ಮಂಗಳವಾರ, ಆಗಸ್ಟ್ 4, 2020
26 °C
ಆಧಾರ್‌: ಆಫ್‌ಲೈನ್‌ ಗುರುತು ದೃಢೀಕರಣಕ್ಕೆ ಸೌಲಭ್ಯ

ಕ್ಯುಆರ್‌ ಕೋಡ್‌ನಲ್ಲಿ ಫೋಟೊ ಸಹಿತ ಮಾಹಿತಿ

ಪಿಟಿಐ Updated:

ಅಕ್ಷರ ಗಾತ್ರ : | |

ಕ್ಯುಆರ್‌ ಕೋಡ್‌ನಲ್ಲಿ ಫೋಟೊ ಸಹಿತ ಮಾಹಿತಿ

ನವದೆಹಲಿ: ಭಾರತೀಯ ವಿಶಿಷ್ಟ ಗುರುತು ಚೀಟಿ ಪ್ರಾಧಿಕಾರವು (ಯುಐಡಿಎಐ) ಇ–ಆಧಾರ್‌ಗೆ ಡಿಜಿಟಲ್‌ ಸಹಿ ಹೊಂದಿರುವ ಹೆಚ್ಚು ಸುರಕ್ಷಿತವಾದ ಕ್ಯುಆರ್‌ ಕೋಡ್‌ ರೂಪಿಸಿದೆ. ಇದರಲ್ಲಿ ಆಧಾರ್‌ದಾರರ ಮಾಹಿತಿಯ ಜತೆಗೆ ಫೋಟೊ ಕೂಡ ಇರುತ್ತದೆ. ಇದನ್ನು ಬಳಸಿಕೊಂಡು ಆಫ್‌ಲೈನ್‌ (ಅಂತರ್ಜಾಲ ಸಂಪರ್ಕ ಇಲ್ಲದೆ) ದೃಢೀಕರಣ ಮಾಡುವುದಕ್ಕೆ ಅವಕಾಶ ದೊರೆಯುತ್ತದೆ.

ಇ–ಆಧಾರ್‌ನಲ್ಲಿ ಮೊದಲಿನಿಂದಲೂ ಕ್ಯುಆರ್‌ ಕೋಡ್‌ ಇತ್ತು. ಈಗ, ಡಿಜಿಟಲ್‌ ಸಹಿ ಮತ್ತು ಫೋಟೊ ಇರುವ ಕ್ಯುಆರ್‌ ಕೋಡ್‌ ಪರಿಚಯಿಸಲಾಗಿದೆ.

ಕ್ಯುಆರ್‌ ಕೋಡ್‌ ಎಂಬುದು ಒಂದು ರೀತಿಯ ಸಂಕೇತ ವ್ಯವಸ್ಥೆಯಾಗಿದ್ದು, ಅದರಲ್ಲಿ ಅಡಕವಾಗಿರುವ ಮಾಹಿತಿಯನ್ನು ಉಪಕರಣಗಳ ಮೂಲಕ ಮಾತ್ರ ಓದುವುದಕ್ಕೆ ಸಾಧ್ಯ. ಇ–ಆಧಾರ್‌ ಎಂಬುದು ಆಧಾರ್‌ನ ವಿದ್ಯುನ್ಮಾನ ಅವತರಣಿಕೆಯಾಗಿದ್ದು ಅದನ್ನು ಯುಐಡಿಎಐ ಜಾಲತಾಣದಿಂದ ಡೌನ್‌ಲೋಡ್‌ ಮಾಡಿಕೊಳ್ಳಬಹುದು.

ಡಿಜಿಟಲ್‌ ಸಹಿ ಹೊಂದಿರುವ ಕ್ಯುಆರ್‌ ಕೋಡ್‌ ಅತ್ಯಂತ ಸರಳವಾದ ವ್ಯವಸ್ಥೆ. ಇದನ್ನು ಬಳಸಿಕೊಂಡು ಆಧಾರ್‌ ಹೊಂದಿರುವ ವ್ಯಕ್ತಿಯ ಗುರುತನ್ನು ಅಂತರ್ಜಾಲ ಸಂಪರ್ಕ ಇಲ್ಲದೆಯೂ ದೃಢೀಕರಿಸುವುದಕ್ಕೆ ಸಾಧ್ಯ ಎಂದು ಯುಐಡಿಎಐ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಅಜಯ ಭೂಷಣ್‌ ಪಾಂಡೆ ಹೇಳಿದ್ದಾರೆ.

ಇ–ಆಧಾರ್‌ ಕ್ಯುಆರ್‌ ಕೋಡ್‌ ಓದುವ ಸಾಫ್ಟ್‌ವೇರ್‌ ಯುಐಡಿಎಐಯ ಜಾಲತಾಣದಲ್ಲಿ ಮಾರ್ಚ್‌ 27ರಿಂದಲೇ ಲಭ್ಯ ಇದೆ ಎಂದು ಅವರು ತಿಳಿಸಿದ್ದಾರೆ.

ಆಧಾರ್‌ ದೃಢೀಕರಣ ಸಮಸ್ಯೆಯಿಂದಾಗಿ ವಿವಿಧ ಸೌಲಭ್ಯಗಳನ್ನು ನಿರಾಕರಿಸಲಾಗಿದೆ ಎಂಬ ದೂರುಗಳು ಕೇಳಿ ಬಂದಿವೆ. ಈಗ ಅಂತರ್ಜಾಲ ಇಲ್ಲದೆಯೂ ಗುರುತು ದೃಢೀಕರಣ ಸಾಧ್ಯವಾಗುವುದರಿಂದ ಸೌಲಭ್ಯ ನಿರಾಕರಣೆ ಪ್ರಶ್ನೆ ಎದುರಾಗದು ಎಂದು ಯುಐಡಿಎಐ ಮೂಲಗಳು ತಿಳಿಸಿವೆ.

ಬ್ಯಾಂಕುಗಳು ಮತ್ತು ಇತರ ಸೇವಾ ಸಂಸ್ಥೆಗಳಲ್ಲಿ ಈ ವ್ಯವಸ್ಥೆ ಬಳಸಬಹುದು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.