ಕಾರವಾರ: ಇಲ್ಲಿನ ಟ್ಯಾಗೋರ್ ಕಡಲ ತೀರದಲ್ಲಿ ಬೃಹತ್ ನೀಲಿ ತಿಮಿಂಗಲವೊಂದರ ಮೃತದೇಹ ಪತ್ತೆಯಾಗಿದೆ. ದೇಹ ಎರಡು ಭಾಗಗಳಾಗಿ ತುಂಡಾಗಿದ್ದು, ಒಂದು ಭಾಗ ರಾಕ್‌ ಗಾರ್ಡ್‌ ಸಮೀಪ, ಮತ್ತೊಂದು ಭಾಗ ದಿವೇಕರ್ ಕಾಲೇಜಿನ ಹಿಂಭಾಗದಲ್ಲಿ ಸಿಕ್ಕಿದೆ.
‘ತಿಮಿಂಗಲ ದೇಹವು 15 ಅಡಿ ಉದ್ದವಿದ್ದು, 14ರಿಂದ 16 ವರ್ಷ ಪ್ರಾಯದ್ದಾಗಿರಬಹುದು. ದೇಹ ಹಳದಿ ಬಣ್ಣಕ್ಕೆ ತಿರುಗಿದೆ. ದೇಹ ಸಂಪೂರ್ಣ ಕೊಳೆತಿರುವುದರಿಂದ ಸಾವಿನ ಸ್ಪಷ್ಟ ಕಾರಣ ಗೊತ್ತಾಗುವುದು ಕಷ್ಟ. ಮೂರು ದಿನಗಳ ಹಿಂದೆಯೇ ಮೃತಪಟ್ಟಿರಬಹುದು’ ಎಂದು ಕಡಲ ಜೀವವಿಜ್ಞಾನ ಅಧ್ಯಯನ ಕೇಂದ್ರದ ಪ್ರಾಧ್ಯಾಪಕ ಶಿವಕುಮಾರ ಹರಗಿ ‘ಪ್ರಜಾವಾಣಿ’ಗೆ ತಿಳಿಸಿದರು.
‘ಸಮುದ್ರದಲ್ಲಿ ತೇಲುತ್ತಿದ್ದ ಮೃತದೇಹವನ್ನು ಮೀನುಗಾರರು ಹಗ್ಗ ಕಟ್ಟಿ ದಡಕ್ಕೆ ತಂದು ಹಾಕಿರಬಹುದು’ ಎಂದು ಅವರು ತಿಳಿಸಿದರು. ಜೆಸಿಬಿ ಯಿಂದ ಕಡಲ ತೀರದಲ್ಲಿಯೇ ತಿಮಿಂಗಲ ದೇಹವನ್ನು ಹೂತು ಹಾಕಲಾಯಿತು.
