ಪಿಂಕ್‌ ಮತಗಟ್ಟೆಯಲ್ಲಿ ‘ಸಖಿಯರ’ ಸಂಭ್ರಮ

7
ಮಹಿಳಾ ಮತದಾರರಿಂದ ಪಿಂಕ್‌ ಮತಗಟ್ಟೆಗಳಿಗೆ ಮೆಚ್ಚುಗೆ ವ್ಯಕ್ತಿ

ಪಿಂಕ್‌ ಮತಗಟ್ಟೆಯಲ್ಲಿ ‘ಸಖಿಯರ’ ಸಂಭ್ರಮ

Published:
Updated:
ಪಿಂಕ್‌ ಮತಗಟ್ಟೆಯಲ್ಲಿ ‘ಸಖಿಯರ’ ಸಂಭ್ರಮ

ದಾವಣಗೆರೆ: ಮಹಿಳೆಯರು ಮತಗಟ್ಟೆಗೆ ಬರುವಂತೆ ಪ್ರೇರೇಪಿಸುವುದರಲ್ಲಿ ಚುನಾವಣಾ ಆಯೋಗ ರೂಪಿಸಿದ್ದ ‘ಪಿಂಕ್‌ ಮತಗಟ್ಟೆಗಳು’ ನಗರದಲ್ಲಿ ಬಹುಪಾಲು ಯಶಸ್ವಿಯಾದವು.

ಮತದಾನಕ್ಕಾಗಿ ಬಂದಿದ್ದ ಬಹುತೇಕ ಮಹಿಳೆಯರು ಪಿಂಕ್‌ ಮತಗಟ್ಟೆಗಳ ಕಾರ್ಯವೈಖರಿಯನ್ನು ಕಂಡು ಸಂತಸ ವ್ಯಕ್ತಪಡಿಸಿದರು. ಪಿಂಕ್‌ ಬಲೂನ್‌ಗಳು, ಪಿಂಕ್‌ ಬ್ಯಾನರ್‌ಗಳಿಂದ ಸುಸಜ್ಜಿತವಾಗಿ ಶೃಂಗರಿಸಲಾಗಿತ್ತು. ಹಾಗಾಗಿ ಅಲ್ಲೊಂದು ಬಗೆಯ ಸಂಭ್ರಮದ ವಾತಾವರಣ ಇತ್ತು.

ಕೇವಲ ಮಹಿಳಾ ಸಿಬ್ಬಂದಿ ನಿರ್ವಹಿಸುತ್ತಿದ್ದ ಈ ಮತದಾನ ಕೇಂದ್ರಗಳಲ್ಲಿ ಮಹಿಳೆಯರಿಗೆ ಆಪ್ತ ವಾತಾವರಣ ಮೂಡಿಸಲು ಎಲ್ಲೆಡೆ ‘ಸಖಿ ಸುಸ್ವಾಗತ’ ‘ಸಖಿಯರೇ ಮತದಾನ ಮಾಡಿ, ಹಕ್ಕು ಚಲಾಯಿಸಿ’ ಎಂಬ ಬರಹಗಳಿರುವ ಫಲಕಗಳು ಕಂಡುಬಂದವು.

ಡಿಸಿಎಂ ಟೌನ್‌ಶಿಪ್‌ನಲ್ಲಿರುವ ಡಿಆರ್‌ಆರ್‌ ಶಾಲೆ, ಪಿ.ಜೆ. ಬಡಾವಣಡಯಲ್ಲಿರುವ ಸೇಂಟ್‌ ಪಾಲ್‌ ಶಾಲೆಗಳಲ್ಲಿದ್ದ ಪಿಂಕ್‌ ಮತಗಟ್ಟೆಗಳಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಮಹಿಳೆಯರು ಮತ ಚಲಾಯಿಸಿದರು. ಬೆಳಿಗ್ಗೆ 7 ಗಂಟೆಗೆ ಸ್ವಲ್ಪ ಸಂಖ್ಯೆಯಲ್ಲಿದ್ದ ಮಹಿಳೆಯರು 10 ಗಂಟೆಯ ಹೊತ್ತಿಗೆ ಸರತಿ ಸಾಲಿನಲ್ಲಿ ನಿಂತುಕೊಂಡಿದ್ದರು.

ಮತದಾನದ ಮೊದಲ ಅನುಭವ ಪಡೆಯಲು ಬಂದ ಹೆಣ್ಣುಮಕ್ಕಳ ಸಂಖ್ಯೆಯೂ ತುಸು ಹೆಚ್ಚೇ ಇತ್ತು. ಎಲ್ಲ ವಯೋಮಾನದ ಮಹಿಳಾ ಮತದಾರರು ತಮ್ಮ ಹಕ್ಕು ಚಲಾಯಿಸಲು ಆಸಕ್ತಿ ತೋರಿಸಿದರು.

ಸಖಿ ಸೆಲ್ಫಿ: ಮತದಾನ ಮಾಡಿ ಬಂದ ಮಹಿಳೆಯರು ಶಾಯಿ ಅಂಟಿದ ಎಡಗೈನ ತೋರುಬೆರಳನ್ನು ಹಿಡಿದು ಸೆಲ್ಫಿ ತೆಗೆದುಕೊಂಡರು. ಸೆಲ್ಫಿ ಸಂಭ್ರಮವೂ ಮತದಾನದ ಭಾಗವಾಗಿದ್ದು ವಿಶೇಷವಾಗಿತ್ತು. ತರುಣಿಯರು ಗೆಳೆತಿಯರೊಡನೆ ಸೆಲ್ಫಿ ತೆಗೆದುಕೊಂಡು ಸಾಮಾಜಿಕ ಜಾಲತಾಣಗಳಲ್ಲಿ ಹರಿಬಿಟ್ಟರು. ಬೇರೆ ಊರುಗಳಲ್ಲಿ ನೆಲೆಸಿದ್ದವರೂ ಮತದಾನ ಮಾಡುವ ಸಲುವಾಗಿಯೇ ಬಂದಿದ್ದರು.

‘ತುಂಬಾ ಖುಷಿ ಆಯ್ತು. ನಾನು ಇಷ್ಟೊಂದು ಸುಸಜ್ಜಿತವಾಗಿ ಇರುತ್ತದೆ ಎಂದು ಭಾವಿಸಿರಲಿಲ್ಲ. ಈ ಪಿಂಕ್‌ ಮತಗಟ್ಟೆಯೊಳಗೆ ಹೊಕ್ಕು, ಹೊರಗೆ ಬರಲು ಮನಸ್ಸು ಆಗಲಿಲ್ಲ. ಈ ಪರಿಕಲ್ಪನೆಯೇ ವಿಭಿನ್ನವಾಗಿತ್ತು. ಸಿಬ್ಬಂದಿಯೂ ಬಹಳ ನಯವಾಗಿ ವರ್ತಿಸಿದರು. ಇದು ಹೀಗೇ ಮುಂದುವರಿಯಬೇಕು’ ಎಂದು ಡಿಸಿಎಂ ಟೌನ್‌ಶಿಪ್‌ನ ಬಿ.ವಿ. ಆರತಿ, ಎನ್‌.ಎಸ್‌. ಭಾಗ್ಯಾ, ಸುಶೀಲಾ ಮಹಾಂತೇಶ್, ಎನ್‌.ಶ್ರುತಿ ಹಾಗೂ ಕುಸುಮಾ ಶಿವಕುಮಾರ್‌ ಅಭಿಪ್ರಾಯಪಟ್ಟರು.

ಹೆಣ್ಣುಮಕ್ಕಳಿಗೆ ಪಿಂಕ್‌ ಮತಗಟ್ಟೆಗಳನ್ನು ರೂಪಿಸಿರುವುದು ವೈಯಕ್ತಿಕವಾಗಿ ಖುಷಿ ತಂದಿದೆ. ಮತದಾನದಂತಹ ಮಹತ್ತರ ಹಕ್ಕು ಚಲಾಯಿಸಲು ಹೆಣ್ಣುಮಕ್ಕಳು ಮುಂದಾಗಬೇಕು ಎಂದರು ಎಂಜಿನಿಯರಿಂಗ್‌ ವಿದ್ಯಾರ್ಥಿನಿ ಶ್ಯಾಮಲಾ.

‘ಕಳೆದ ಬಾರಿಗೆ ಹೋಲಿಸಿದರೆ ಈ ಸಲ ನನಗೆ ಮತದಾನ ಮಾಡಲು ಬಹಳ ಖುಷಿಯಾಯಿತು ಎಂದರು ರಾಮಣ್ಣ ಕೋ ಸರ್ಕಲ್‌ನ ಮಧು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry