ನವದೆಹಲಿ: ಕೇಂದ್ರ ಪ್ರೌಢ ಶಿಕ್ಷಣ ಮಂಡಳಿಯ (ಸಿಬಿಎಸ್ಇ) 10ನೇ ತರಗತಿ ಪರೀಕ್ಷೆಯ ಫಲಿತಾಂಶದಲ್ಲಿ ಈ ಬಾರಿ ಶೇ 5.26 ರಷ್ಟು ಕುಸಿತವಾಗಿದೆ.
ತೇರ್ಗಡೆ ಪ್ರಮಾಣದಲ್ಲಿ ಬಾಲಕರು, ಬಾಲಕಿಯರನ್ನು ಹಿಂದಿಕ್ಕಿರುವುದು ಈ ವರ್ಷದ ಅಚ್ಚರಿ! 10ರಲ್ಲಿ 10 ಗ್ರೇಡ್ ಅಂಕ (ಸಿಜಿಪಿಎ) ಪಡೆದವರಲ್ಲೂ ಬಾಲಕರೇ ಮುಂದಿದ್ದಾರೆ.
ಈ ವರ್ಷ ಶೇ 90.95ರಷ್ಟು ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದಾರೆ. ಕಳೆದ ಬಾರಿ ಶೇ 96.21ರಷ್ಟು ಫಲಿತಾಂಶ ದಾಖಲಾಗಿತ್ತು. ಶೇ 99.85ರಷ್ಟು ಫಲಿತಾಂಶ ದಾಖಲಿಸುವ ಮೂಲಕ ತಿರುವನಂತರಪುರ ವಲಯ ಮೊದಲ ಸ್ಥಾನದಲ್ಲಿದೆ. ಮದ್ರಾಸ್ ವಲಯ (ಶೇ 99.62) 2ನೇ ಸ್ಥಾನಲ್ಲಿದೆ.
ಅಲಹಾಬಾದ್ ವಲಯಕ್ಕೆ 3ನೇ ಸ್ಥಾನ (ಶೇ 98.23) ದಕ್ಕಿದೆ. ಶೇ 78.09 ಫಲಿತಾಂಶ ದಾಖಲಿಸುವ ಮೂಲಕ ದೆಹಲಿ ವಲಯ ಕಳಪೆ ಪ್ರದರ್ಶನ ತೋರಿದೆ. ದೇಶದಾದ್ಯಂತ 16,347 ಶಾಲೆಗಳ 16,67,573 ವಿದ್ಯಾರ್ಥಿಗಳು ಪರೀಕ್ಷೆಗೆ ಹಾಜರಾಗಿದ್ದರು.