ಉನ್ನಾವ್/ಉತ್ತರಪ್ರದೇಶ: ಅತ್ಯಾಚಾರ ಆರೋಪ ಮತ್ತು ಸಂತ್ರಸ್ಥೆಯ ತಂದೆಯ ಸಾವಿನ ಪ್ರಕರಣ ಸಂಬಂಧ ಬಿಜೆಪಿ ಶಾಸಕ ಕುಲದೀಪ್ ಸೆಂಗರ್ ವಿರುದ್ಧ ಎಫ್‌ಐಆರ್ ದಾಖಲಿಸಲಾಗಿದ್ದು, ಪ್ರಕರಣವನ್ನು ಸಿಬಿಐ ತನಿಖೆಗೆ ವಹಿಸಲಾಗಿದೆ.
ಭಾರತೀಯ ದಂಡ ಸಂಹಿತೆ 366(ಮಹಿಳೆಯ ಅಪಹರಣ), 363 (ಅಪಹರಣ), 376(ಅತ್ಯಾಚಾರ) ಮತ್ತು 506(ಅಪರಾಧಿ ಬೆದರಿಕೆ) ಸೆಕ್ಷನ್ ಹಾಗೂ ಪೋಕ್ಸೋ ಕಾಯ್ದೆ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.
ಇದುವರೆಗೂ ಯಾರು ಕುಲದೀಪ್ ಅವರ ರಕ್ಷಣೆಗೆ ಮುಂದೆ ಬಂದಿಲ್ಲ. ಎರಡೂ ಕಡೆಯೂ ಪೂರ್ವಪರ ವಿಚಾರಣೆ ನಡೆಸಲಾಗುತ್ತದೆ. ಇದೀಗ ಸಿಬಿಐ ತನಿಖೆ ಒಪ್ಪಿಸಲಾಗಿದೆ. ಅವರ ಬಂಧನದ ಬಗ್ಗೆ ಸಿಬಿಐ ನಿರ್ಧಾರ ಮಾಡಲಿದೆ ಎಂದು ಗೃಹ ಇಲಾಖೆ ಪ್ರಧಾನ ಕಾರ್ಯದರ್ಶಿ ಅರವಿಂದ್ ಕುಮಾರ್ ಹೇಳಿದ್ದಾರೆ.
