ಲಂಡನ್ : ಹ್ಯಾರಿ ಪಾಟರ್ ಆ್ಯಂಡ್ ದ ಚೇಂಬರ್ ಆಫ್ ಸೀಕ್ರೆಟ್ಸ್ ಚಲನಚಿತ್ರದಲ್ಲಿ ‘ಹೌಲರ್’ (ಪತ್ರ ಬರೆದವನ ದನಿಯಲ್ಲಿ ಲಿಖಿತ ಸಂದೇಶ ಓದಿ ಹೇಳುವ ಜಾದು ಗುಣವುಳ್ಳ ಪತ್ರ) ಆಗಿ ಬಳಸಲಾಗಿರುವ, ಬಂಗಾರದ ಬಣ್ಣದ ಲಕೋಟೆ ₹6.41 ಲಕ್ಷಕ್ಕೆ ಹರಾಜಾಗಿದೆ. ಈ ಲಕೋಟೆಯಲ್ಲಿ ನಟ ರುಪರ್ಟ್ ಗ್ರಿಂಟ್ ಹಸ್ತಾಕ್ಷರ ಇದೆ. ಜತೆಗೆ ವಾರ್ನರ್ ಸಹೋದರರು ನೀಡಿರುವ ದೇಣಿಗೆಯ ಪತ್ರವೂ ಇದೆ.
ಕೆಂಪು ಬಣ್ಣದ ಕಾಗದದ ಈ ಲಕೋಟೆ ಮೇಲೆ ಕೆನೆ ಬಣ್ಣದಲ್ಲಿ ‘ರೊನಾಲ್ಡ್ ವೆಸ್ಲೆ, ವಾಮಾಚಾರದ ಹಾಗ್ವರ್ಟ್ಸ್ ಶಾಲೆ’ ಹೆಸರಿಗೆ ಉದ್ದೇಶಿಸಲಾಗಿರುವ ತಲೆಬರಹವಿದೆ. ಇದಕ್ಕೆ ಕಡು ಕೆಂಪು ಬಣ್ಣದ ರಿಬ್ಬನ್ ಸುತ್ತಲಾಗಿದೆ. ಬಂಗಾರದ ಬಣ್ಣದ ‘ಡಬ್ಲ್ಯು’ ಅಕ್ಷರದ ಮೇಣದ ಮೊಹರು ಇದೆ.
ರೊನಾಲ್ಡ್ ವೆಸ್ಲೆ ಪಾತ್ರದಲ್ಲಿ ನಟಿಸಿರುವ ನಟ ಗ್ರಿಂಟ್ ಹಸ್ತಾಕ್ಷರ ಇರುವ, 8*10 ಇಂಚಿನ ಚಲನಚಿತ್ರದ ದೃಶ್ಯದ ಭಾವಚಿತ್ರ ಹರಾಜಿನಲ್ಲಿತ್ತು.
ನಟ ಡೇನಿಯಲ್ ರ್ಯಾಡ್ಕ್ಲಿಫ್ ಹಸ್ತಾಕ್ಷರ ಇರುವ ಜ್ಯಾಕೆಟ್, ಟೋಪಿ ಹಾಗೂ ಕ್ಯಾನ್ವಾಸ್ ಬ್ಯಾಗ್, ರ್ಯಾಡ್ಕ್ಲಿಫ್, ಗ್ರಿಂಟ್ ಹಾಗೂ ಎಮ್ಮಾ ವಾಟ್ಸನ್ ಹಸ್ತಾಕ್ಷರದ ಪೋಸ್ಟರ್ ಸಹ ಹರಾಜಿನಲ್ಲಿದ್ದವು.