ಪ್ರಕಾರವೇ ನೀಡಲಾಗುತ್ತಿದೆ. ಜೈಲಿನ ಆವರಣದಲ್ಲಿ ಕ್ಯಾಂಟೀನ್ ಸೌಲಭ್ಯವಿದ್ದು, ಅಲ್ಲಿ ಅಗತ್ಯ ವಸ್ತುಗಳನ್ನು ಖರೀದಿಸಬಹುದು. ಶಾರುಕ್ ಖಾನ್ ಮನಿ ಆರ್ಡರ್ ಮೂಲಕ ಮಗನಿಗೆ ₹ 4,500 ಕಳಿಸಿದ್ದು, ಆರ್ಯನ್ ಸೋಮವಾರ ಅದನ್ನು ಪಡೆದಿದ್ದಾರೆ’ ಎಂದರು.

‘ಜೈಲಿನಲ್ಲಿರುವ ವಿಚಾರಾಣಾಧೀನರಿಗೆ ನೀಡುವ ಗುರುತಿನ ಸಂಖ್ಯೆಯನ್ನು ಆರ್ಯನ್ ಅವರಿಗೂ ನೀಡಲಾಗಿದೆ’ ಎಂದೂ ಅವರು ತಿಳಿಸಿದರು.

ಪ್ರಕರಣದಲ್ಲಿ ಬಂಧಿತರಾದ ಆರ್ಯನ್ ಮತ್ತು ಇತರ ಐವರ ಕ್ವಾಂಟೈನ್ ಅವಧಿ ಮುಗಿದ ಕಾರಣ, ಇಲ್ಲಿನ ಆರ್ಥರ್ ರಸ್ತೆ ಜೈಲಿನ ಸಾಮಾನ್ಯ ಬ್ಯಾರಕ್‌ಗೆ ಅವರೆಲ್ಲರನ್ನೂ ವರ್ಗಾಯಿಸಲಾಗಿದೆ’ ಎಂದು ಮತ್ತೊಬ್ಬ ಅಧಿಕಾರಿ ತಿಳಿಸಿದ್ದಾರೆ.

ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.

ADVERTISEMENT
ADVERTISEMENT
ADVERTISEMENT
ADVERTISEMENT