ಬದುಕಿಗೆ ಬಣ್ಣ ತುಂಬುವ ಹಬ್ಬ

ಕಾಡುವ ಅಪ್ಪನ ನೆನಪು

ಹೋಳಿ ನನ್ನಿಷ್ಟದ ಹಬ್ಬಗಳಲ್ಲಿ ಒಂದು. ಚಿತ್ರೀಕರಣದಲ್ಲಿ ಎಷ್ಟೇ ಬ್ಯುಸಿಯಾಗಿದ್ದರೂ, ಹೋಳಿ ದಿನದಂದು ವಾರಾಣಸಿಯಲ್ಲಿರುವ ನನ್ನ ಮನೆಗೆ ಹೋಗುತ್ತೇನೆ. ನಮಗಿದು ದೊಡ್ಡ ಹಬ್ಬ. ರುಚಿಕರವಾದ ಖಾದ್ಯಗಳ ಜೊತೆಗೆ ಬಂಧುಗಳು, ಸ್ನೇಹಿತರು ಒಟ್ಟಿಗೆ ಸೇರಿ ಸಿಕ್ಕಾಪಟ್ಟೆ ಖುಷಿ ಪಡುತ್ತೇವೆ. ಬೇಗ ಎದ್ದವರೂ, ಮಲಗಿರುವವರ ಮುಖದ ಮೇಲೆ ಚಿತ್ರ, ವಿಚಿತ್ರ ಚಿತ್ತಾರ ಬರೆಯುತ್ತಾರೆ. ಬೇಗ ಏಳುವ ಅಮ್ಮನೇ ಸಾಮಾನ್ಯವಾಗಿ ಈ ತರ‍್ಲೆ ಕೆಲಸ ಮಾಡುವುದು. ಬೆಳಿಗ್ಗೆ ಎದ್ದ ಕೂಡಲೇ ಹಿರಿಯರಿಂದ ಆಶೀರ್ವಾದ ‍ಪಡೆಯುತ್ತೇನೆ. ನಂತರ ತಿಂಡಿ ತಿಂದು, ಬಾಂಗ್‌ ಕುಡಿದು ಬಣ್ಣಗಳ ಆಟ ಶುರುಮಾಡುತ್ತೇನೆ. ದೊಡ್ಡವರು ಅಡುಗೆ ಮಾಡಿ ನಮ್ಮೊಂದಿಗೆ ಆಡಲು ಬರುತ್ತಾರೆ. ನೃತ್ಯ, ಸಂಗೀತ ಸೇರಿದಂತೆ ಹಲವು ಮನರಂಜನಾ ಆಟಗಳು ಇರುತ್ತವೆ. ಆಟ ಮುಗಿದ ಮೇಲೆ ಬಣ್ಣಗಳನ್ನು ತೆಗೆಯುವುದು ದೊಡ್ಡ ಸಾಹಸ. ಎರಡು, ಮೂರು ಗಂಟೆ ಸ್ನಾನಕ್ಕೆ ಮೀಸಲಿರಿಸಬೇಕು. ಅಪ್ಪ ಹೋಳಿಯ ಆಯೋಜನೆಯನ್ನು ಚೆನ್ನಾಗಿ ಮಾಡುತ್ತಿದ್ದರು. ಏಳು ವರ್ಷಗಳ ಹಿಂದೆ ಅವರು ತೀರಿಕೊಂಡರು. ಪ್ರತಿಬಾರಿ ಹೋಳಿಯಲ್ಲಿಯೂ ಅಪ್ಪನ ನೆನಪಾಗುತ್ತದೆ.

ಶಾನ್ವಿ ಶ್ರೀವಾತ್ಸವ್‌

ಬಾಲ್ಯದ ನೆನಪು

ಹೋಳಿ ಹಬ್ಬ ಎಂದಾಕ್ಷಣ ಬಾಲ್ಯದ ನೆನಪಾಗುತ್ತದೆ. ಬಾಣಸವಾಡಿ ಸಮೀಪ ಆರ್ಮಿ ಕ್ವಾಟ್ರಸ್‌ನಲ್ಲಿದ್ದಾಗ ಮಕ್ಕಳೆಲ್ಲ ಸೇರಿ ತುಂಬಾ ಎಂಜಾಯ್‌ ಮಾಡುತ್ತಿದ್ದೆವು. ಹುಡುಗರು ಮತ್ತು ಹುಡುಗಿಯರ ಪ್ರತ್ಯೇಕ ಗುಂಪಿರುತ್ತಿತ್ತು. ಒಂದು ಗುಂಪಿನ ಮೇಲೆ ಇನ್ನೊಂದು ಗುಂಪಿನವರು ಬಣ್ಣಗಳನ್ನು ಎರಚುವುದು. ಬಲೂನ್‌ ಒಳಗೆ ಬಣ್ಣಗಳ ನೀರನ್ನು ತುಂಬಿ ಪಸರಿಸುವುದು. ಉತ್ತರ ಭಾರತದಲ್ಲಿ ಈ ಸಂಭ್ರಮದಲ್ಲಿ ಹೋಳಿ ಸಂಭ್ರಮ ಜೋರಾಗಿರುತ್ತದೆ. ಇಲ್ಲಿ ಆಡುವವರು ಕಡಿಮೆ. ಹಾಗಾಗಿ ನಾನು ಹೋಳಿ ಆಡುವುದು ಕಡಿಮೆಯಾಗಿದೆ.

ಈ ಬಾರಿ ಹೋಳಿ ದಿನ ಮನೆಯವರೆಲ್ಲ ಎಲ್ಲಾದರೂ ಪಿಕ್‌ನಿಕ್ ಹೋಗುವ ಯೋಚನೆ ಇದೆ. ಯಾರೂ ಪ್ರಾಣಿಗಳ ಮೇಲೆ ಬಣ್ಣಗಳನ್ನು ಹಾಕಬೇಡಿ. ಇದರಿಂದ ಅವುಗಳಿಗೆ ತುಂಬಾ ತೊಂದರೆಯಾಗುತ್ತವೆ. ಹಾಗೆಯೇ ರಾಸಾಯನಿಕ ಮುಕ್ತವಾದ ಬಣ್ಣ ಬಳಸಿ. ಇದು ಅಭಿಮಾನಿಗಳಿಗೆ ನನ್ನ ಸಲಹೆ.

ಐಂದ್ರಿತಾ ರೇ

ಈ ಬಾರಿ ಹೆಚ್ಚು ಸಂಭ್ರಮವಿಲ್ಲ

ಹೋಳಿ ‘ಫನ್‌ ಫೆಸ್ಟಿವಲ್‌’. ಸ್ನೇಹಿತರು, ಬಂಧುಗಳೆಲ್ಲ ಸೇರಿ ಸಂಭ್ರಮಿಸುವ ಹಬ್ಬವಿದು. ನಾನು ಚಿಕ್ಕವಳಿದ್ದಾಗಿನಿಂದಲೂ ಹೋಳಿ ಎಂದರೆ ವಿಶೇಷ ಸಂಭ್ರಮ. ನಾನು ಬಂಗಾಳಿ. ಅಲ್ಲಿ ತುಂಬಾ ಜೋರಾಗಿ ಈ ಹಬ್ಬ ಆಚರಿಸುತ್ತಾರೆ. ಕಳೆದ ಎರಡು ವರ್ಷ ಸಿನಿರಂಗದ ಸ್ನೇಹಿತರು, ಮನೆಯವರು ಸೇರಿ ಸಂಭ್ರಮದಿಂದ ಆಚರಿಸಿದ್ದೆವು. ಬಣ್ಣಗಳ ಎರಚಾಟದ ಜೊತೆಗೆ ಹಲವು ಆಟಗಳನ್ನು ಆಡುತ್ತೇವೆ. ದೇವರಿಗೆ ಬಣ್ಣಗಳು ಮತ್ತು ಹೂವುಗಳನ್ನು ಇಡುತ್ತೇವೆ. ಮನೆಗೆ ಡೋಲಿನವರು ಬರುತ್ತಾರೆ. ಹೂವಿನ ಅಲಂಕಾರ ಮಾಡುತ್ತೇವೆ. ಮನೆಗೆ ರಾಸಾಯನಿಕಮುಕ್ತ ಬಣ್ಣ ತರಿಸುತ್ತೇವೆ. ಈ ವರ್ಷ ಅಷ್ಟಾಗಿ ಸಂಭ್ರಮ ಇಲ್ಲ. ನಾನು ಮತ್ತು ಉಪೇಂದ್ರ ಬ್ಯುಸಿಯಾಗಿದ್ದೇವೆ. ಜೊತೆಗೆ ಉಪ್ಪಿ ಅವರ ಗುರು ಕಾಶೀನಾಥ್‌ ಸಾವು ಮತ್ತು ನಟಿ ಶ್ರೀದೇವಿ ಸಾವಿನಿಂದ ಬೇಸರವಾಗಿರುವ ಕಾರಣ ಈ ವರ್ಷ ಅದ್ದೂರಿಯಾಗಿ ಹೋಳಿ ಆಚರಿಸುವುದಿಲ್ಲ.

ಪ್ರಿಯಾಂಕಾ ಉಪೇಂದ್ರ

ರಾಸಾಯನಿಕ ಮುಕ್ತ ಬಣ್ಣ ಬಳಕೆ

ಬ್ಯುಸಿ ಬದುಕಿಗೆ ಹೋಳಿ ಹಬ್ಬ ವಿರಾಮ ನೀಡುತ್ತದೆ. ಸ್ನೇಹಿತರೆಲ್ಲ ಮನೆಗೆ ಬರುತ್ತಾರೆ. ಬಣ್ಣಗಳನ್ನು ಹಚ್ಚಿಕೊಳ್ಳುವ ಜೊತೆಗೆ ಮಾತು, ತಮಾಷೆ ಇರುತ್ತದೆ. ನೀರನ್ನು ವ್ಯರ್ಥ ಮಾಡಬಾರದು ಎಂಬ ಕಾರಣಕ್ಕೆ ಹೆಚ್ಚು ಬಳಸುವುದಿಲ್ಲ. ರಾಸಾಯನಿಕ ಮುಕ್ತವಾದ ಬಣ್ಣಗಳನ್ನೆ ಬಳಸುತ್ತೇವೆ.

ಸಂಜನಾ