ಬ್ಯಾಂಕ್ ಖಾತೆಯಲ್ಲಿ ಕನಿಷ್ಠ ಮೊತ್ತ ಕಾಯ್ದುಕೊಳ್ಳಲು ವಿಫಲವಾಗುವ ಗ್ರಾಹಕರಿಂದ ಎಸ್‍ಬಿಐ ವಸೂಲಿ ಮಾಡಿದ ದಂಡ ₹1771 ಕೋಟಿ!

ನವದೆಹಲಿ: ಬ್ಯಾಂಕ್ ಖಾತೆಯಲ್ಲಿ ಕನಿಷ್ಠ ಮೊತ್ತ ಕಾಯ್ದುಕೊಳ್ಳಲು ವಿಫಲವಾಗುವ ಗ್ರಾಹಕರಿಂದ 2017 ಏಪ್ರಿಲ್- ನವೆಂಬರ್ ತಿಂಗಳ ಅವಧಿಯಲ್ಲಿ ಬ್ಯಾಂಕ್ ವಿಧಿಸಿದ ದಂಡದ ಪ್ರಮಾಣ ₹2320 ಕೋಟಿ. ದೇಶದ ದೊಡ್ಡ ಬ್ಯಾಂಕ್ ಆಗಿರುವ  ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಉಳಿತಾಯ ಖಾತೆಗಳಲ್ಲಿ ಕನಿಷ್ಠ  ಮೊತ್ತ ಕಾಯ್ದುಕೊಳ್ಳಲು ವಿಫಲರಾದ ಖಾತೆದಾರರಿಂದ ವಸೂಲಿ ಮಾಡಿದ ದಂಡ ₹1.771 ಕೋಟಿ!

ಜುಲೈ- ಸಪ್ಟೆಂಬರ್ ತ್ರೈಮಾಸಿಕದಲ್ಲಿ ಎಸ್‍ಬಿಐಯ ಆದಾಯಕ್ಕಿಂತ ಹೆಚ್ಚಿನ ಮೊತ್ತ ದಂಡ ವಸೂಲಿಯಿಂದ ಲಭಿಸಿದೆ. ಏಪ್ರಿಲ್ - ಸಪ್ಟೆಂಬರ್ ಅವಧಿಯಲ್ಲಿ ಬ್ಯಾಂಕ್‍ನ ಲಾಭದ ಮೊತ್ತವಾದ ₹3,586 ಕೋಟಿಯ ಅರ್ಧದಷ್ಟು ಮೊತ್ತ ದಂಡ ವಸೂಲಿಯಿಂದಲೇ ಸಿಕ್ಕಿದೆ.

ಎಸ್‍ಬಿಐಯಲ್ಲಿರುವ ಖಾತೆದಾರರ ಸಂಖ್ಯೆ 42 ಕೋಟಿ. ಇದರಲ್ಲಿ 13 ಕೋಟಿ ಬೇಸಿಕ್ ಸೇವಿಂಗ್ ಬ್ಯಾಂಕ್ ಖಾತೆ ಮತ್ತು ಜನ್‍ಧನ್ ಖಾತೆ ಹೊಂದಿದವರಾಗಿದ್ದಾರೆ. ಈ ಎರಡು ಖಾತೆಗಳ ಗ್ರಾಹಕರು ಖಾತೆಯಲ್ಲಿ ಕನಿಷ್ಠ ಮೊತ್ತ ಕಾಯ್ದುಕೊಳ್ಳಬೇಕಾಗಿಲ್ಲ.

ಕನಿಷ್ಠ  ಮೊತ್ತ ಕಾಯ್ದುಕೊಳ್ಳದ ಗ್ರಾಹಕರಿಂದ ದಂಡ ವಸೂಲಿ ಮಾಡಿದ ಬ್ಯಾಂಕ್‍ಗಳಲ್ಲಿ ಪಂಜಾಬ್ ನ್ಯಾಷನಲ್ ಬ್ಯಾಂಕ್ ಎರಡನೇ ಸ್ಥಾನದಲ್ಲಿದೆ. ಏಪ್ರಿಲ್ - ನವಂಬರ್ ಅವಧಿಯಲ್ಲಿ ಪಂಜಾಬ್ ನ್ಯಾಷನಲ್ ಬ್ಯಾಂಕ್ ₹97.34 ಕೋಟಿ ವಸೂಲಿ ಮಾಡಿದೆ, ಅದೇ ವೇಳೆ ಸೆಂಟ್ರಲ್ ಬ್ಯಾಂಕ್ ಆಫ್ ಇಂಡಿಯಾ 68.67 ಕೋಟಿ ಮತ್ತು ಕೆನರಾ ಬ್ಯಾಂಕ್ ₹62.16 ಕೋಟಿ ವಸೂಲಿ ಮಾಡಿದೆ.

ಸಾರ್ವಜನಿಕ ವಲಯ ಬ್ಯಾಂಕ್‍ಗಳಲ್ಲಿ ಪಂಜಾಬ್ ಆ್ಯಂಡ್ ಸಿಂಧ್ ಬ್ಯಾಂಕ್ ಮಾತ್ರ ಕನಿಷ್ಠ ಮೊತ್ತ ಕಾಯ್ದುಕೊಳ್ಳದ ಗ್ರಾಹಕರಿಂದ ದಂಡ ವಸೂಲಿ ಮಾಡಲಿಲ್ಲ.